Chennai, 16 മാര്ച്ച് (H.S.)

ചെന്നൈ: പ്രശസ്ത തമിഴ് കവിയും ഗാനരചയിതാവുമായ വൈരമുത്തുവിന് രാജ്യത്തെ പരമോന്നത സാഹിത്യ പുരസ്കാരമായ ജ്ഞാനപീഠം നൽകിയ തീരുമാനത്തെ അതിശക്തമായ ഭാഷയിൽ വിമർശിച്ച് സാഹിത്യകാരൻ ജയമോഹൻ. വൈരമുത്തുവിന് പുരസ്കാരം നൽകിയത് തമിഴ് ആധുനിക സാഹിത്യത്തോടുള്ള കടുത്ത അനീതിയാണെന്നും ജ്ഞാനപീഠം കമ്മിറ്റിയുടെ ഈ നടപടി തമിഴ് സാഹിത്യത്തിന്റെ മുഖത്ത് 'കാർക്കിച്ചു തുപ്പുന്നതിന്' തുല്യമാണെന്നും അദ്ദേഹം പരിഹസിച്ചു. പ്രത്യേക പ്രതികരണത്തിലാണ് ജയമോഹൻ തന്റെ രോഷം പ്രകടിപ്പിച്ചത്.

തമിഴ് സാഹിത്യത്തിന് തിരിച്ചടി

തമിഴ് സാഹിത്യത്തിൽ വൈരമുത്തുവിനേക്കാൾ അർഹരായ നിരവധി എഴുത്തുകാർ ഉണ്ടെന്ന് ജയമോഹൻ ചൂണ്ടിക്കാട്ടി. സിനിമയ്ക്ക് വേണ്ടി പൈങ്കിളി സാഹിത്യം എഴുതുന്ന ഒരാൾക്ക് ജ്ഞാനപീഠം നൽകുന്നത് പുരസ്കാരത്തിന്റെ തന്നെ മൂല്യം കളയുന്നതാണ്. 1975-ൽ അഖിലന് ജ്ഞാനപീഠം നൽകിയപ്പോഴും തമിഴ് സാഹിത്യത്തിന്റെ അന്തസ്സ് ഇടിഞ്ഞിരുന്നുവെന്നും, പിന്നീട് ജയകാന്തൻ പുരസ്കാരം നേടിയപ്പോഴാണ് ആ ചിത്രം മാറിയതെന്നും അദ്ദേഹം ഓർമ്മിപ്പിച്ചു. തമിഴ് ആധുനിക സാഹിത്യം ഇന്ന് ലോകമെമ്പാടും ചർച്ച ചെയ്യപ്പെടുമ്പോൾ, അവാർഡ് കമ്മിറ്റി ഇത്തരം തീരുമാനങ്ങളിലൂടെ തമിഴ് എഴുത്തുകാരെ പുച്ഛിക്കുകയാണെന്നും അദ്ദേഹം പറഞ്ഞു.

#MeToo ആരോപണങ്ങളും ജൂറിയിലെ മലയാളിയും

വൈരമുത്തുവിനെതിരെയുള്ള മീ ടൂ (#MeToo) ആരോപണങ്ങളും ജയമോഹൻ തന്റെ വിമർശനത്തിൽ പരാമർശിച്ചു. ലൈംഗികാരോപണം നേരിടുന്ന ഒരാൾക്ക് ഇത്തരമൊരു ബഹുമതി നൽകുന്നത് പെൺകുട്ടികളുടെ രോഷത്തിന് കാരണമാകുന്നു. അവാർഡ് ജൂറിയിൽ ഒരു മലയാളി കൂടി ഉണ്ടെന്നതിൽ താൻ ഒരു മലയാളിയെന്ന നിലയിൽ അത്യന്തം ലജ്ജിക്കുന്നുവെന്നും ജയമോഹൻ പറഞ്ഞു. അവാർഡ് നൽകിയ ജ്ഞാനപീഠ കമ്മിറ്റിയെ താൻ പുച്ഛിക്കുന്നുവെന്നും അദ്ദേഹം കൂട്ടിച്ചേർത്തു.

ഒരു കോടി രൂപയുടെ പുതിയ പുരസ്കാരം

ജ്ഞാനപീഠത്തോടുള്ള പ്രതിഷേധസൂചകമായി ലോക സാഹിത്യത്തിനായി പുതിയൊരു പുരസ്കാരം ജയമോഹൻ പ്രഖ്യാപിച്ചു. 'ലിവിങ് തമിഴ് അവാർഡ് ഫോർ വേൾഡ് ലിറ്ററേച്ചർ' (LIVING TAMIL AWARD FOR WORLD LITERATURE) എന്നാണ് പുരസ്കാരത്തിന്റെ പേര്. ഈ വർഷം മുതൽ നൽകിത്തുടങ്ങുന്ന ഈ അവാർഡിന്റെ സമ്മാനത്തുക ഒരു കോടി രൂപയായിരിക്കും. തമിഴ് സാഹിത്യകാരന്മാർ ഇനി ജ്ഞാനപീഠം സ്വീകരിക്കേണ്ടതില്ലെന്നും ലോകഭാഷകളിലെ ഏറ്റവും മികച്ച സാഹിത്യ സംഭാവനകൾക്ക് തമിഴ് സാഹിത്യ ലോകം തന്നെ വലിയ ആദരവ് നൽകുമെന്നും അദ്ദേഹം പ്രഖ്യാപിച്ചു.

വൈരമുത്തുവിന് അഭിനന്ദന പ്രവാഹങ്ങൾക്കിടയിലും ജയമോഹനെപ്പോലെയുള്ള ഉന്നതരായ എഴുത്തുകാരുടെ ഭാഗത്തുനിന്നുണ്ടായ ഈ വിമർശനം ദേശീയ തലത്തിൽ തന്നെ വലിയ ചർച്ചകൾക്ക് വഴിമാറുകയാണ്. ചിന്മയി ശ്രീപാദ ഉൾപ്പെടെയുള്ളവരും പുരസ്കാര പ്രഖ്യാപനത്തിനെതിരെ പ്രതിഷേധവുമായി രംഗത്തെത്തിയിട്ടുണ്ട്. തമിഴ് സാഹിത്യ ലോകത്ത് വലിയൊരു വിഭാഗീയതയ്ക്ക് ഈ സംഭവം കാരണമായിരിക്കുകയാണ്.

---------------

Hindusthan Samachar / Roshith K