Kannur, 14 മാര്ച്ച് (H.S.)

കണ്ണൂർ: മലബാറിലെ ട്രെയിൻ യാത്രക്കാരുടെ കാലങ്ങളായുള്ള കാത്തിരിപ്പിന് വിരാമം. മംഗളൂരു വഴി സർവീസ് നടത്തുന്ന കണ്ണൂർ – കെഎസ്ആർ ബെംഗളൂരു സിറ്റി എക്സ്പ്രസ് (16511/16512) കോഴിക്കോട്ടേക്ക് നീട്ടാൻ റെയിൽവേ തീരുമാനിച്ചു. ഇതോടെ കോഴിക്കോട് നിന്നു ബെംഗളൂരുവിലേക്കുള്ള യാത്രക്കാർക്ക് പുതിയൊരു യാത്രാമാർഗ്ഗം കൂടി ലഭ്യമാകും. മാർച്ച് 15 മുതൽ പുതിയ മാറ്റങ്ങൾ നിലവിൽ വരുമെന്ന് ദക്ഷിണ-പശ്ചിമ റെയിൽവേ അറിയിച്ചു.

പുതിയ സമയക്രമം

ബെംഗളൂരുവിൽ നിന്നും കണ്ണൂരിലേക്കുള്ള നിലവിലെ സമയക്രമത്തിൽ മാറ്റമില്ല. രാവിലെ 10.55-ന് കണ്ണൂരിലെത്തുന്ന 16511 നമ്പർ ട്രെയിൻ, 11 മണിയോടെ കോഴിക്കോട്ടേക്ക് യാത്ര തിരിക്കും. യാത്രക്കാർക്ക് ഉപകാരപ്രദമാകുന്ന രീതിയിൽ പ്രധാന സ്റ്റേഷനുകളിൽ സ്റ്റോപ്പുകൾ അനുവദിച്ചിട്ടുണ്ട്:

-

തലശ്ശേരി: 11.20 AM

-

വടകര: 11.41 AM

-

കൊയിലാണ്ടി: 11.58 AM

-

കോഴിക്കോട് എത്തിച്ചേരുന്ന സമയം: 12.30 PM (ഏകദേശം)

തിരിച്ച് കോഴിക്കോട് നിന്നു പുറപ്പെടുന്ന 16512 നമ്പർ ട്രെയിനിന്റെ സമയം താഴെ പറയുന്ന പ്രകാരമാണ്:

-

കോഴിക്കോട് പുറപ്പെടുന്നത്: 3.30 PM

-

കൊയിലാണ്ടി: 3.52 PM

-

വടകര: 4.12 PM

-

തലശ്ശേരി: 4.34 PM

-

കണ്ണൂർ എത്തിച്ചേരുന്നത്: 5.00 PM

കണ്ണൂരിൽ എത്തിയ ശേഷം വൈകിട്ട് ബെംഗളൂരുവിലേക്കുള്ള നിലവിലെ സമയക്രമത്തിൽ മാറ്റമില്ലാതെ ട്രെയിൻ യാത്ര തുടരും.

യാത്രക്കാർക്ക് ഇരട്ടി മധുരം

ബെംഗളൂരു യാത്രക്കാർക്ക് പുറമെ, കണ്ണൂർ – കോഴിക്കോട് റൂട്ടിൽ പകൽ സമയത്ത് യാത്ര ചെയ്യുന്നവർക്കും ഈ തീരുമാനം വലിയ അനുഗ്രഹമാകും. നിലവിൽ രാവിലെ 11-ന് കണ്ണൂരിലെത്തുന്ന ട്രെയിൻ വൈകിട്ട് 5 വരെ യാതൊരു ഉപയോഗവുമില്ലാതെ സ്റ്റേഷനിൽ നിർത്തിയിടുകയായിരുന്നു പതിവ്. ഈ സമയം പ്രയോജനപ്പെടുത്തി കോഴിക്കോട്ടേക്ക് സർവീസ് നടത്തുന്നതിലൂടെ കണ്ണൂർ-കോഴിക്കോട് റൂട്ടിലെ യാത്രാത്തിരക്ക് ഗണ്യമായി കുറയ്ക്കാൻ സാധിക്കും. ഫലത്തിൽ രണ്ട് പുതിയ പകൽ ട്രെയിനുകളുടെ ഗുണമാണ് യാത്രക്കാർക്ക് ലഭിക്കുന്നത്.

ബെംഗളൂരുവിൽ നിന്നുള്ള സർവീസ് മാർച്ച് 15-നും, കോഴിക്കോട് നിന്നുള്ള മടക്കയാത്ര മാർച്ച് 16-നും ആരംഭിക്കും. ട്രെയിനിലെ കോച്ചുകളുടെ എണ്ണത്തിലോ മറ്റ് സൗകര്യങ്ങളിലോ മാറ്റമുണ്ടാകില്ല.

പ്രതീക്ഷയോടെ മലബാർ

നേരത്തെയും ട്രെയിൻ നീട്ടുന്നതുമായി ബന്ധപ്പെട്ട് പലതവണ റെയിൽവേ ആലോചനകൾ നടത്തിയിരുന്നുവെങ്കിലും പ്രായോഗിക തടസ്സങ്ങൾ മൂലം നീണ്ടുപോവുകയായിരുന്നു. യാത്രക്കാരുടെ സംഘടനകളുടെയും ജനപ്രതിനിധികളുടെയും നിരന്തരമായ ഇടപെടലുകളെത്തുടർന്നാണ് ഇപ്പോൾ റെയിൽവേ അന്തിമ തീരുമാനം എടുത്തിരിക്കുന്നത്. ഈ നീക്കം ട്രെയിനിലെ ടിക്കറ്റ് ബുക്കിംഗ് വർദ്ധിപ്പിക്കാനും, ബെംഗളൂരു യാത്രക്കാർക്ക് സ്വകാര്യ ബസ്സുകളെ ആശ്രയിക്കുന്നത് കുറയ്ക്കാനും സഹായിക്കും. മലബാറിലെ റെയിൽവേ വികസനത്തിന് പുതിയൊരു ഊർജ്ജം പകരുന്നതാണ് ഈ തീരുമാനം.

---------------

Hindusthan Samachar / Roshith K