Malappuram , 15 മാര്ച്ച് (H.S.)

മലപ്പുറം: 2026-ലെ കേരള നിയമസഭാ തിരഞ്ഞെടുപ്പിനുള്ള സീറ്റ് വിഭജന ചർച്ചകൾ യുഡിഎഫ് പാളയത്തിൽ പൂർത്തിയായി. പതിവ് സീറ്റുകൾക്ക് പുറമെ അധികമായി രണ്ട് സീറ്റുകൾ കൂടി നേടിയെടുക്കുന്നതിൽ മുസ്ലിം ലീഗ് വിജയിച്ചതായാണ് വിവരം. ഇതോടെ ഇത്തവണ 27 മണ്ഡലങ്ങളിലാകും ലീഗ് സ്ഥാനാർത്ഥികൾ ജനവിധി തേടുക. പാണക്കാട് സാദിഖലി ശിഹാബ് തങ്ങൾ വൈകാതെ ഔദ്യോഗിക സ്ഥാനാർത്ഥി പട്ടിക പ്രഖ്യാപിക്കും.

പുതുമുഖങ്ങൾക്ക് മുൻഗണന

സ്ഥാനാർത്ഥി പട്ടികയിൽ ഇത്തവണ വൻ മാറ്റങ്ങൾക്കാണ് സാധ്യത കൽപ്പിക്കപ്പെടുന്നത്. പത്തോളം പുതുമുഖങ്ങൾ പട്ടികയിൽ ഇടംപിടിച്ചേക്കും. എംഎസ്എഫ് സംസ്ഥാന പ്രസിഡന്റ് പി.കെ. നവാസ് ഉൾപ്പെടെയുള്ള യുവനേതാക്കൾ ഇത്തവണ സജീവ പരിഗണനയിലുണ്ട്. ഇതിനു പുറമെ യൂത്ത് ലീഗ് ദേശീയ ജനറൽ സെക്രട്ടറി ടി.പി. അഷ്റഫലി, ഓർഗനൈസിംഗ് സെക്രട്ടറി ഷിബു മീരാൻ തുടങ്ങിയവരും പട്ടികയിൽ ഇടംപിടിക്കുമെന്നാണ് സൂചന.

വനിതാ പ്രാതിനിധ്യം

കഴിഞ്ഞ തവണ കോഴിക്കോട് സൗത്തിൽ വനിതാ സ്ഥാനാർത്ഥിയെ നിർത്തി ലീഗ് ചരിത്രം കുറിച്ചിരുന്നു. ഇത്തവണയും വനിതാ പ്രാതിനിധ്യം ഉറപ്പാക്കാൻ പാർട്ടി തീരുമാനിച്ചിട്ടുണ്ട്. സുഹ്റ മമ്പാട്, ജയന്തി രാജൻ തുടങ്ങിയ മുതിർന്ന വനിതാ നേതാക്കളുടെ പേരുകളാണ് പ്രധാനമായും ചർച്ച ചെയ്യപ്പെടുന്നത്. കോഴിക്കോട് സൗത്ത്, കുന്ദമംഗലം തുടങ്ങിയ സീറ്റുകളിൽ ഇത്തവണ അപ്രതീക്ഷിത സ്ഥാനാർത്ഥികൾ എത്തിയേക്കാം.

മുതിർന്ന നേതാക്കൾക്ക് ഇളവ്

മൂന്ന് ടേം പൂർത്തിയാക്കിയവർക്ക് ഇത്തവണ ഇളവ് നൽകേണ്ടതില്ലെന്ന തദ്ദേശ തിരഞ്ഞെടുപ്പിലെ കർശന നിലപാട് നിയമസഭയിൽ ചില പ്രധാന നേതാക്കൾക്കായി മാറ്റിയേക്കും. പി.കെ. കുഞ്ഞാലിക്കുട്ടി, എം.കെ. മുനീർ, പി.കെ. ബഷീർ, മഞ്ഞളാംകുഴി അലി, എൻ. ഷംസുദ്ദീൻ തുടങ്ങിയ മുതിർന്ന നേതാക്കൾക്ക് പ്രവർത്തന മികവിന്റെ അടിസ്ഥാനത്തിൽ വീണ്ടും മത്സരിക്കാൻ അനുമതി നൽകാനാണ് പാർട്ടിയിലെ ധാരണ.

മുന്നണിയിലെ സീറ്റ് മാറ്റങ്ങൾ

യുഡിഎഫിലെ വിജയസാധ്യത വർധിപ്പിക്കുന്നതിനായി കോൺഗ്രസും മുസ്ലിം ലീഗും ചില സീറ്റുകൾ പരസ്പരം വച്ചുമാറുന്നതിനെക്കുറിച്ച് ചർച്ചകൾ നടത്തിയിരുന്നു. മലപ്പുറം ജില്ലയിലെ ചില മണ്ഡലങ്ങളിൽ കോൺഗ്രസ് പ്രത്യേക താൽപ്പര്യം പ്രകടിപ്പിച്ചിരുന്നെങ്കിലും ലീഗ് തങ്ങളുടെ കോട്ടകളിൽ വിട്ടുവീഴ്ചയ്ക്ക് തയ്യാറായിട്ടില്ല. എന്നാൽ മധ്യകേരളത്തിലെയും വടക്കൻ കേരളത്തിലെയും രണ്ടോ മൂന്നോ മണ്ഡലങ്ങളിൽ സീറ്റ് വെച്ചുമാറ്റം ഉണ്ടായേക്കുമെന്ന് റിപ്പോർട്ടുകൾ സൂചിപ്പിക്കുന്നു.

തിരഞ്ഞെടുപ്പ് കമ്മീഷൻ ഇന്ന് തിരഞ്ഞെടുപ്പ് തീയതികൾ പ്രഖ്യാപിക്കുന്നതോടെ കേരളം പൂർണ്ണമായും രാഷ്ട്രീയ പോരാട്ടത്തിലേക്ക് നീങ്ങും. വരും മണിക്കൂറുകളിൽ തന്നെ പാണക്കാട് നിന്ന് ലീഗ് സ്ഥാനാർത്ഥികളുടെ അന്തിമ പട്ടിക പുറത്തുവരും.

---------------

Hindusthan Samachar / Roshith K