New delhi, 27 മാര്‍ച്ച് (H.S.)

ന്യൂഡൽഹി: ഇന്ത്യയും അമേരിക്കയും തമ്മിലുള്ള ബന്ധം കൂടുതൽ ശക്തമാകുകയാണെന്ന് യുഎസ് പ്രസിഡന്‍റ് ഡൊണാൾഡ് ട്രംപ്. ഇന്ത്യയിലെ യുണൈറ്റഡ് സ്‌റ്റേറ്റ്സ് എംബസി എക്സ് പോസ്റ്റിലൂടെയാണ് ഇക്കാര്യം അറിയിച്ചത്. പ്രധാനമന്ത്രി നരേന്ദ്ര മോദിയും ഡൊണാൾഡ് ട്രംപും തമ്മിലുള്ള ടെലിഫോൺ സംഭാഷണത്തിന് പിന്നാലെയാണ് ഈ പോസ്റ്റ് വന്നത്. ഇരു നേതാക്കളുടെയും ചിത്രം പങ്കുവെച്ചുകൊണ്ട്, ഇരുവരും ചേർന്ന് കാര്യങ്ങൾ വേഗത്തിൽ ചെയ്തുതീർക്കുന്നു എന്നും എംബസി കുറിച്ചു.

ഇന്ത്യയുമായുള്ള ബന്ധം അത്ഭുതകരമാണെന്നും അത് നല്ല രീതിയിൽ മുന്നോട്ടുപോകുന്നുവെന്നും പോസ്റ്റിൽ പറയുന്നു. ഈ ബന്ധം കൂടുതൽ ശക്തമാകും. ട്രംപും മോദിയും പരസ്പര സഹവർത്തിത്വത്തോടെ കാര്യങ്ങൾ ചെയ്തുതീർക്കുന്ന നേതാക്കളാണെന്നും ഇത്തരത്തിലുള്ളവർ അപൂർവ്വമാണെന്നും എംബസി കൂട്ടിച്ചേർത്തു.

പശ്ചിമേഷ്യൻ സംഘർഷത്തെക്കുറിച്ച് ഇരുവരും ചർച്ച നടത്തി മൂന്ന് ദിവസത്തിന് ശേഷമാണ് ഈ എക്സ് പോസ്റ്റ് വരുന്നത്. പ്രധാന എണ്ണക്കടത്ത് പാതയായ ഹോർമുസ് കടലിടുക്ക് തുറന്നിടേണ്ടതിന്‍റെ പ്രാധാന്യം ഉൾപ്പെടെ മിഡിൽ ഈസ്റ്റിലെ സ്ഥിതിഗതികളെക്കുറിച്ച് ഇരുനേതാക്കളും ചർച്ച ചെയ്തതായും പോസ്റ്റ് വ്യക്തമാക്കുന്നു.

---------------

Hindusthan Samachar / Sreejith S