Trivandrum, 20 മാര്ച്ച് (H.S.)

തിരുവനന്തപുരം: നിയമസഭാ തിരഞ്ഞെടുപ്പിൽ മത്സരിക്കുമെന്ന കടുത്ത നിലപാടിൽ നിന്ന് പിന്മാറി മുൻ കെപിസിസി അധ്യക്ഷൻ കെ. സുധാകരൻ. സുധാകരനുമേൽ ചില കേന്ദ്രങ്ങളിൽ നിന്നുണ്ടായ അനാവശ്യ സമ്മർദ്ദമാണ് കഴിഞ്ഞ ദിവസങ്ങളിലെ നാടകീയ നീക്കങ്ങൾക്ക് കാരണമായതെന്നാണ് ഹൈക്കമാൻഡിന്റെ വിലയിരുത്തൽ. സ്വതന്ത്രനായി മത്സരിക്കില്ലെന്നും പാർട്ടി തീരുമാനത്തിനൊപ്പം നിൽക്കുമെന്നുമുള്ള സുധാകരന്റെ പുതിയ തീരുമാനത്തെ കോൺഗ്രസ് കേന്ദ്ര നേതൃത്വം സ്വാഗതം ചെയ്തു.

ഹൈക്കമാൻഡ് വഴങ്ങിയില്ല

എംപിമാർ നിയമസഭയിലേക്ക് മത്സരിക്കേണ്ടതില്ലെന്ന രാഹുൽ ഗാന്ധിയുടെയും മല്ലികാർജ്ജുൻ ഖർഗെയുടെയും കർശന നിലപാടാണ് സുധാകരന് തിരിച്ചടിയായത്. ഡൽഹിയിൽ തങ്ങി സമ്മർദ്ദം ചെലുത്തിയെങ്കിലും ഒരു ഘട്ടത്തിലും വിട്ടുവീഴ്ചയ്ക്ക് കേന്ദ്ര നേതൃത്വം തയ്യാറായില്ല. സുധാകരന് മാത്രമായി ഇളവ് നൽകിയാൽ അത് മറ്റ് എംപിമാരും ആവശ്യപ്പെടുമെന്നും, ഇത് പാർട്ടിയിൽ വലിയ അച്ചടക്ക ലംഘനത്തിന് കാരണമാകുമെന്നും ഖർഗെ സുധാകരനെ നേരിട്ട് ബോധ്യപ്പെടുത്തി. കോന്നിയിൽ അടൂർ പ്രകാശ് മത്സരിച്ചാൽ ജയസാധ്യതയുണ്ടെന്ന സർവേ റിപ്പോർട്ടുകൾ ഉണ്ടായിട്ടും, നയപരമായ തീരുമാനത്തിൽ ഉറച്ചുനിന്നുകൊണ്ട് അദ്ദേഹത്തിന് സീറ്റ് നിഷേധിച്ചിരുന്നു. ഇതേ മാനദണ്ഡം തന്നെയാണ് സുധാകരന്റെ കാര്യത്തിലും ഹൈക്കമാൻഡ് നടപ്പിലാക്കിയത്.

നാടകീയ നീക്കങ്ങൾക്കൊടുവിൽ മടക്കം

ദിവസങ്ങൾ നീണ്ട രാഷ്ട്രീയ അനിശ്ചിതത്വങ്ങൾക്കും തർക്കങ്ങൾക്കുമൊടുവിൽ ഇന്ന് പുലർച്ചെയാണ് സുധാകരൻ നാട്ടിൽ തിരിച്ചെത്തിയത്. മട്ടന്നൂർ വിമാനത്താവളത്തിൽ നൂറുകണക്കിന് പ്രവർത്തകരാണ് അദ്ദേഹത്തെ സ്വീകരിക്കാൻ എത്തിയത്. പാർട്ടിയെ അധികാരത്തിൽ എത്തിക്കുക എന്നതാണ് തന്റെ ലക്ഷ്യമെന്നും അല്ലാതെ വ്യക്തിപരമായ താൽപ്പര്യങ്ങളല്ലെന്നും വിമാനത്താവളത്തിൽ അദ്ദേഹം മാധ്യമങ്ങളോട് പ്രതികരിച്ചു. വി.ഡി സതീശൻ ഉൾപ്പെടെയുള്ള സംസ്ഥാന നേതാക്കളുടെ നിലപാടും, എ.കെ ആന്റണി, കെ.സി വേണുഗോപാൽ, രമേശ് ചെന്നിത്തല തുടങ്ങിയ മുതിർന്ന നേതാക്കളുടെ ഇടപെടലുമാണ് സുധാകരനെ അനുനയിപ്പിക്കുന്നതിൽ പ്രധാന പങ്കുവഹിച്ചത്.

സ്ഥാനാർത്ഥി പട്ടിക പൂർത്തിയായി

സുധാകരന്റെ പിന്മാറ്റത്തോടെ കണ്ണൂർ നിയമസഭാ മണ്ഡലത്തിൽ ടി.ഒ. മോഹനനെ കോൺഗ്രസ് സ്ഥാനാർത്ഥിയായി പ്രഖ്യാപിച്ചു. ഇതോടെ കോൺഗ്രസിന്റെ 37 മണ്ഡലങ്ങളിലെ കൂടി പട്ടിക പുറത്തുവന്നതോടെ സ്ഥാനാർത്ഥി നിർണ്ണയം പൂർത്തിയായി. മറ്റ് പ്രധാന മാറ്റങ്ങൾ ഇവയാണ്:

കൊച്ചി: ദീപ്തി മേരി വർഗ്ഗീസിനെ മാറ്റി ഡിസിസി പ്രസിഡന്റ് മുഹമ്മദ് ഷിയാസിനെ നിശ്ചയിച്ചു.

കോന്നി: അടൂർ പ്രകാശിന് പകരം സതീഷ് കൊച്ചുപറമ്പിൽ ജനവിധി തേടും.

പെരുമ്പാവൂർ: വിവാദങ്ങളിൽപ്പെട്ട എൽദോസ് കുന്നപ്പിള്ളിയെ മാറ്റി മനോജ് മൂത്തേടനെ സ്ഥാനാർത്ഥിയാക്കി.

കൂടാതെ, സിപിഎം വിട്ടുപോന്ന പ്രമുഖ വിമതരായ ജി. സുധാകരൻ (അമ്പലപ്പുഴ), ടി.കെ. ഗോവിന്ദൻ (തളിപ്പറമ്പ്), പി.കെ. ശശി (ഒറ്റപ്പാലം) എന്നിവർക്ക് യുഡിഎഫ് പിന്തുണ നൽകാനും തീരുമാനമായിട്ടുണ്ട്. സുധാകരന്റെ മനംമാറ്റത്തോടെ കോൺഗ്രസിനുള്ളിലെ വലിയൊരു പൊട്ടിത്തെറിയാണ് താൽക്കാലികമായി ഒഴിവായത്. വരും ദിവസങ്ങളിൽ പ്രചാരണ രംഗത്ത് സജീവമാകാനാണ് സുധാകരന്റെ തീരുമാനം.

---------------

Hindusthan Samachar / Roshith K