Mumbai, 16 മാര്ച്ച് (H.S.)

മുംബൈ: ടി20 ലോകകപ്പിൽ സഞ്ജു സാംസണെ പ്ലേയിങ് ഇലവനിലേക്ക് തിരികെ കൊണ്ടുവന്നതിന് പിന്നിലെ യഥാർത്ഥ കാരണം വെളിപ്പെടുത്തി ഇന്ത്യൻ ഹെഡ് കോച്ച് ഗൗതം ഗംഭീർ. പലരും കരുതുന്നത് പോലെ ഇടംകൈ-വലംകൈ കോമ്പിനേഷന് വേണ്ടിയല്ല സഞ്ജുവിനെ ഉൾപ്പെടുത്തിയത്, മറിച്ച് പവർപ്ലേ ഓവറുകളിൽ കൂടുതൽ സ്ഫോടനാത്മകമായ ബാറ്റിംഗ് (Explosive Batting) കാഴ്ചവെക്കുക എന്നതായിരുന്നു ലക്ഷ്യമെന്ന് ഗംഭീർ വ്യക്തമാക്കി.

പവർപ്ലേയിലെ കരുത്ത്

ആദ്യ ആറ് ഓവറുകളിൽ തന്നെ കളി എതിരാളികളിൽ നിന്ന് തട്ടിയെടുക്കാൻ സഞ്ജുവിന് പ്രത്യേക കഴിവുണ്ടെന്ന് ഗംഭീർ അഭിപ്രായപ്പെട്ടു. സഞ്ജുവിന്റെ കഴിവിനെക്കുറിച്ചോ ആക്രമണ ശൈലിയെക്കുറിച്ചോ ഞങ്ങൾക്ക് ഒരിക്കലും സംശയമില്ലായിരുന്നു. അദ്ദേഹം ഫോമിലാണെങ്കിൽ ആദ്യ ആറ് ഓവറിനുള്ളിൽ തന്നെ മത്സരത്തിന്റെ ഫലം തീരുമാനിക്കാൻ അദ്ദേഹത്തിന് സാധിക്കും, ഗംഭീർ പറഞ്ഞു. ന്യൂസിലൻഡിനെതിരായ ലോകകപ്പ് ഫൈനലിൽ സഞ്ജുവും അഭിഷേക് ശർമ്മയും ചേർന്ന് പവർപ്ലേയിൽ അടിച്ചുകൂട്ടിയ 92 റൺസ് ഇതിന് ഉദാഹരണമായി അദ്ദേഹം ചൂണ്ടിക്കാട്ടി.

മാറുന്ന ഇന്ത്യൻ ശൈലി

കഴിഞ്ഞ ഒന്നര വർഷമായി ഇന്ത്യൻ ടീം പിന്തുടരുന്ന അഗ്രസീവ് ബാറ്റിംഗ് ശൈലിയുടെ ഭാഗമായാണ് സഞ്ജുവിന്റെ കടന്നുവരവ്. ടോപ്പ് ഓർഡറിൽ അഭിഷേക് ശർമ്മ, ഇഷാൻ കിഷൻ, സഞ്ജു സാംസൺ എന്നിവർ ഒന്നിക്കുമ്പോൾ അത് ലോകത്തിലെ തന്നെ ഏറ്റവും അപകടകരമായ ബാറ്റിംഗ് നിരയായി മാറുന്നുവെന്നും ഇതിന് പിന്നാലെ സൂര്യകുമാർ യാദവ്, ഹാർദിക് പാണ്ഡ്യ, തിലക് വർമ്മ തുടങ്ങിയവർ എത്തുന്നതോടെ ബാറ്റിംഗ് കരുത്ത് ഇരട്ടിക്കുമെന്നും അദ്ദേഹം കൂട്ടിച്ചേർത്തു.

ജിമ്മിലെ ആ സംഭാഷണം

സഞ്ജുവിനെ ടീമിലേക്ക് തിരഞ്ഞെടുത്ത വിവരം താൻ അറിയിച്ചത് ജിമ്മിൽ ഒരുമിച്ച് വർക്കൗട്ട് ചെയ്യുന്ന സമയത്താണെന്ന് ഗംഭീർ വെളിപ്പെടുത്തി. നീ സിംബാബ്വെക്കെതിരായ മത്സരത്തിൽ കളിക്കുന്നുണ്ട് എന്ന് ഞാൻ പറഞ്ഞപ്പോൾ 'വരട്ടെ നോക്കാം' (Let it come) എന്നായിരുന്നു സഞ്ജുവിന്റെ മറുപടി. അത്തരമൊരു പോസിറ്റീവ് മനോഭാവമാണ് സഞ്ജുവിന്റേത്. കോച്ചും കളിക്കാരനും എന്നതിലുപരി ഒരു സുഹൃത്തിനെപ്പോലെയാണ് ഞങ്ങൾ കാര്യങ്ങൾ സംസാരിക്കാറുള്ളത്, ഗംഭീർ ഓർത്തെടുത്തു.

വിമർശനങ്ങൾ കാര്യമാക്കുന്നില്ല

ആദ്യ പന്തിൽ തന്നെ സിക്സർ അടിക്കാൻ തോന്നിയാൽ അത് 100 ശതമാനം ആത്മവിശ്വാസത്തോടെ ചെയ്യാൻ താരങ്ങൾക്ക് താൻ സ്വാതന്ത്ര്യം നൽകിയിട്ടുണ്ടെന്ന് കോച്ച് പറഞ്ഞു. ലോകം എന്ത് കരുതുന്നു എന്നത് തങ്ങളെ ബാധിക്കുന്ന കാര്യമല്ലെന്നും ടീമിന്റെ വിജയം മാത്രമാണ് ലക്ഷ്യമെന്നും അദ്ദേഹം വ്യക്തമാക്കി. സഞ്ജുവിനെപ്പോലുള്ള ഒരു താരം ക്രീസിൽ 20-30 പന്തുകൾ നേരിട്ടാൽ മാത്രമേ അദ്ദേഹത്തിന്റെ യഥാർത്ഥ ഫോം അളക്കാൻ കഴിയൂ എന്നും ഗംഭീർ കൂട്ടിച്ചേർത്തു.

---------------

Hindusthan Samachar / Roshith K