Kochi, 02 മാര്ച്ച് (H.S.)

കൊച്ചി: പശ്ചിമേഷ്യയിൽ യുദ്ധസമാനമായ സാഹചര്യം തുടരുന്നതോടെ ആഗോള സാമ്പത്തിക വിപണിയിൽ വൻ പ്രത്യാഘാതങ്ങൾ. ഇറാനും ഇസ്രായേലും തമ്മിലുള്ള സംഘർഷം കടുക്കുന്നത് അന്താരാഷ്ട്ര തലത്തിൽ എണ്ണവിലയിലും സ്വർണ്ണവിലയിലും വൻ വർദ്ധനവിന് കാരണമായി. ക്രൂഡ് ഓയിൽ വിലയിൽ ഒറ്റയടിക്ക് 10 ശതമാനത്തിന്റെ വർദ്ധനവാണ് രേഖപ്പെടുത്തിയിരിക്കുന്നത്. സുരക്ഷിത നിക്ഷേപം എന്ന നിലയിൽ സ്വർണ്ണത്തിലേക്ക് നിക്ഷേപകർ മാറിയതോടെ സ്വർണ്ണവിലയിലും 1.4 ശതമാനം വർദ്ധനവുണ്ടായി.

ഹോർമുസ് കടലിടുക്കിൽ പ്രതിസന്ധി

ലോകത്തിലെ എണ്ണ വിതരണത്തിന്റെ നിർണ്ണായക പാതയായ ഹോർമുസ് കടലിടുക്കിലെ ഗതാഗത തടസ്സമാണ് വിപണിയെ പിടിച്ചുലയ്ക്കുന്നത്. ഹോർമുസ് കടലിടുക്കിലൂടെ പോയ രണ്ട് കപ്പലുകൾ ഇതിനകം ആക്രമിക്കപ്പെട്ടതായി റിപ്പോർട്ടുകളുണ്ട്. ഇതോടെ ഈ പാതയിലൂടെയുള്ള ചരക്ക് നീക്കം ഭീഷണിയിലായി. നിലവിൽ നൂറ്റിയൻപതിലേറെ കപ്പലുകളാണ് എണ്ണയുമായി ഹോർമുസിൽ കാത്തുകിടക്കുന്നത്. പ്രതിദിനം 15 ദശലക്ഷം ബാരൽ ക്രൂഡ് ഓയിൽ കടന്നുപോകുന്ന ഈ പാത അടഞ്ഞാൽ ആഗോള ഊർജ്ജ വിതരണം പൂർണ്ണമായും തകരുമെന്ന് വിദഗ്ധർ മുന്നറിയിപ്പ് നൽകുന്നു.

വിലക്കയറ്റ ഭീഷണിയിൽ വിപണി

സൗദി അറേബ്യ, കുവൈത്ത്, ഇറാഖ്, ഖത്തർ, യുഎഇ തുടങ്ങിയ രാജ്യങ്ങളിൽ നിന്നുള്ള എണ്ണ കയറ്റുമതി തടസ്സപ്പെടുന്നത് ഇന്ത്യയുൾപ്പെടെയുള്ള രാജ്യങ്ങളിൽ വൻ വിലക്കയറ്റത്തിന് വഴിവെക്കും. എണ്ണവില വർദ്ധിക്കുന്നത് ഗതാഗത ചെലവ് കൂട്ടുകയും അത് നിത്യോപയോഗ സാധനങ്ങളുടെ വില വർദ്ധനവിന് കാരണമാവുകയും ചെയ്യും. സ്ഥിതിഗതികൾ ശാന്തമായില്ലെങ്കിൽ ക്രൂഡ് ഓയിൽ വില ഇനിയും ഉയരാനാണ് സാധ്യത. എണ്ണ ഉൽപ്പാദനം വർദ്ധിപ്പിക്കാൻ ഒപെക് പ്ലസ് (OPEC+) രാജ്യങ്ങൾ ആലോചിക്കുന്നുണ്ടെങ്കിലും യുദ്ധ സാഹചര്യം വിതരണ ശൃംഖലയെ ബാധിക്കുന്നത് തടയാൻ ഇത് പര്യാപ്തമാകില്ല.

സ്വർണ്ണം റെക്കോർഡ് ഉയരത്തിലേക്ക്

യുദ്ധം തുടരുമെന്ന സൂചനകൾ പുറത്തുവന്നതോടെ ഓഹരി വിപണിയിൽ നിന്നുള്ള നിക്ഷേപം സ്വർണ്ണത്തിലേക്ക് മാറിക്കൊണ്ടിരിക്കുകയാണ്. നിലവിൽ സ്വർണ്ണവില പുതിയ റെക്കോർഡുകൾ ലക്ഷ്യമാക്കി കുതിക്കുകയാണ്. ആഗോള വിപണിയിലെ ഈ മാറ്റങ്ങൾ കേരളത്തിലെ സ്വർണ്ണ വിപണിയിലും പ്രതിഫലിച്ചു തുടങ്ങിയിട്ടുണ്ട്.

ഗൾഫ് മേഖലയിലെ സംഘർഷം എത്രയും വേഗം അവസാനിച്ചില്ലെങ്കിൽ ലോകം വലിയൊരു സാമ്പത്തിക മാന്ദ്യത്തിലേക്ക് നീങ്ങാൻ സാധ്യതയുണ്ടെന്ന് സാമ്പത്തിക വിദഗ്ധർ നിരീക്ഷിക്കുന്നു. വിപണിയിലെ അസ്ഥിരത കണക്കിലെടുത്ത് നിക്ഷേപകർ ജാഗ്രത പാലിക്കണമെന്നും നിർദ്ദേശമുണ്ട്. യുഎസ്–ഇസ്രായേൽ ആക്രമണത്തിന് ഇറാൻ നൽകുന്ന തിരിച്ചടികൾ വരും ദിവസങ്ങളിൽ വിപണിയുടെ ഗതി നിശ്ചയിക്കുന്നതിൽ നിർണ്ണായകമാകും.

---------------

Hindusthan Samachar / Roshith K