Tehran , 31 മാര്ച്ച് (H.S.)

പശ്ചിമേഷ്യയില് യുദ്ധം കടുക്കുന്നതിനിടെ ലോകത്തെ ഞെട്ടിക്കുന്ന പുതിയ സൈനിക നീക്കങ്ങള് പുറത്തുവരുന്നു. ഇറാനില് അമേരിക്കയുടെ ഭാഗത്തുനിന്ന് ഒരു കരസേനാ അധിനിവേശം ഉണ്ടായാല്, ഇറാന് പിന്തുണയുമായി റഷ്യയുടെ കരുത്തുറ്റ ചെചൻ സൈനിക വിഭാഗങ്ങള് (Chechen units) അണിനിരക്കുമെന്നാണ് ഏറ്റവും പുതിയ റിപ്പോർട്ടുകള് സൂചിപ്പിക്കുന്നത്.

ഇറാനിയൻ മാധ്യമമായ പ്രസ് ടിവിയാണ് (Press TV) അന്താരാഷ്ട്ര തലത്തില് വലിയ ചർച്ചയാകുന്ന ഈ വാർത്ത പുറത്തുവിട്ടത്. നിലവില് ഉക്രെയ്ൻ യുദ്ധത്തില് റഷ്യക്ക് വേണ്ടി നിർണ്ണായക മുന്നേറ്റങ്ങള് നടത്തുന്ന ചെചൻ പോരാളികള് ഇറാനിലേക്ക് എത്തുന്നത് യുദ്ധത്തിന്റെ ഗതി തന്നെ മാറ്റാൻ സാധ്യതയുണ്ട്.

തയ്യാറെടുത്ത് ചെച്നിയൻ സേന

റഷ്യൻ ഫെഡറേഷന്റെ ഭാഗമായ ചെച്നിയയിലെ ഭരണാധികാരി റംസാൻ കദിറോവിന്റെ നേതൃത്വത്തിലുള്ള 'അഖ്മത്' സ്പെഷ്യല് ഫോഴ്സ് ഉള്പ്പെടെയുള്ള വിഭാഗങ്ങളാണ് ഇറാൻ സൈന്യത്തിനൊപ്പം ചേർന്ന് പോരാടാൻ സന്നദ്ധത അറിയിച്ചിരിക്കുന്നത്. ഇതൊരു കേവലമായ രാഷ്ട്രീയ യുദ്ധമല്ലെന്നും മറിച്ച് പാശ്ചാത്യ അധിനിവേശത്തിനെതിരായ ഒരു 'മതയുദ്ധം' ആണെന്നുമാണ് ചെചൻ നേതൃത്വം വിശേഷിപ്പിക്കുന്നത്. അമേരിക്കൻ സൈന്യം ഇറാന്റെ മണ്ണില് കാലുകുത്തിയാല് അത് ആഗോളതലത്തില് തന്നെ വലിയ പ്രത്യാഘാതങ്ങള് ഉണ്ടാക്കുമെന്ന് റഷ്യൻ അനുകൂല വൃത്തങ്ങള് മുന്നറിയിപ്പ് നല്കുന്നുണ്ട്.

കടന്നുകയറാൻ ശ്രമിക്കുന്നവരുടെ കാലുകള് വെട്ടിമാറ്റും

അതേസമയം, ഇറാന്റെ ഭാഗത്തുനിന്നും അതിശക്തമായ പ്രതികരണമാണ് ഉണ്ടായിരിക്കുന്നത്. ഇറാന്റെ സംയുക്ത സൈനിക ആസ്ഥാനമായ ഖാത്തം അല്-അൻബിയയുടെ (Khatam al-Anbiya) വക്താവ് ഇബ്രാഹിം സോള്ഫാഘരി, രാജ്യത്തെ അധിനിവേശം ചെയ്യാൻ ശ്രമിക്കുന്ന ഏതൊരു ശത്രുവിനെയും നിഷ്കരുണം നേരിടുമെന്ന് വ്യക്തമാക്കി. ഇറാന്റെ പരമാധികാരത്തിന്മേല് കടന്നുകയറാൻ ശ്രമിക്കുന്നവരുടെ കാലുകള് വെട്ടിമാറ്റും എന്നാണ് അദ്ദേഹം പ്രസ്താവിച്ചത്. അമേരിക്കൻ പ്രസിഡന്റ് ഡൊണാള്ഡ് ട്രംപിന്റെ നേതൃത്വത്തില് ഇറാനിലെ എണ്ണക്കയറ്റുമതി കേന്ദ്രങ്ങളും പ്രധാന സൈനിക താവളങ്ങളും ലക്ഷ്യമിട്ടുള്ള ആക്രമണങ്ങള് ആസൂത്രണം ചെയ്യുന്ന പശ്ചാത്തലത്തിലാണ് ഈ നീക്കങ്ങള്.

പശ്ചിമേഷ്യയിലെ ഈ സംഘർഷം ആഗോള സാമ്പത്തിക രംഗത്തെയും ബാധിച്ചു കഴിഞ്ഞു. ഹോർമുസ് കടലിടുക്ക് (Strait of Hormuz) വഴിമാറ്റിയുള്ള എണ്ണക്കടത്ത് തടസ്സപ്പെട്ടാല് ലോകം വലിയൊരു ഇന്ധന പ്രതിസന്ധിയിലേക്ക് നീങ്ങും. റഷ്യയുടെയും ചെചൻ സേനയുടെയും പിന്തുണ ഇറാനു ലഭിക്കുന്നത് അമേരിക്കയ്ക്ക് വലിയ വെല്ലുവിളിയാകും. ഇത് ഒരു പ്രാദേശിക യുദ്ധത്തില് നിന്നും മാറി മൂന്നാം ലോകമഹായുദ്ധത്തിന് സമാനമായ സാഹചര്യത്തിലേക്ക് ലോകത്തെ എത്തിക്കുമോ എന്ന ആശങ്കയിലാണ് അന്താരാഷ്ട്ര സമൂഹം. വരും ദിവസങ്ങളില് ഐക്യരാഷ്ട്രസഭയുടെ ഇടപെടലുകള് ഈ സംഘർഷത്തിന് അയവുവരുത്തുമോ എന്ന് ഉറ്റുനോക്കുകയാണ് ലോകം.

---------------

Hindusthan Samachar / CHANDHU CHANDRASEKHAR