Thiruvananthapuram , 28 മാര്ച്ച് (H.S.)

2026-ലെ കേരള നിയമസഭാ തിരഞ്ഞെടുപ്പിന് മുന്നോടിയായി രാഷ്ട്രീയ കേരളത്തില് സജീവ ചർച്ചയാകുന്ന സഖ്യസാധ്യതകളെക്കുറിച്ച് സിപിഎം ജനറല് സെക്രട്ടറി എം.എ.ബേബി വ്യക്തമായ നിലപാട് അറിയിച്ചു.

എസ്ഡിപിഐയുമായി സിപിഎമ്മിന് യാതൊരുവിധ രാഷ്ട്രീയ നീക്കുപോക്കുകളോ ധാരണകളോ ഇല്ലെന്ന് അദ്ദേഹം കണ്ണൂരില് വാർത്താസമ്മേളനത്തില് പറഞ്ഞു. വർഗീയ സംഘടനകളുമായുള്ള സഹകരണം ജനാധിപത്യ പ്രക്രിയയ്ക്ക് ഭീഷണിയാണെന്നും അത്തരം സംഘടനകളുടെ വോട്ടുകള് പാർട്ടിക്ക് ആവശ്യമില്ലെന്നും അദ്ദേഹം കൂട്ടിച്ചേർത്തു.

പിഡിപി പിന്തുണ സ്വീകരിക്കും

അതേസമയം, ഇത്തവണത്തെ തിരഞ്ഞെടുപ്പില് പിഡിപി ഇടതുപക്ഷത്തിന് പിന്തുണ നല്കുമെന്ന് പ്രഖ്യാപിച്ചിട്ടുണ്ട്. മുൻകാലങ്ങളിലെ നിലപാടുകളില് നിന്ന് പിഡിപി മാറിയിട്ടുണ്ടെന്നും, അബ്ദുന്നാസിർ മഅദനി തന്നെ ഇക്കാര്യം വ്യക്തമാക്കിയതായും എം.എ. ബേബി ചൂണ്ടിക്കാട്ടി. തിരഞ്ഞെടുപ്പ് വിജയിക്കാൻ ബിജെപിയുടെ വോട്ടുകള് ലഭിക്കുമെന്ന് ചില നേതാക്കള് അവകാശപ്പെടുന്നത് രാഷ്ട്രീയ ഡീലുകളുടെ ഭാഗമാണെന്നും അദ്ദേഹം വിമർശിച്ചു. പ്രസ്ഥാനത്തിന് വേണ്ടി ജീവിതം സമർപ്പിച്ചവർ കേവലം സ്ഥാനാർത്ഥി പട്ടികയില് ഇടം ലഭിക്കാത്തതിന്റെ പേരില് പാർട്ടി വിടുന്നത് അധഃപതനമാണെന്നും അദ്ദേഹം ഓർമ്മിപ്പിച്ചു.

പയ്യന്നൂർ ഫണ്ട് വിവാദം

പയ്യന്നൂരിലെ രക്തസാക്ഷി ഫണ്ട് തട്ടിപ്പ് ആരോപണങ്ങളിലും അദ്ദേഹം പ്രതികരണം നടത്തി. സിപിഎമ്മില് ഒരു ഫണ്ടും ദുരുപയോഗം ചെയ്യാൻ കഴിയില്ലെന്നും, അത്തരത്തില് എന്തെങ്കിലും വീഴ്ചകള് ശ്രദ്ധയില്പ്പെട്ടാല് പാർട്ടി മുഖം നോക്കാതെ നടപടി സ്വീകരിക്കുമെന്നും അദ്ദേഹം പറഞ്ഞു. പയ്യന്നൂർ ഏരിയ കമ്മിറ്റിയെക്കുറിച്ചുള്ള ആക്ഷേപങ്ങള് അടിസ്ഥാനരഹിതമാണെന്നും ഇത്തരം വിവാദങ്ങള് രാഷ്ട്രീയ എതിരാളികളുടെ പ്രചാരണ തന്ത്രമാണെന്നും അദ്ദേഹം വ്യക്തമാക്കി.

ബിനോയ് വിശ്വത്തിന്റെ പ്രതികരണം

സിപിഐ സംസ്ഥാന സെക്രട്ടറി ബിനോയ് വിശ്വവും സമാനമായ നിലപാടാണ് സ്വീകരിച്ചത്. ആർഎസ്എസ്, എസ്ഡിപിഐ, ജമാഅത്തെ ഇസ്ലാമി തുടങ്ങിയ തീവ്ര സ്വഭാവമുള്ള സംഘടനകളെ ഒരേപോലെ കാണണമെന്നും വർഗീയതയുടെ വോട്ടുകള് ഇടതുമുന്നണിക്ക് ആവശ്യമില്ലെന്നും അദ്ദേഹം പറഞ്ഞു. വിശ്വാസികളെയും മതങ്ങളെയും ഇടതുപക്ഷം ബഹുമാനിക്കുന്നുണ്ടെങ്കിലും മതഭ്രാന്തിനോട് വിട്ടുവീഴ്ചയില്ലെന്നാണ് മുന്നണിയുടെ പ്രഖ്യാപിത നിലപാടെന്നും അദ്ദേഹം കൂട്ടിച്ചേർത്തു. വരാനിരിക്കുന്ന തിരഞ്ഞെടുപ്പില് മതനിരപേക്ഷ വോട്ടുകള് സമാഹരിച്ച് മികച്ച വിജയം നേടാനാണ് എല്ഡിഎഫ് ലക്ഷ്യമിടുന്നത്.

---------------

Hindusthan Samachar / CHANDHU CHANDRASEKHAR