Thiruvanathapuram, 13 മാര്‍ച്ച് (H.S.)

തിരുവനന്തപുരം: ഇലക്ട്രിക് പോസ്റ്റുകളിലൂടെ അനധികൃതമായി വലിച്ചിരിക്കുന്ന കേബിളുകൾ നീക്കം ചെയ്ത് സുരക്ഷ ഉറപ്പാക്കാൻ എല്ലാ സെക്ഷൻ അധികാരികൾക്കും നിർദ്ദേശം നൽകിയിട്ടുള്ളതായി കെ എസ് ഇ ബി ഡയറക്ടർ മനുഷ്യാവകാശ കമ്മീഷനെ അറിയിച്ചു.

പോസ്റ്റിലൂടെ വലിച്ചിരിക്കുന്ന കേബിളുകൾ ഇരുചക്രവാഹനങ്ങൾ ഓടിക്കുന്നവർക്കും കാൽനട യാത്രക്കാർക്കും ഭീഷണിയാവുന്നുവെന്ന പരാതിയിൽ കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസ് ആവശ്യപ്പെട്ട റിപ്പോർട്ടിലാണ് കെ എസ് ഇ ബി വിശദീകരണം സമർപ്പിച്ചത്.

അനധികൃതമായി സ്ഥാപിച്ചിരിക്കുന്ന കേബിളുകൾ നീക്കാൻ പ്രത്യേക ഡ്രൈവ് നടത്തുമെന്ന് റിപ്പോർട്ടിൽ പറഞ്ഞു. സുരക്ഷാ മാനദണ്ഡങ്ങൾ പാലിച്ചുമാത്രമേ കെ എസ് ഇ ബി പോസ്റ്റുകളിൽ കൂടി കേബിളുകൾ വലിക്കാൻ പാടുള്ളുവെന്ന് കേബിൾ ടി.വി. ഓപ്പറേറ്റർമാർക്ക് കർശന നിർദ്ദേശം നൽകിയിട്ടുണ്ടെന്നും റിപ്പോർട്ടിൽ പറഞ്ഞു. മുഴുവൻ കേബിൾ ടി.വി. നെറ്റ് വർക്ക് കേബിളുകളും ടാഗ് ചെയ്യാനും ഉപയോഗ ശൂന്യമായവ നീക്കം ചെയ്യാനും നടപടിയെടുത്തതായി റിപ്പോർട്ടിലുണ്ട്. പുതുകുളങ്ങര സ്വദേശി ജോണി ഏലിയാപുരം സമർപ്പിച്ച പരാതിയിലാണ് നടപടി.

---------------

Hindusthan Samachar / Sreejith S