Enter your Email Address to subscribe to our newsletters
Kozhikkode, 10 മാര്ച്ച് (H.S.)
പൊതുജനങ്ങള്ക്ക് കോഴിക്കോട് നഗരത്തിലെ കാഴ്ചകള് ആസ്വദിക്കാന് കെ.എസ്.ആര്.ടി.സിയുടെ ഓപണ് ഡബിള് ഡക്കര് ബസൊരുങ്ങി. കെ.എസ്.ആര്.ടി.സി ബസ് ടെര്മിനലിന് സമീപം നടന്ന ചടങ്ങില് ടൂറിസം-പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് ഫ്ളാഗ് ഓഫ് നിര്വഹിച്ചു.
കെ.എസ്.ആര്.ടി.സി ബജറ്റ് ടൂറിസത്തിന്റെ ഭാഗമായി ഏറ്റവും കുറഞ്ഞ നിരക്കില് സാധാരണക്കാര്ക്ക് ടൂറിസം കേന്ദ്രങ്ങള് സന്ദര്ശിക്കാന് അവസരമൊരുക്കുകയാണ് സര്വീസിന്റെ ലക്ഷ്യം. എല്ലാ ദിവസവും വൈകീട്ട് മൂന്നു മണിയോടെ തുടങ്ങി രാത്രി പത്തര വരെ സര്വീസുണ്ടാകും. ആദ്യഘട്ടത്തില് കെ.എസ്.ആര്.ടി.സി സ്റ്റാന്ഡില്നിന്ന് തുടങ്ങി സരോവരം ബയോപാര്ക്ക്, മാനാഞ്ചിറ, ബീച്ച് എന്നിവിടങ്ങളിലെ കാഴ്ചകളിലൂടെയാകും സര്വീസ്. അഞ്ച് ട്രിപ്പുകളാകും തുടക്കത്തില് ഉണ്ടാവുക. രണ്ടാം ഘട്ടത്തില് ജില്ലയിലെ പ്രധാന ടൂറിസം കേന്ദ്രങ്ങളായ ബേപ്പൂര്, ചാലിയം, കാപ്പാട് തുടങ്ങിയ ഇടങ്ങളിലേക്ക് സര്വീസ് ആരംഭിക്കും.
പരിസ്ഥിതി സൗഹൃദ യാത്ര ലക്ഷ്യമിട്ട് ഇലക്ട്രിക് ബസാണ് സര്വീസിനെത്തിച്ചത്. മുകളില് 36 സീറ്റും താഴെ 28 സീറ്റുകളുണ്ട്. ഓണ്ലൈന് വഴിയും ഫോണ് വഴിയും ടിക്കറ്റുകള് ബുക്ക് ചെയ്യാം. 4.7 മീറ്റര് ഉയരമുള്ള ബസ് താഴ്ന്നുനില്ക്കുന്ന മരച്ചില്ലകളും ഇലക്ട്രിക് ലൈനുകളും കേബിളുകളുമെല്ലാം നീക്കിയ ശേഷമായിരിക്കും സ്ഥിരം ട്രിപ്പുകള് ആരംഭിക്കുക. നിലവില് തിരുവനന്തപുരം, മൂന്നാര്, എറണാകുളം, തൃശൂര് എന്നിവിടങ്ങളിലാണ് സമാന സര്വീസുകളുള്ളത്.
ഫ്ളാഗ് ഓഫ് ചടങ്ങില് അഹമ്മദ് ദേവര്കോവില് എം.എല്.എ, വാര്ഡ് കൗണ്സിലര് ശ്രീജ സി നായര്, കെ.എസ്.ആര്.ടി.സി അസി. വര്ക്ക് മാനേജര് ഗിരീഷ്, മറ്റു ഉദ്യോഗസ്ഥര് തുടങ്ങിയവര് പങ്കെടുത്തു
---------------
Hindusthan Samachar / Sreejith S
