Kerala, 01 മാര്ച്ച് (H.S.)

കൽപ്പറ്റ: മുണ്ടക്കൈ-ചൂരൽമല ഉരുൾപൊട്ടൽ ദുരന്തബാധിതർക്കായി സർക്കാർ നിർമ്മിച്ച വയനാട് മാതൃകാ ടൗൺഷിപ്പിന്റെ ആദ്യഘട്ട ഉദ്ഘാടന വേദിയിൽ രാഷ്ട്രീയ പോര് മുറുകുന്നു. ചടങ്ങിൽ അധ്യക്ഷത വഹിച്ച ടി. സിദ്ദിഖ് എം.എൽ.എയെ വേദിയിലിരുത്തി റവന്യു മന്ത്രി കെ. രാജൻ നടത്തിയ പരാമർശങ്ങൾ രാഷ്ട്രീയ കേന്ദ്രങ്ങളിൽ വലിയ ചർച്ചയായിരിക്കുകയാണ്. ഞങ്ങൾ കല്ല് മാത്രം ഇട്ടു പോകുന്നവരല്ല, മറിച്ച് കല്ലിന് മേൽ കല്ല് വെച്ച് നിർമ്മാണം പൂർത്തിയാക്കുന്നവരാണ് എന്നായിരുന്നു മന്ത്രിയുടെ പരിഹാസം.

ദുരന്തബാധിതർക്ക് പുനരധിവാസം ഉറപ്പാക്കുന്നതിനായി ഇന്ത്യയിൽ തന്നെ ആദ്യമായി വിഭാവനം ചെയ്ത ടൗൺഷിപ്പാണിതെന്ന് മന്ത്രി അവകാശപ്പെട്ടു. ഭൂമി ഏറ്റെടുക്കുന്നതുമായി ബന്ധപ്പെട്ട് കോടതിയിൽ നിലനിന്നിരുന്ന നിയമ തടസ്സങ്ങൾ ഉണ്ടായിരുന്നില്ലെങ്കിൽ വീടുകൾ ഇതിലും വേഗത്തിൽ കൈമാറാമായിരുന്നുവെന്നും അദ്ദേഹം കൂട്ടിച്ചേർത്തു. ഡിസാസ്റ്റർ എൻജിനീയറിങ് സാധ്യതകൾ കൂടി പരിഗണിച്ചാണ് ഈ വീടുകൾ നിർമ്മിച്ചിരിക്കുന്നത്. പുനരധിവാസ പ്രവർത്തനങ്ങൾ ഒരു ദിവസം പോലും നിർത്താതെ തുടരുമെന്നും, അടുത്ത മഴക്കാലത്തിന് മുൻപായി അവസാനത്തെ താക്കോലും അർഹരായവർക്ക് കൈമാറുമെന്നും മന്ത്രി ഉറപ്പുനൽകി. കൂടാതെ, ദുരന്തബാധിതർക്കുള്ള 9000 രൂപയുടെ സർക്കാർ സഹായം തുടരുമെന്നും വെള്ളാർമല സ്കൂൾ പുനർനിർമ്മിച്ച് നൽകുമെന്നും മന്ത്രി പ്രഖ്യാപിച്ചു.

എം.എൽ.എയ്ക്കെതിരെ കൂക്കിവിളി; മറുപടിയുമായി ടി. സിദ്ദിഖ്

ഉദ്ഘാടന ചടങ്ങിനിടെ ടി. സിദ്ദിഖ് എം.എൽ.എയ്ക്കെതിരെ സദസ്സിൽ നിന്നും പ്രതിഷേധമുയർന്നത് നാടകീയ രംഗങ്ങൾക്ക് വഴിതെളിച്ചു. ചീഫ് സെക്രട്ടറി സ്വാഗത പ്രസംഗത്തിൽ എം.എൽ.എയുടെ പേര് പരാമർശിച്ചപ്പോഴും, പിന്നീട് അദ്ദേഹം പ്രസംഗിക്കാനായി എഴുന്നേറ്റപ്പോഴും സദസ്സിലെ ഒരു വിഭാഗം ആളുകൾ കൂക്കിവിളിച്ചു. സി.പി.എം പ്രവർത്തകരാണ് ഇതിന് പിന്നിലെന്ന് ആരോപണമുണ്ട്.

എന്നാൽ പ്രതിഷേധങ്ങളോട് തികച്ചും സംയമനത്തോടെയാണ് ടി. സിദ്ദിഖ് പ്രതികരിച്ചത്. ദുരന്തത്തിന് ഇരയായ ഒരാൾ പോലും തനിക്കെതിരെ അസ്വസ്ഥതയുടെ ശബ്ദം ഉയർത്തില്ലെന്ന് എനിക്ക് ഉറപ്പുണ്ട്. ബാക്കിയുള്ളവരുടെ രാഷ്ട്രീയ പ്രേരിതമായ അസ്വസ്ഥതകൾ ഞാൻ കാര്യമാക്കുന്നില്ല, എന്ന് അദ്ദേഹം പറഞ്ഞു. ദുരന്തം നടന്നത് മുതൽ സർക്കാരിനൊപ്പം ചേർന്ന് താൻ പ്രവർത്തിച്ചിട്ടുണ്ടെന്നും, ഇന്നലെ മാത്രം 50ലധികം വീടുകൾ ദുരന്തബാധിതർക്കായി സമർപ്പിച്ചുവെന്നും അദ്ദേഹം ഓർമ്മിപ്പിച്ചു.

ആദ്യഘട്ടത്തിൽ 178 കുടുംബങ്ങൾക്കാണ് ടൗൺഷിപ്പിൽ വീടുകൾ കൈമാറുന്നത്. മുഖ്യമന്ത്രി പിണറായി വിജയൻ ഓൺലൈനായി ടൗൺഷിപ്പിന്റെ ഉദ്ഘാടനം നിർവഹിച്ചു. അതിജീവനത്തിന്റെ വലിയൊരു പാഠമായി മാറുന്ന ഈ പദ്ധതി, കേരളത്തിന്റെ പുനർനിർമ്മാണ ചരിത്രത്തിലെ സുപ്രധാന നാഴികക്കല്ലായാണ് വിലയിരുത്തപ്പെടുന്നത്. എങ്കിലും, പുനരധിവാസ വേദിയിലെ രാഷ്ട്രീയ വാക്പോരുകൾ ദുരന്തബാധിതർക്കിടയിൽ ചർച്ചയായിട്ടുണ്ട്.

---------------

Hindusthan Samachar / Roshith K