Alapuzha, 13 മാര്ച്ച് (H.S.)

ആലപ്പുഴ: മുതിർന്ന നേതാവ് ജി. സുധാകരൻ ഉയർത്തിയ രാഷ്ട്രീയ വെല്ലുവിളിയെ നേരിട്ട് പ്രതിരോധിക്കാൻ സിപിഎം തീരുമാനം. തിരഞ്ഞെടുപ്പ് അടുത്തുനിൽക്കെ പാർട്ടിയെ പ്രതിസന്ധിയിലാക്കിയ സുധാകരനോട് ഇനി മൃദുസമീപനം വേണ്ടെന്ന നിലപാടിലാണ് നേതൃത്വം. അമ്പലപ്പുഴ മണ്ഡലത്തിൽ സ്വതന്ത്രനായി മത്സരിക്കുമെന്ന സുധാകരന്റെ പ്രഖ്യാപനത്തിന് പിന്നാലെ, അദ്ദേഹത്തെ രാഷ്ട്രീയമായും സംഘടനാപരമായും നേരിടാനാണ് ജില്ലാ നേതൃത്വത്തിന്റെ നീക്കം. ഇതിന്റെ ഭാഗമായി ശനിയാഴ്ച വൈകിട്ട് സുധാകരൻ താമസിക്കുന്ന പറവൂരിൽ സിപിഎം വിപുലമായ ശക്തിപ്രകടനം സംഘടിപ്പിക്കും.

ശക്തിപ്രകടനം പറവൂരിൽ

വി.എസ്. അച്യുതാനന്ദന്റെ വീടിന് സമീപത്ത് നിന്നും ആരംഭിച്ച് ജി. സുധാകരന്റെ വീടിന് അടുത്തുവരെ നീളുന്ന പ്രതിഷേധ പ്രകടനമാണ് പാർട്ടി ലക്ഷ്യമിടുന്നത്. മുൻപ് സുധാകരനെ പ്രകോപിപ്പിക്കേണ്ട എന്ന നിലപാടിലായിരുന്നു പാർട്ടി നേതൃത്വം. എന്നാൽ അദ്ദേഹം പരസ്യമായി പാർട്ടിക്കെതിരെ രംഗത്തുവരികയും തിരഞ്ഞെടുപ്പിൽ സ്ഥാനാർത്ഥിയാകുമെന്ന് പ്രഖ്യാപിക്കുകയും ചെയ്തതോടെ നിലപാട് മാറ്റാൻ സിപിഎം നിർബന്ധിതരായി. പാർട്ടി അംഗങ്ങളിൽ ഒരാൾ പോലും സുധാകരനൊപ്പം പോകുന്നില്ലെന്ന് ഉറപ്പുവരുത്താൻ ലോക്കൽ, ഏരിയ കമ്മിറ്റികൾക്ക് പ്രത്യേക നിർദ്ദേശം നൽകിയിട്ടുണ്ട്.

'വർഗ്ഗവഞ്ചകൻ' വിളികളുമായി പ്രതിഷേധം

സുധാകരനെതിരെ അതിരൂക്ഷമായ വിമർശനങ്ങളാണ് അണികളിൽ നിന്നും ഉയരുന്നത്. അദ്ദേഹത്തിന്റെ വാർത്താസമ്മേളനത്തിന് പിന്നാലെ അമ്പലപ്പുഴയിലെ വിവിധ ഇടങ്ങളിൽ സുധാകരനെ 'വർഗ്ഗവഞ്ചകൻ' എന്ന് വിശേഷിപ്പിക്കുന്ന പോസ്റ്ററുകൾ പ്രത്യക്ഷപ്പെട്ടു. സുധാകരന്റെ ജന്മനാടായ താമരക്കുളത്ത് ജില്ലാ സെക്രട്ടേറിയറ്റ് അംഗം കെ. രാഘവന്റെ നേതൃത്വത്തിൽ പ്രതിഷേധ പ്രകടനം നടന്നു. ജി. ഭുവനേശ്വരന്റെ രക്തസാക്ഷി മണ്ഡപത്തിൽ ഒത്തുചേർന്ന പ്രവർത്തകർ സുധാകരനെതിരെ രൂക്ഷമായ മുദ്രാവാക്യങ്ങളാണ് ഉയർത്തിയത്.

അണികളെ ഒപ്പം നിർത്താൻ ജാഗ്രത

ജില്ലയിലെ ഭൂരിഭാഗം ലോക്കൽ, ഏരിയ കമ്മിറ്റികളും അടിയന്തര യോഗങ്ങൾ ചേർന്ന് സാഹചര്യം വിലയിരുത്തിക്കഴിഞ്ഞു. സുധാകരന്റെ നീക്കം തിരഞ്ഞെടുപ്പിൽ പാർട്ടിയുടെ വോട്ട് ബാങ്കിനെ ബാധിക്കാതിരിക്കാൻ താഴെത്തട്ടിലുള്ള അണികളോട് കാര്യങ്ങൾ വിശദീകരിക്കാൻ നേതൃത്വം നിർദ്ദേശിച്ചു. സോഷ്യൽ മീഡിയ വഴിയും സുധാകരനെതിരെയുള്ള പ്രചാരണം ശക്തമാക്കിയിട്ടുണ്ട്. സുധാകരന്റെ നീക്കം ദൗർഭാഗ്യകരമാണെന്ന് എം.എ. ബേബി, സജി ചെറിയാൻ തുടങ്ങിയ മുതിർന്ന നേതാക്കളും പ്രതികരിച്ചിട്ടുണ്ട്.

തിരഞ്ഞെടുപ്പ് ഗോദയിൽ സുധാകരൻ സ്വതന്ത്രനായി ഇറങ്ങുന്നത് അമ്പലപ്പുഴയിൽ സിപിഎമ്മിന് വലിയ തലവേദനയാണ് സൃഷ്ടിക്കുന്നത്. എന്നാൽ അച്ചടക്കമുള്ള പാർട്ടി പ്രവർത്തകർ ഒറ്റക്കെട്ടായി നിൽക്കുമെന്ന വിശ്വാസത്തിലാണ് നേതൃത്വം. നാളത്തെ ശക്തിപ്രകടനം ജില്ലയിലെ പാർട്ടി സംവിധാനത്തിന്റെ കരുത്ത് തെളിയിക്കാനുള്ള വേദി കൂടിയാക്കി മാറ്റാനാണ് സിപിഎം ശ്രമിക്കുന്നത്._

---------------

Hindusthan Samachar / Roshith K