Enter your Email Address to subscribe to our newsletters
Thiruvanathapuram, 10 മാര്ച്ച് (H.S.)
ബലാത്സംഗക്കേസില് പാലക്കാട് എംഎല്എ രാഹുല് മാങ്കൂട്ടത്തിലിന്റെ മുന്കൂര് ജാമ്യം റദ്ദാക്കണമെന്ന ഹര്ജിയുടെ പ്രാരംഭ വാദം തുടങ്ങി. രണ്ടാമത്തെ പീഡന പരാതി നല്കിയ ബെംഗളൂരു സ്വദേശിനിയായ യുവതിയെ ഭീഷണിപ്പെടുത്തി എന്ന് വ്യക്തമാക്കിയാണ് മുന്കൂര് ജാമ്യം റദ്ദാക്കണം എന്ന് പ്രോസിക്യൂഷന് ആവശ്യപ്പെട്ടിരിക്കുന്നത്. യുവതി കോടതിയില് രഹസ്യമൊഴി നല്കിയതിന്റെ പിറ്റേദിവസം തന്നെ ഭയപ്പെടുത്താന് രാഹുല് ശ്രമിച്ചുവെന്ന് പ്രോസിക്യൂഷന് കോടതിയില് പറഞ്ഞു.
കേസില് രാഹുലിന് അനുവദിച്ച ജാമ്യം റദ്ദാക്കണമെന്ന് ആവശ്യപ്പെട്ടു പ്രോസിക്യൂഷന് സമര്പ്പിച്ച ഹര്ജിയുടെ പ്രാരംഭ വാദത്തിലാണ് പ്രോസിക്യൂട്ടര് കല്ലംമ്പള്ളി മനു ഇക്കാര്യം കോടതിയുടെ ശ്രദ്ധയില് പെടുത്തിയത്. പരാതിക്കാരിയെ ഭയപ്പെടുത്തി കേസില്നിന്നു പിന്തിരിപ്പിക്കുകയായിരുന്നു രാഹുലിന്റെ ലക്ഷ്യമെന്നും പ്രോസിക്യൂഷന് ആരോപിച്ചു. ക്രൂരമായി പീഡനത്തിന് ഇരയായ പെണ്കുട്ടി രാഹുലിനെ ഭയന്നാണ് കെപിസിസിയില് പരാതി നല്കിയത്. രാഹുല് ജാമ്യ വ്യവസ്ഥ ലംഘിച്ചു എന്നു മാത്രമല്ല കോടതിയുടെ നിര്ദ്ദേശങ്ങള് പാലിച്ചില്ലെന്നും പ്രോസിക്യൂഷന് വ്യക്തമാക്കി.
അവിവാഹിതയായ 21 വയസുകാരിയെ ഹോം സ്റ്റേയില് കൊണ്ടുപോയി നിരവധി തവണ ബലാത്സംഗം ചെയ്തു ശാരീരിക മുറിവുകള് ഏല്പ്പിച്ചുവെന്ന ഗുരുതരമായ കേസില്, ഇരയെ ബന്ധപ്പെടാന് പാടില്ലെന്ന വ്യവസ്ഥയോടെയാണ് ജാമ്യം നല്കിയിരുന്നതെന്നു പ്രോസിക്യൂഷന് അറിയിച്ചു. ജില്ലാ കോടതി മുന്കൂര് ജാമ്യം അനുവദിക്കുമ്പോള് നല്കിയിരുന്ന അഞ്ചാമത്തെ വ്യവസ്ഥ ലംഘിച്ചാണ് പ്രതി അതിജീവിതയെ ഫോണില് ബന്ധപ്പെടാന് ശ്രമിച്ചതെന്നും പ്രോസിക്യൂഷന് അറിയിച്ചു. തിരുവനന്തപുരം ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതി മൂന്നാണ് കേസ് പരിഗണിക്കുന്നത്. നെടുമങ്ങാട് കോടതിയില് രഹസ്യമൊഴി നല്കിയതിനു പിന്നാലെ ഫെബ്രുവരി 17ന് രാഹുല് വാട്സാപ് കോള് ചെയ്തതായി യുവതി പൊലീസിന് നല്കിയ പരാതിയെ തുടര്ന്നാണ് ജാമ്യം റദ്ദാക്കണമെന്ന ഹര്ജിയുമായി പ്രത്യേക അന്വേഷണ സംഘം കോടതിയെ സമീപിച്ചത്.
രാഹുലിന് എതിരായ ഒന്നാമത്തെ പരാതിയില് അനുവദിച്ച് മുന്കൂര് ജാമ്യത്തിന് എതിരെ ഇര സുപ്രീംകോടതിയെ സമീപിച്ചിരിക്കുകയാണ്. തന്റെ ജീവന് ഭീഷണിയൂുണ്ട് എന്നാണ് യുവതി സുപ്രീം കോടതിയില് നല്കിയിരിക്കുന്ന ഹര്ജിയില് ആരോപിച്ചിരിക്കുന്നത്.
---------------
Hindusthan Samachar / Sreejith S
