Trivandrum, 23 മാര്ച്ച് (H.S.)

തിരുവനന്തപുരം: കേരള നിയമസഭാ തിരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കാനുള്ള സമയം അവസാനിച്ചതോടെ മുന്നണി സ്ഥാനാർത്ഥികളെ ആശങ്കയിലാഴ്ത്തിക്കൊണ്ട് അപരന്മാരുടെ പടയോട്ടം. പ്രമുഖ മണ്ഡലങ്ങളിലെല്ലാം സ്ഥാനാർത്ഥികളുടെ പേരിനോട് സാമ്യമുള്ള സ്വതന്ത്ര സ്ഥാനാർത്ഥികൾ പത്രിക സമർപ്പിച്ചിട്ടുണ്ട്. മുഖ്യമന്ത്രി പിണറായി വിജയൻ മത്സരിക്കുന്ന ധർമ്മടം മുതൽ ബേപ്പൂരും മഞ്ചേശ്വരവും വരെ അപരശല്യം ശക്തമാണ്.

ബേപ്പൂരിൽ പോരാട്ടം കടുക്കും

കോഴിക്കോട് ജില്ലയിലെ ബേപ്പൂർ മണ്ഡലത്തിലാണ് ഇത്തവണ ഏറ്റവും കൂടുതൽ അപരന്മാരുള്ളത്. യുഡിഎഫ് സ്ഥാനാർത്ഥിയായി മത്സരിക്കുന്ന പി.വി. അൻവറിന് നാല് അപരന്മാരാണ് ഭീഷണിയുയർത്തുന്നത്. അൻവർ, അൻവർ മൊയിദീൻ, അൻവർ അലി, അൻവർ എൻ.എം. എന്നിവരാണ് പി.വി. അൻവറിന് വെല്ലുവിളിയായി പത്രിക നൽകിയിരിക്കുന്നത്. അതേസമയം, എൽഡിഎഫ് സ്ഥാനാർത്ഥി പി.എ. മുഹമ്മദ് റിയാസിനും രണ്ട് അപരന്മാരുണ്ട്. മുഹമ്മദ് റിയാസ് ടി.സി., മുഹമ്മദ് റിയാസ് ടി.ടി. എന്നിവരാണ് റിയാസിനെതിരെ രംഗത്തുള്ളത്.

ധർമ്മടത്തും പേരാവൂരിലും സമാന സാഹചര്യം

മുഖ്യമന്ത്രി പിണറായി വിജയൻ ജനവിധി തേടുന്ന കണ്ണൂരിലെ ധർമ്മടം മണ്ഡലത്തിലും അപരൻ പത്രിക സമർപ്പിച്ചിട്ടുണ്ട്. പിണറായി വിജയൻ എന്ന പേരിൽ തന്നെയാണ് ഇവിടെ അപരൻ രംഗത്തിറങ്ങിയിരിക്കുന്നത്. പേരാവൂർ മണ്ഡലത്തിൽ എൽഡിഎഫ് സ്ഥാനാർത്ഥി കെ.കെ. ശൈലജയ്ക്കും യുഡിഎഫ് സ്ഥാനാർത്ഥി സണ്ണി ജോസഫിനും അപരന്മാരുണ്ട്. ശൈലജ എ.വി. എന്ന പേരാണ് കെ.കെ. ശൈലജയ്ക്ക് വെല്ലുവിളിയാവുന്നത്. സണ്ണി ജോസഫിന് സണ്ണി, സണ്ണി ജോസഫ് എന്നിങ്ങനെ രണ്ട് അപരന്മാരാണുള്ളത്.

മറ്റിടങ്ങളിലെ അപരന്മാർ

-

മഞ്ചേശ്വരം: യുഡിഎഫ് സ്ഥാനാർത്ഥി എ.കെ.എം. അഷറഫിന് രണ്ട് അപരന്മാരുണ്ട്. ധർമ്മത്തടുക്ക സ്വദേശി മുഹമ്മദ് അഷറഫ്, കീഴൂർ സ്വദേശി മുഹമ്മദ് അഷറഫ് കെ.എ. എന്നിവരാണിവർ.

-

പൊന്നാനി: എൽഡിഎഫ് സ്ഥാനാർത്ഥി എം.കെ. സക്കീറിന് മൂന്ന് അപരന്മാരാണ് തലവേദനയാകുന്നത്. സക്കീർ എന്ന പേരിൽ രണ്ടുപേരും സഗീർ എന്ന പേരിൽ ഒരാളും പത്രിക നൽകി.

-

താനൂർ: യുഡിഎഫ് സ്ഥാനാർത്ഥി പി.കെ. നവാസിനും അപരനുണ്ട്. വാണിയമ്പലം സ്വദേശി നവാസ് ആണ് ഇവിടെ പത്രിക സമർപ്പിച്ചത്.

സംസ്ഥാനത്താകെ ഇതുവരെ 1269 പത്രികകളാണ് ലഭിച്ചിട്ടുള്ളത്. പത്രികകളുടെ സൂക്ഷ്മപരിശോധന പൂർത്തിയാകുന്നതോടെ അന്തിമ സ്ഥാനാർത്ഥി പട്ടികയിൽ വ്യക്തത വരും. ചിഹ്നങ്ങൾ അനുവദിക്കുന്ന ഘട്ടത്തിൽ വോട്ടർമാർക്കിടയിൽ ആശയക്കുഴപ്പമുണ്ടാക്കാൻ ഇത്തരം അപരന്മാർ കാരണമാകുമെന്ന ആശങ്കയിലാണ് രാഷ്ട്രീയ പാർട്ടികൾ.

---------------

Hindusthan Samachar / Roshith K