Idukki, 12 മാര്ച്ച് (H.S.)

തിരുവനന്തപുരം: മുതിർന്ന സിപിഎം നേതാവ് ജി. സുധാകരനെതിരെ രൂക്ഷമായ പരിഹാസവുമായി എം.എം മണി എംഎൽഎ. പാർട്ടി വിട്ടാൽ ജി. സുധാകരൻ വെറും 'ശൂ' ആണെന്നും പ്രസ്ഥാനത്തെ വിട്ടുപോകുന്നവർക്ക് രാഷ്ട്രീയമായി നിലനിൽപ്പുണ്ടാകില്ലെന്നും മണി പറഞ്ഞു. പതിറ്റാണ്ടുകളായി പാർട്ടിയുമായി ബന്ധമുള്ള പലരും മുൻപും പാർട്ടി വിട്ടുപോയിട്ടുണ്ടെന്നും ചിലരെ പുറത്താക്കിയിട്ടുണ്ടെന്നും മണി ഓർമ്മിപ്പിച്ചു. വ്യക്തികൾ പോയാലും പ്രസ്ഥാനം മുന്നോട്ട് പോകുമെന്നും അദ്ദേഹം കൂട്ടിച്ചേർത്തു.

എം.എം മണിയുടെ വിമർശനം

ജി. സുധാകരൻ മുൻപ് മന്ത്രിയായിരുന്ന ആളാണ്. എന്നാൽ അദ്ദേഹം പോയാൽ പാർട്ടിക്ക് ഒന്നും സംഭവിക്കില്ല. പാർട്ടി ആരെയും കെട്ടിയിട്ടിട്ടില്ല. ഇതിലും വലിയ മഹാരഥന്മാർ പാർട്ടി വിട്ടുപോയിട്ടും ഒന്നും സംഭവിച്ചിട്ടില്ല. പാർട്ടി വിടുന്നതോടെ അദ്ദേഹത്തിന്റെ രാഷ്ട്രീയ പ്രസക്തി അവസാനിക്കുമെന്നും മണി പരിഹസിച്ചു.

മറുപടിയുമായി ജി. സുധാകരൻ

എം.എം മണിയുടെ പരിഹാസത്തിന് അതേ നാണയത്തിൽ തന്നെ ജി. സുധാകരൻ മറുപടി നൽകി. എം.എം മണി ഇടുക്കിയിലെ 'ശൂ' ആണെന്നായിരുന്നു സുധാകരന്റെ മറുപടി. ആലപ്പുഴയിലെ കാര്യങ്ങളിൽ എം.എം മണി ഇടപെടേണ്ട കാര്യമില്ലെന്നും അദ്ദേഹം ആഞ്ഞടിച്ചു. പാർട്ടിയിൽ നിന്ന് നേരിടുന്ന അവഗണനകളിലും ഒറ്റപ്പെടുത്തലുകളിലും പ്രതിഷേധിച്ചാണ് സുധാകരൻ പരസ്യമായി രംഗത്തെത്തിയത്.

അമ്പലപ്പുഴയിൽ സ്വതന്ത്രനായി മത്സരിക്കും

പാർട്ടിയിലുണ്ടായ ദുരനുഭവങ്ങൾ എണ്ണിപ്പറഞ്ഞുകൊണ്ട് ജി. സുധാകരൻ വാർത്താ സമ്മേളനം നടത്തി. വരാനിരിക്കുന്ന തിരഞ്ഞെടുപ്പിൽ അമ്പലപ്പുഴ മണ്ഡലത്തിൽ നിന്ന് സ്വതന്ത്ര സ്ഥാനാർത്ഥിയായി മത്സരിക്കുമെന്ന് അദ്ദേഹം പ്രഖ്യാപിച്ചു. തന്നെയും തന്റെ കുടുംബത്തെയും അപമാനിക്കാൻ ശ്രമിച്ചവർക്ക് മറുപടി നൽകാനാണ് ഈ തീരുമാനമെന്ന് അദ്ദേഹം വ്യക്തമാക്കി. രക്തസാക്ഷിയായ തന്റെ സഹോദരൻ ഭുവനേശ്വരനെ കുറിച്ച് സംസാരിക്കാൻ നിലവിലെ പാർട്ടിക്കാർക്ക് എന്ത് അർഹതയാണുള്ളതെന്നും അദ്ദേഹം ചോദിച്ചു.

പ്രചാരണ വേളയിൽ സർക്കാരിനെതിരെ ഒന്നും സംസാരിക്കില്ലെന്നും ഭരണവിരുദ്ധ വികാരം ഉണ്ടോ എന്ന് ഇപ്പോൾ പറയാനാകില്ലെന്നും അദ്ദേഹം പറഞ്ഞു. യുഡിഎഫ് പിന്തുണ നൽകുന്നതിനെ കുറിച്ച് ആലോചിച്ചിട്ടില്ലെന്നും അത്തരമൊരു നീക്കം ഉണ്ടായാൽ അപ്പോൾ തീരുമാനിക്കാമെന്നും സുധാകരൻ വ്യക്തമാക്കി. ജി. സുധാകരന്റെ ഈ നീക്കം ആലപ്പുഴയിലെ സിപിഎം രാഷ്ട്രീയത്തിൽ വലിയ പ്രത്യാഘാതങ്ങൾ ഉണ്ടാക്കുമെന്നാണ് വിലയിരുത്തപ്പെടുന്നത്.

---------------

Hindusthan Samachar / Roshith K