Malappuram, 17 മാര്ച്ച് (H.S.)

മലപ്പുറം: 2026-ലെ കേരള നിയമസഭാ തിരഞ്ഞെടുപ്പിനുള്ള ഒരുക്കങ്ങൾ അന്തിമഘട്ടത്തിലേക്ക് കടക്കവെ, യുഡിഎഫിലെ സീറ്റ് വിഭജന ചർച്ചകളിൽ നിർണ്ണായക വഴിത്തിരിവ്. ഏറെ തർക്കങ്ങൾ നിലനിന്നിരുന്ന തിരുവമ്പാടി മണ്ഡലം വിട്ടുനൽകില്ലെന്ന് മുസ്ലിം ലീഗ് വ്യക്തമാക്കിയതോടെ, തങ്ങളുടെ സ്ഥാനാർത്ഥി പട്ടിക പ്രഖ്യാപിക്കാൻ പാർട്ടി ഒരുങ്ങുകയാണ്. കൂടുതൽ വനിതകൾക്കും പുതുമുഖങ്ങൾക്കും പ്രാധാന്യം നൽകുന്ന ഒരു 'സർപ്രൈസ്' പട്ടികയാകും ലീഗ് പുറത്തിറക്കുക എന്നാണ് റിപ്പോർട്ടുകൾ.

തിരുവമ്പാടിയിൽ ഉറച്ച് ലീഗ്

കോൺഗ്രസുമായി നടത്തിയ നീണ്ട ചർച്ചകൾക്കൊടുവിലും തിരുവമ്പാടി സീറ്റിന്റെ കാര്യത്തിൽ ധാരണയാവാത്തതാണ് ലീഗിനെ സ്വന്തം നിലയ്ക്ക് മുന്നോട്ട് പോകാൻ പ്രേരിപ്പിച്ചത്. തിരുവമ്പാടിക്ക് പകരമായി ലീഗ് ആവശ്യപ്പെട്ട തവനൂർ മണ്ഡലം വിട്ടുനൽകാൻ കോൺഗ്രസിലെ പ്രാദേശിക നേതൃത്വം കടുത്ത എതിർപ്പ് പ്രകടിപ്പിച്ചിരുന്നു. തിരുവമ്പാടി സീറ്റ് കോൺഗ്രസിന് ലഭിച്ചാൽ മലപ്പുറം ഡിസിസി പ്രസിഡന്റ് വി.എസ്. ജോയിയെ അവിടെ മത്സരിപ്പിക്കാനായിരുന്നു കെപിസിസിയുടെ ആലോചന. എന്നാൽ സീറ്റ് വച്ചുമാറുന്നതിനോട് പ്രാദേശിക ലീഗ് നേതൃത്വവും പ്രതിഷേധം അറിയിച്ചതോടെ മുൻ നിശ്ചയപ്രകാരം തിരുവമ്പാടിയിൽ ലീഗ് തന്നെ മത്സരിക്കുമെന്ന് ഉറപ്പായി.

പട്ടികയിലെ വനിതാ കരുത്ത്

ഇത്തവണത്തെ സ്ഥാനാർത്ഥി പട്ടികയിൽ വനിതകൾക്ക് അർഹമായ പ്രാതിനിധ്യം നൽകണമെന്ന നിലപാടിലാണ് പാണക്കാട് സാദിഖലി ശിഹാബ് തങ്ങൾ ഉൾപ്പെടെയുള്ള മുതിർന്ന നേതാക്കൾ. കുറ്റ്യാടിയിൽ ജയന്തി രാജൻ, കുന്നമംഗലത്ത് ഫാത്തിമ തെഹലിയ, ബാലുശ്ശേരിയിൽ എ.പി. സ്മിജി, അഴീക്കോട് ഫരീദ തുടങ്ങിയ പേരുകളാണ് അവസാനവട്ട ചർച്ചകളിലുള്ളത്. വനിതാ ലീഗിന് അർഹമായ പരിഗണന നൽകുന്നതിലൂടെ കൂടുതൽ ജനവിഭാഗങ്ങളിലേക്ക് പാർട്ടി സ്വാധീനം വർദ്ധിപ്പിക്കാനാണ് ലീഗ് ലക്ഷ്യമിടുന്നത്.

പുതുമുഖങ്ങളും വിട്ടുവീഴ്ചകളും

ലീഗ് പരമ്പരാഗതമായി മത്സരിച്ചിരുന്ന പുനലൂരും കോങ്ങാടും കോൺഗ്രസിന് വിട്ടുനൽകാൻ ലീഗ് നേതൃത്വം തയ്യാറായിട്ടുണ്ട്. ഇതിന് പകരമായി ഏത് മണ്ഡലം ലഭിക്കുമെന്ന കാര്യത്തിൽ ഇന്ന് തന്നെ അന്തിമ തീരുമാനമുണ്ടാകും. മൂന്ന് ടേം നിബന്ധനയിൽ ഇളവ് വരുത്തിക്കൊണ്ട് തന്നെ പത്തോളം പുതുമുഖങ്ങളെ ഇത്തവണ ലീഗ് കളത്തിലിറക്കുമെന്നാണ് സൂചന. എംഎസ്എഫ് (MSF) സംസ്ഥാന പ്രസിഡന്റ് പി.കെ. നവാസ് ഉൾപ്പെടെയുള്ള യുവനേതാക്കളും പരിഗണനാ പട്ടികയിലുണ്ട്.

കഴിഞ്ഞ തവണത്തെ അപേക്ഷിച്ച് മികച്ച 'സ്ട്രൈക്ക് റേറ്റ്' ലക്ഷ്യമിട്ടാണ് ലീഗ് കരുക്കൾ നീക്കുന്നത്. ഇടതുമുന്നണി ഇതിനോടകം സ്ഥാനാർത്ഥികളെ പ്രഖ്യാപിച്ച് പ്രചാരണം തുടങ്ങിയ സാഹചര്യത്തിൽ, ഇന്ന് വൈകിട്ടോ നാളെയോ ആയി ലീഗ് തങ്ങളുടെ സ്ഥാനാർത്ഥി പട്ടിക ഔദ്യോഗികമായി പ്രഖ്യാപിക്കുമെന്നാണ് അറിയുന്നത്. യുഡിഎഫിന്റെ വിജയസാധ്യത മാത്രം പരിഗണിച്ചാകും സീറ്റ് വച്ചുമാറലുകൾ ഉൾപ്പെടെയുള്ള അവസാന തീരുമാനങ്ങളെന്ന് പാർട്ടി ജനറൽ സെക്രട്ടറി പി.എം.എ. സലാം വ്യക്തമാക്കി.

---------------

Hindusthan Samachar / Roshith K