Kannur, 20 മാര്ച്ച് (H.S.)

കണ്ണൂർ: നിയമസഭാ തിരഞ്ഞെടുപ്പുമായി ബന്ധപ്പെട്ട് കണ്ണൂർ കോൺഗ്രസിലുണ്ടായ അനിശ്ചിതത്വങ്ങൾക്ക് വിരാമമിട്ട്, യുഡിഎഫ് സ്ഥാനാർത്ഥി ടി.ഒ. മോഹനനെ കെ. സുധാകരൻ എംപി സ്വീകരിച്ചു. ഇന്ന് രാവിലെയാണ് കണ്ണൂരിലെ യുഡിഎഫ് സ്ഥാനാർത്ഥിയായ ടി.ഒ. മോഹനൻ സുധാകരനെ സന്ദർശിച്ചത്. സ്ഥാനാർത്ഥിയെ ഷാളണിയിച്ച് സ്വീകരിച്ച സുധാകരൻ, ഞാൻ എന്റെ വാക്ക് പാലിച്ചു എന്ന് അദ്ദേഹത്തോട് പറഞ്ഞു. ഇത് പാർട്ടിക്കുള്ളിലെ ഐക്യത്തിന്റെ സന്ദേശമായാണ് രാഷ്ട്രീയ നിരീക്ഷകർ വിലയിരുത്തുന്നത്.

പ്രചാരണത്തിന് സുധാകരൻ നേതൃത്വം നൽകും

നിയമസഭയിലേക്ക് മത്സരിക്കാനില്ലെന്ന ഹൈക്കമാൻഡ് തീരുമാനം അംഗീകരിച്ച് പുലർച്ചെ കണ്ണൂരിലെത്തിയ സുധാകരനെ ആവേശകരമായ സ്വീകരണമാണ് പ്രവർത്തകർ നൽകിയത്. മറ്റന്നാൾ മുതൽ അദ്ദേഹം യുഡിഎഫിന്റെ തിരഞ്ഞെടുപ്പ് പ്രചാരണ പ്രവർത്തനങ്ങളിൽ സജീവമാകും. ഇരിക്കൂർ മണ്ഡലത്തിലായിരിക്കും സുധാകരന്റെ ആദ്യ പ്രചാരണ പരിപാടി. കെ. സുധാകരനെ കൂടി ഉൾപ്പെടുത്തിക്കൊണ്ടുള്ള വിപുലമായ പ്രചാരണ പരിപാടികളാണ് കണ്ണൂരിൽ ആസൂത്രണം ചെയ്തിരിക്കുന്നതെന്ന് ടി.ഒ. മോഹനൻ മനോരമ ന്യൂസിനോട് പ്രതികരിച്ചു. സുധാകരന്റെ സജീവ സാന്നിധ്യം ജില്ലയിലെ യുഡിഎഫ് പ്രവർത്തകർക്ക് വലിയ ആവേശം പകരുന്നതാണ്.

മാധ്യമങ്ങൾക്കെതിരെ വി.ഡി. സതീശൻ

തിരുവനന്തപുരത്ത് മാധ്യമങ്ങളോട് സംസാരിക്കവെ പ്രതിപക്ഷ നേതാവ് വി.ഡി. സതീശൻ ചില മാധ്യമങ്ങൾക്കെതിരെ രൂക്ഷമായ വിമർശനം ഉന്നയിച്ചു. കോൺഗ്രസ് സ്ഥാനാർത്ഥി നിർണ്ണയം വളരെ വേഗത്തിലാണ് പൂർത്തിയാക്കിയതെന്നും, എന്നാൽ ചില ചാനലുകൾ നാൽപ്പതിലധികം വ്യാജവാർത്തകളാണ് പ്രചരിപ്പിച്ചതെന്നും അദ്ദേഹം ആരോപിച്ചു. എംപിമാരായ കെ. സുധാകരനും അടൂർ പ്രകാശും മത്സരിക്കുമെന്ന് ഒരിക്കലും തീരുമാനിച്ചിരുന്നില്ല. എകെജി സെന്ററിൽ നിന്ന് പണം വാങ്ങി വാർത്തകൾ നൽകുന്ന രീതി ചില മാധ്യമങ്ങൾ അവസാനിപ്പിക്കണമെന്നും സതീശൻ പറഞ്ഞു. കോൺഗ്രസിനോട് ഇത്ര ക്രൂരത കാണിക്കരുത്. യുഡിഎഫ് നൂറിലധികം സീറ്റുകൾ നേടി അധികാരത്തിൽ വരുമെന്നും അദ്ദേഹം ആത്മവിശ്വാസം പ്രകടിപ്പിച്ചു.

അടൂർ പ്രകാശിന്റെ പ്രതികരണം

അതേസമയം, കോന്നിയിൽ താൻ മത്സരിക്കണമെന്ന് ജനങ്ങളാണ് ആഗ്രഹിച്ചതെന്ന് അടൂർ പ്രകാശ് എംപി പറഞ്ഞു. എംപിമാർ മത്സരിക്കേണ്ടെന്ന എഐസിസി തീരുമാനം താൻ പൂർണ്ണമായും ഉൾക്കൊള്ളുന്നു. മത്സരിക്കണമെന്ന ആഗ്രഹം താൻ ഔദ്യോഗികമായി നേതൃത്വത്തെ അറിയിച്ചിരുന്നില്ല. ദേശീയ പാർട്ടിയായതുകൊണ്ടാണ് സ്ഥാനാർത്ഥി പട്ടികയിൽ ചെറിയ കാലതാമസം ഉണ്ടായതെന്നും, താൻ നിർദ്ദേശിച്ച പേരാണ് ഹൈക്കമാൻഡ് കോന്നിയിൽ അംഗീകരിച്ചതെന്നും അദ്ദേഹം വ്യക്തമാക്കി.

സുധാകരന്റെ മനംമാറ്റവും സ്ഥാനാർത്ഥിയെ സ്വീകരിച്ചതും കോൺഗ്രസ് നേതൃത്വത്തിന് വലിയ ആശ്വാസമാണ് നൽകുന്നത്. പാർട്ടിക്കുള്ളിലെ വിഭാഗീയതകൾ ഒഴിവാക്കി ഒറ്റക്കെട്ടായി തിരഞ്ഞെടുപ്പിനെ നേരിടാനൊരുങ്ങുകയാണ് യുഡിഎഫ്. പെരുമ്പാവൂരിൽ ജയസാധ്യത മാത്രം പരിഗണിച്ചാണ് എൽദോസ് കുന്നപ്പിള്ളിക്ക് പകരം മനോജ് മൂത്തേടനെ നിശ്ചയിച്ചതെന്നും നേതൃത്വം വിശദീകരിച്ചു.

---------------

Hindusthan Samachar / Roshith K