Tel aviv, 22 മാര്ച്ച് (H.S.)

തെൽ അവീവ്: പശ്ചിമേഷ്യയെ യുദ്ധഭീതിയിലാഴ്ത്തി ഇസ്രയേലിന് നേരെ ഇറാന്റെ ശക്തമായ മിസൈൽ ആക്രമണം. ഇസ്രയേലിന്റെ അതീവ സുരക്ഷാ മേഖലയായ ഡിമോണയിലെ ആണവ ഗവേഷണ കേന്ദ്രത്തിന് (Dimona Nuclear Research Center) നേരെയും സമീപ നഗരമായ അറദിന് നേരെയുമാണ് ഇറാൻ ആക്രമണം നടത്തിയത്. ഞായറാഴ്ച നടന്ന മിസൈൽ വർഷത്തിൽ നൂറിലധികം പേർക്ക് പരിക്കേറ്റതായാണ് പ്രാഥമിക വിവരം.

ആണവനിലയത്തിൽ തീപിടുത്തം; വികിരണ ഭീഷണിയില്ല

ഇസ്രയേലിന്റെ അത്യന്തം രഹസ്യസ്വഭാവമുള്ള ആയുധപ്പുരയെന്ന് വിശേഷിപ്പിക്കപ്പെടുന്ന ഷിമോൺ പെരസ് നെഗേവ് ന്യൂക്ലിയർ റിസർച്ച് സെന്ററിൽ മിസൈലുകൾ നേരിട്ട് പതിച്ചു. ആക്രമണത്തെത്തുടർന്ന് നിലയത്തിനുള്ളിൽ തീപിടുത്തമുണ്ടായതായും റിപ്പോർട്ടുകളുണ്ട്. ഇവിടെ മാത്രം 39 പേർക്ക് പരിക്കേറ്റു. നിരവധി കെട്ടിടങ്ങൾക്കും നാശനഷ്ടങ്ങൾ സംഭവിച്ചിട്ടുണ്ട്. എന്നാൽ, നിലവിൽ ആണവ വികിരണങ്ങൾ ചോർന്നിട്ടില്ലെന്ന് അന്താരാഷ്ട്ര ആണവോർജ ഏജൻസി (IAEA) സ്ഥിരീകരിച്ചിട്ടുണ്ട്. ഇത് വലിയൊരു ദുരന്തം ഒഴിവാക്കി.

പ്രതിരോധം പാളി; തിരിച്ചടിക്കുമെന്ന് ഇസ്രയേൽ

ലോകത്തിലെ തന്നെ ഏറ്റവും മികച്ച വ്യോമ പ്രതിരോധ സംവിധാനങ്ങളുള്ള ഇസ്രയേലിന് ഇത്തവണ പിഴച്ചുവെന്നത് ഗൗരവകരമാണ്. ഇറാന്റെ മിസൈലുകളെ പൂർണ്ണമായും തടയാൻ തങ്ങളുടെ പ്രതിരോധ സംവിധാനങ്ങൾക്ക് സാധിച്ചില്ലെന്ന് ഇസ്രയേൽ സൈന്യം സമ്മതിച്ചു. ലക്ഷ്യസ്ഥാനങ്ങളിൽ മിസൈലുകൾ നേരിട്ട് പതിക്കുകയായിരുന്നു. സംഭവത്തിന് പിന്നാലെ ഇറാന് കനത്ത തിരിച്ചടി നൽകുമെന്ന് ഇസ്രയേൽ സൈനിക മേധാവി ഇയാൽ സമീർ മുന്നറിയിപ്പ് നൽകി.

പ്രതികാരമെന്ന് ഇറാൻ; നിലപാട് കടുപ്പിച്ച് അമേരിക്ക

ഇറാന്റെ ആണവനിലയങ്ങളായ നതാൻസിലും ബുഷെറിലും ഇസ്രയേൽ നടത്തിയ വ്യോമാക്രമണങ്ങൾക്കുള്ള കൃത്യമായ മറുപടിയാണിതെന്ന് ഇറാൻ ഭരണകൂടം വ്യക്തമാക്കി. അതേസമയം, മേഖലയിൽ സംഘർഷം പടരുന്ന സാഹചര്യത്തിൽ ഇറാനുമായി യാതൊരുവിധ സമാധാന കരാറിനുമില്ലെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. യു എ ഇയിലെ റാസൽഖൈമയിലും സൗദി അറേബ്യയുടെ കിഴക്കൻ മേഖലകളിലും ഇറാൻ ആക്രമണശ്രമം നടത്തിയതായും റിപ്പോർട്ടുകളുണ്ട്. ഇതിനെത്തുടർന്ന് അഞ്ച് ഇറാൻ നയതന്ത്ര ഉദ്യോഗസ്ഥരെ സൗദി അറേബ്യ പുറത്താക്കി.

എന്താണ് ഡിമോണയുടെ പ്രത്യേകത?

നെഗേവ് മരുഭൂമിയിൽ സ്ഥിതി ചെയ്യുന്ന ഡിമോണ ആണവനിലയം ഇസ്രയേലിന്റെ ആദ്യ പ്രധാനമന്ത്രി ഡേവിഡ് ബെൻ ഗുരിയോണിന്റെ കാലത്താണ് (1958) നിർമ്മിച്ചത്. തുടക്കകാലത്ത് ഇതൊരു ടെക്സ്റ്റൈൽ ഫാക്ടറിയാണെന്ന് ലോകത്തെ വിശ്വസിപ്പിക്കാനാണ് ഇസ്രയേൽ ശ്രമിച്ചത്. ഇസ്രയേലിന്റെ ആണവായുധ നിർമ്മാണത്തിന്റെ കേന്ദ്രമായാണ് അന്താരാഷ്ട്ര സമൂഹം ഇതിനെ കാണുന്നത്. അത്തരമൊരു തന്ത്രപ്രധാനമായ ഇടത്തിന് നേരെയുണ്ടായ ആക്രമണം യുദ്ധം കൂടുതൽ വഷളാക്കുമെന്ന ആശങ്ക വർദ്ധിപ്പിക്കുകയാണ്.

ഇസ്രയേലിൽ നടന്ന ആക്രമണങ്ങളിൽ ഒരു മലയാളി മരിച്ചതായും സ്ഥിരീകരിക്കാത്ത റിപ്പോർട്ടുകളുണ്ട്. പശ്ചിമേഷ്യയിലെ നിലവിലെ സാഹചര്യം ലോകരാജ്യങ്ങളെല്ലാം അതീവ ജാഗ്രതയോടെയാണ് നിരീക്ഷിക്കുന്നത്.

---------------

Hindusthan Samachar / Roshith K