Kottayam, 17 മാര്ച്ച് (H.S.)

കോട്ടയം: വരാനിരിക്കുന്ന നിയമസഭാ തിരഞ്ഞെടുപ്പിനുള്ള കേരള കോണ്ഗ്രസ് (ജോസഫ്) വിഭാഗത്തിന്റെ സ്ഥാനാര്ത്ഥി പട്ടിക ഇന്ന് ഔദ്യോഗികമായി പ്രഖ്യാപിക്കും. യുഡിഎഫില് കേരള കോണ്ഗ്രസ് ജോസഫ് ഗ്രൂപ്പ് മത്സരിക്കുന്ന എട്ട് സീറ്റുകളിലെ സ്ഥാനാര്ത്ഥികളെ സംബന്ധിച്ച് ഏകദേശ ധാരണയായതായാണ് റിപ്പോര്ട്ടുകള്. വൈകുന്നേരം കോട്ടയത്ത് വെച്ച് പാര്ട്ടി ചെയര്മാന് പി.ജെ. ജോസഫ് നേരിട്ടായിരിക്കും സ്ഥാനാര്ത്ഥികളെ പ്രഖ്യാപിക്കുക.

പുതുമുഖമായി അപു ജോണ് ജോസഫ്

ഏറ്റവും ശ്രദ്ധേയമായ മാറ്റം തൊടുപുഴ മണ്ഡലത്തിലാണ്. വര്ഷങ്ങളായി പി.ജെ. ജോസഫ് കുത്തകയാക്കി വെച്ചിരിക്കുന്ന തൊടുപുഴയില് ഇത്തവണ അദ്ദേഹം മാറിനില്ക്കുമെന്നാണ് സൂചന. പകരം മകന് അപു ജോണ് ജോസഫ് സ്ഥാനാര്ത്ഥിയായേക്കും. അപുവിന്റെ കന്നി തിരഞ്ഞെടുപ്പ് പോരാട്ടമായിരിക്കും ഇത്. കടുത്തുരുത്തിയില് മുതിര്ന്ന നേതാവ് മോന്സ് ജോസഫ് തന്നെ ജനവിധി തേടും.

മറ്റ് മണ്ഡലങ്ങളിലെ സാധ്യത പട്ടിക

മറ്റു മണ്ഡലങ്ങളിലെ സ്ഥാനാര്ത്ഥികളെ സംബന്ധിച്ചും പാര്ട്ടി ഏകദേശ ധാരണയില് എത്തിയിട്ടുണ്ട്.

-

കോതമംഗലം: ഷിബു തെക്കുംപുറം

-

ഇരിങ്ങാലക്കുട: തോമസ് ഉണ്ണിയാടന്

-

കുട്ടനാട്: റെജി ചെറിയാന്

-

തൃക്കരിപ്പൂര്: ജെറ്റോ ജോസഫ്

-

ചങ്ങനാശേരി: വിനു ജോബ്, വി.ജെ. ലാലി എന്നിവരുടെ പേരുകളാണ് പരിഗണനയിലുള്ളത്.

-

തിരുവല്ല: വര്ഗീസ് മാമന് അല്ലെങ്കില് ജോസഫ് എം. പുതുശേരി എന്നിവരില് ഒരാള്ക്ക് സാധ്യത കല്പ്പിക്കുന്നു.

യുഡിഎഫിലെ നീക്കങ്ങള്

അതേസമയം, യുഡിഎഫിലെ മറ്റ് ഘടകകക്ഷികളും സ്ഥാനാര്ത്ഥി നിര്ണ്ണയത്തിന്റെ അവസാന ഘട്ടത്തിലാണ്. മുസ്ലീം ലീഗ് അധ്യക്ഷന് പാണക്കാട് സാദിഖലി ശിഹാബ് തങ്ങളുടെ നേതൃത്വത്തില് ജില്ലാ ഭാരവാഹികളുമായുള്ള ചര്ച്ചകള് തുടരുകയാണ്. മലപ്പുറം ലോക്സഭാ മണ്ഡലത്തിലേക്ക് പി.കെ. കുഞ്ഞാലിക്കുട്ടി മാറുമ്പോള് വെങ്ങരയില് കെ.എം. ഷാജിയെ മത്സരിപ്പിക്കണമെന്ന ആവശ്യം ലീഗില് ശക്തമാണ്. കൂടാതെ തിരുവമ്പാടി സീറ്റ് കോണ്ഗ്രസിന് നല്കി പകരം തവനൂര് ലീഗ് ഏറ്റെടുക്കാനും ധാരണയായിട്ടുണ്ട്.

സ്ഥാനാര്ത്ഥി നിര്ണ്ണയത്തില് കോണ്ഗ്രസും അവസാനവട്ട ചര്ച്ചകളിലാണ്. കെ.പി.സി.സി അധ്യക്ഷന് കെ. സുധാകരന്റെ സ്ഥാനാര്ത്ഥിത്വത്തെ സംബന്ധിച്ച അനിശ്ചിതത്വം നിലനില്ക്കുന്നുണ്ടെങ്കിലും ആദ്യഘട്ട പട്ടിക ഉടന് പുറത്തുവരുമെന്നാണ് പ്രതീക്ഷിക്കുന്നത്.

എല്ഡിഎഫും എന്ഡിഎയും ഇതിനോടകം സ്ഥാനാര്ത്ഥികളെ പ്രഖ്യാപിച്ച് മണ്ഡലങ്ങളില് പ്രചാരണം ആരംഭിച്ചു കഴിഞ്ഞു. സ്ഥാനാര്ത്ഥികള് റോഡ് ഷോകളും പ്രമുഖ വ്യക്തികളെ നേരിട്ട് കാണുന്ന തിരക്കിലുമാണ്. യുഡിഎഫ് സ്ഥാനാര്ത്ഥി പട്ടിക കൂടി പുറത്തുവരുന്നതോടെ സംസ്ഥാനത്ത് തിരഞ്ഞെടുപ്പ് ആവേശം കൊടുമുടിയിലെത്തും.

---------------

Hindusthan Samachar / Roshith K