Thiruvananthapuram , 10 മാര്ച്ച് (H.S.)

തട്ടിനകം പൈപ്പ് ലൈൻ അറ്റകുറ്റപ്പണി: കുടിവെള്ള വിതരണം ഉറപ്പാക്കാൻ കടകംപള്ളി സുരേന്ദ്രൻ എം.എൽ.എയുടെ ഇടപെടൽ

തിരുവനന്തപുരം: തട്ടിനകം പാലത്തിനടുത്ത് 900 മില്ലിമീറ്റർ പി.എസ്.സി പൈപ്പ് ലൈനിലെ ചോർച്ച പരിഹരിക്കുന്നതിനായി മാർച്ച് 12, 13 തീയതികളിൽ ഏർപ്പെടുത്തിയിട്ടുള്ള ഷട്ട്ഡൗൺ മൂലം കഴക്കൂട്ടം നിയോജകമണ്ഡലത്തിലുണ്ടാകുന്ന കുടിവെള്ള ക്ഷാമം പരിഹരിക്കാൻ അടിയന്തര നടപടികൾ സ്വീകരിച്ചു. കഴക്കൂട്ടം എം.എൽ.എ കടകംപള്ളി സുരേന്ദ്രൻറെ അധ്യക്ഷതയിൽ കേരള വാട്ടർ അതോറിറ്റി സൂപ്രണ്ടിംഗ് എഞ്ചിനീയറുടെ ഓഫീസിൽ ചേർന്ന ഉന്നതതല യോഗത്തിലാണ് ബദൽ സംവിധാനങ്ങൾ ഏർപ്പെടുത്താൻ തീരുമാനമായത്.

*ടാങ്കർ വിതരണത്തിന് പ്രത്യേക മാതൃക*

കുടിവെള്ള വിതരണം കാര്യക്ഷമമാക്കാൻ എം.എൽ.എ മുന്നോട്ടുവെച്ച നിർദ്ദേശങ്ങൾ ഇവയാണ്:

* വാർഡ് അടിസ്ഥാനത്തിൽ ടാങ്കറുകൾ: ഓരോ ബാധിത വാർഡിനും കുറഞ്ഞത് രണ്ട് ടാങ്കറുകൾ വീതം പ്രത്യേകമായി അനുവദിക്കണം.

* തിരിച്ചറിയൽ ബോർഡുകൾ: ഓരോ ടാങ്കറിലും ഏത് വാർഡിലേക്കുള്ളതാണെന്ന് വ്യക്തമാക്കുന്ന നെയിംപ്ലേറ്റ് നിർബന്ധമായും ഘടിപ്പിക്കണം. ഒരു വാർഡിലേക്ക് നിശ്ചയിച്ച വെള്ളം മറ്റ് പ്രദേശങ്ങളിലേക്ക് വഴിതിരിച്ചുവിടുന്നത് തടയാനാണിത്.

* ചെറിയ ടാങ്കറുകൾക്ക് മുൻഗണന: ഉൾപ്രദേശങ്ങളിലേക്കും ഉയർന്ന പ്രദേശങ്ങളിലേക്കും എളുപ്പത്തിൽ എത്തുന്നതിനായി 2000 ലിറ്റർ, 5000 ലിറ്റർ ശേഷിയുള്ള ചെറിയ ടാങ്കറുകൾ കൂടുതൽ ഉപയോഗിക്കണം.

* മുൻകൂട്ടി സ്റ്റേഷൻ ചെയ്യണം: ഷട്ട്ഡൗൺ തുടങ്ങുന്നതിന് മുൻപ് തന്നെ, അതായത് മാർച്ച് 11-ന് തന്നെ ടാങ്കറുകൾ നിശ്ചിത കേന്ദ്രങ്ങളിൽ എത്തിക്കണം.

*മേൽനോട്ടത്തിന് പ്രത്യേക ഉദ്യോഗസ്ഥർ*

ടാങ്കർ വഴിയുള്ള ജലവിതരണം തടസ്സമില്ലാതെ നടക്കുന്നുണ്ടെന്ന് ഉറപ്പാക്കാൻ ഫുൾ ടൈം അടിസ്ഥാനത്തിൽ 2-3 ഓവർസിയർമാരെ നിയമിക്കാൻ എം.എൽ.എ നിർദ്ദേശിച്ചു. ഫിൽട്ടർ ഹൗസിലെ അസിസ്റ്റൻ്റ് എഞ്ചിനീയർക്കായിരിക്കും വിതരണത്തിന്റെ പൂർണ്ണ മേൽനോട്ട ചുമതല. വെള്ളയമ്പലം വെൻഡിംഗ് പോയിന്റിൽ നിന്നായിരിക്കും ടാങ്കറുകൾക്ക് ആവശ്യമായ വെള്ളം ലഭ്യമാക്കുക.

*ബാധിക്കപ്പെടുന്ന പ്രദേശങ്ങൾ*

കഴക്കൂട്ടം, ചന്തവിള, കാട്ടായിക്കോണം, ശ്രീകാര്യം, ചെറുവക്കൽ, ചെല്ലമംഗലം, ചെമ്പഴന്തി, പൗഡിക്കോണം, ഞാണ്ടൂർകോണം, സൈനിക് സ്കൂൾ, ചെങ്കോട്ടുക്കോണം, കാര്യവട്ടം, പാങ്ങപ്പാറ, പള്ളിത്തുറ, ആറ്റിപ്ര, പൗണ്ടുകടവ്, ആക്കുളം, കുളത്തൂർ, അലത്തറ, കുഴിവിള, കേശവദാസപുരം, ഇടവക്കോട്, പട്ടം, ഉള്ളൂർ, മുട്ടട എന്നീ വാർഡുകളെയാണ് ഷട്ട്ഡൗൺ ബാധിക്കുന്നത്. മാർച്ച് 12, 13 തീയതികളിൽ ജലവിതരണം പൂർണ്ണമായും തടസ്സപ്പെടുമെങ്കിലും മാർച്ച് 19 വരെ ഭാഗികമായേ വിതരണം പുനസ്ഥാപിക്കപ്പെടുകയുള്ളൂ എന്ന് അധികൃതർ അറിയിച്ചു.

കോർപ്പറേഷൻ പക്കലുള്ള ടാങ്കറുകൾക്ക് പുറമെ ഓൺലൈൻ സംവിധാനത്തിലുള്ള വാഹനങ്ങൾ ഉൾപ്പെടെ ആകെ 109 ടാങ്കറുകൾ സേവനത്തിനായി സജ്ജമാണെന്ന് ഉദ്യോഗസ്ഥർ യോഗത്തിൽ വ്യക്തമാക്കി. വേനൽക്കാലത്തെ കുടിവെള്ള ക്ഷാമം പരിഹരിക്കാനും ഇത്തരം സംവിധാനങ്ങൾ ഉപയോഗപ്പെടുത്തുന്നതിനെക്കുറിച്ച് ആലോചിക്കാനും വാട്ടർ അതോറിറ്റിക്ക് എം.എൽ.എ നിർദേശം നൽകി.

---------------

Hindusthan Samachar / CHANDHU CHANDRASEKHAR