Tehran , 01 മാര്ച്ച് (H.S.)

ടെഹ്റാൻ: അമേരിക്കയും ഇസ്രയേലും സംയുക്തമായി നടത്തിയ ആക്രമണത്തിൽ ഇറാന്റെ പരമോന്നത നേതാവ് ആയത്തൊള്ള അലി ഖമനെയി കൊല്ലപ്പെട്ടതോടെ പശ്ചിമേഷ്യയിൽ യുദ്ധഭീതി മൂർച്ഛിക്കുന്നു. ഖമനെയിയുടെ വധത്തിന് പ്രതികാരമായി ഇറാൻ തങ്ങളുടെ തിരിച്ചടിയുടെ രണ്ടാം ഘട്ടം ആരംഭിച്ചു. ഇതിന്റെ ഭാഗമായി വിവിധ രാജ്യങ്ങളിലായി വ്യാപിച്ചു കിടക്കുന്ന അമേരിക്കയുടെ 27 സൈനിക കേന്ദ്രങ്ങൾ ലക്ഷ്യമിട്ട് ഇറാൻ ശക്തമായ ആക്രമണം അഴിച്ചുവിട്ടു. ഇറാഖിലെ എർബിലിലുള്ള യുഎസ് സൈനിക താവളത്തിന് നേരെയും കനത്ത മിസൈൽ-ഡ്രോൺ ആക്രമണങ്ങൾ നടന്നതായാണ് റിപ്പോർട്ട്.

തിരിച്ചടി ശക്തമാക്കി ഇറാൻ

ആയത്തൊള്ള അലി ഖമനെയിയുടെ വധത്തിന് ശേഷം മുമ്പൊരിക്കലും കാണാത്ത തരത്തിലുള്ള പ്രത്യാഘാതങ്ങൾ അമേരിക്കയും ഇസ്രയേലും നേരിടേണ്ടി വരുമെന്ന് ഇറാൻ മുന്നറിയിപ്പ് നൽകിയിരുന്നു. ഇതിന് പിന്നാലെയാണ് ഗൾഫ് മേഖലയിലെ യുഎസ് സ്വാധീന കേന്ദ്രങ്ങളെ ലക്ഷ്യമിട്ടുള്ള ആക്രമണങ്ങൾ ആരംഭിച്ചത്. ആദ്യഘട്ടത്തിൽ സൈനിക താവളങ്ങളെ മാത്രം ലക്ഷ്യം വെച്ചിരുന്ന ഇറാൻ, ശനിയാഴ്ച രാത്രിയോടെ ആക്രമണം ജനവാസ മേഖലകളിലേക്കും വ്യാപിപ്പിച്ചു. ദുബായ്, അബുദാബി, കുവൈറ്റ്, ബഹ്റൈൻ തുടങ്ങിയ രാജ്യങ്ങളിലെ വിമാനത്താവളങ്ങൾക്ക് നേരെ ഡ്രോൺ ആക്രമണങ്ങൾ ഉണ്ടായി. യുഎഇ, ഖത്തർ തുടങ്ങിയ രാജ്യങ്ങളിലേക്ക് ഇറാൻ തൊടുത്തുവിട്ട പല മിസൈലുകളും പ്രതിരോധ സംവിധാനങ്ങൾ തകർത്തതായും വാർത്തകളുണ്ട്.

ടെഹ്റാനിൽ ജനലക്ഷങ്ങളുടെ പ്രതിഷേധം

തങ്ങളുടെ പ്രിയപ്പെട്ട നേതാവിന്റെ വധത്തിൽ പ്രതിഷേധിച്ച് ഇറാന്റെ തലസ്ഥാനമായ ടെഹ്റാനിൽ ലക്ഷക്കണക്കിന് ആളുകൾ പങ്കെടുത്ത വമ്പൻ പ്രതിഷേധ റാലി നടന്നു. സ്ത്രീകളും കുട്ടികളും ഉൾപ്പെടെയുള്ളവർ ഖമനെയിയുടെ ചിത്രങ്ങൾ ഏന്തി റാലിയിൽ പങ്കെടുത്തു. ഇറാനിൽ മാത്രമല്ല, കശ്മീർ ഉൾപ്പെടെയുള്ള ലോകത്തിന്റെ വിവിധ ഭാഗങ്ങളിലും ഖമനെയിയുടെ മരണത്തിൽ പ്രതിഷേധങ്ങൾ അരങ്ങേറി. ഇറാന്റെ ഭരണനേതൃത്വം ഏറ്റെടുക്കാൻ ഖമനെയിയുടെ മകൻ മുജ്തബ ഖമനെയി തയ്യാറെടുക്കുന്നതായും റിപ്പോർട്ടുകളുണ്ട്.

ഗൾഫ് മേഖല നിശ്ചലമാകുന്നു

ആക്രമണം ശക്തമായതോടെ പശ്ചിമേഷ്യൻ രാജ്യങ്ങളിലെ വ്യോമപാതകൾ പലതും അടച്ചു. യുഎഇ, ഖത്തർ, കുവൈറ്റ്, ബഹ്റൈൻ തുടങ്ങിയ രാജ്യങ്ങൾ വിമാന സർവീസുകൾ റദ്ദാക്കിയത് ആയിരക്കണക്കിന് യാത്രക്കാരെ ദുരിതത്തിലാക്കി. പ്രധാന വിമാന കമ്പനികളെല്ലാം സർവീസുകൾ നിർത്തിവെച്ചിരിക്കുകയാണ്. ഇസ്രയേലിലെ ടെൽ അവീവിൽ ഇറാൻ നടത്തിയ മിസൈൽ ആക്രമണത്തിൽ ഒരു സ്ത്രീ കൊല്ലപ്പെടുകയും ഇരുപതോളം പേർക്ക് പരിക്കേൽക്കുകയും ചെയ്തു.

അമേരിക്കയും ഇസ്രയേലും നിലപാട് കടുപ്പിക്കുന്നു

ഇറാന്റെ ആക്രമണങ്ങൾക്ക് മറുപടിയായി ഇസ്രയേലും അമേരിക്കയും തിരിച്ചടി തുടരുകയാണ്. ഇറാന്റെ സൈനിക ശേഷി പൂർണ്ണമായും തകർക്കുന്നതുവരെ പിന്മാറില്ലെന്ന നിലപാടിലാണ് ഇസ്രയേൽ. പശ്ചിമേഷ്യയിൽ പൂർണ്ണമായ സമാധാനം കൈവരുന്നതുവരെ പോരാട്ടം തുടരുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കിയിട്ടുണ്ട്. ഇതോടെ മേഖലയിലെ സാധാരണക്കാരുടെ ജീവിതം അതീവ ദുഷ്കരമായിരിക്കുകയാണ്. യുദ്ധം വരും ദിവസങ്ങളിൽ കൂടുതൽ രാജ്യങ്ങളിലേക്ക് വ്യാപിക്കുമോ എന്ന ആശങ്കയിലാണ് ലോകം.

---------------

Hindusthan Samachar / Roshith K