Ernakulam, 04 മാര്ച്ച് (H.S.)

കെജിഎഫ് 2വിന് ശേഷം സൂപ്പർ താരം യഷ് നായകനായി എത്തുന്ന 'ടോക്സിക്: എ ഫെയറി ടെയില് ഫോർ ഗ്രോണ് അപ്സ്' (Toxic: A Fairy Tale for Grown-ups) എന്ന ചിത്രത്തിന്റെ റിലീസ് മാറ്റിവെച്ചു.

മലയാളി സംവിധായിക ഗീതു മോഹൻദാസ് ഒരുക്കുന്ന ഈ ബിഗ് ബജറ്റ് ചിത്രം 2026 മാർച്ച് 19-ന് ലോകമെമ്പാടുമുള്ള തിയേറ്ററുകളില് എത്തുമെന്നായിരുന്നു നേരത്തെ അറിയിച്ചിരുന്നത്. എന്നാല് ആരാധകരെ നിരാശയിലാഴ്ത്തിയാണ് പുതിയ തീരുമാനം.

റിലീസ് മാറ്റാൻ കാരണമെന്ത്?

പശ്ചിമേഷ്യൻ രാജ്യങ്ങളില് നിലനില്ക്കുന്ന യുദ്ധസമാനമായ സാഹചര്യങ്ങളും അനിശ്ചിതത്വവുമാണ് റിലീസ് നീട്ടിവെക്കാൻ പ്രധാന കാരണമായി നിർമ്മാതാക്കള് ചൂണ്ടിക്കാണിക്കുന്നത്. ആഗോളതലത്തില് വലിയ റിലീസ് ലക്ഷ്യമിടുന്ന ചിത്രമായതിനാല്, വിദേശ വിപണികളിലെ പ്രതിസന്ധി സിനിമയുടെ കളക്ഷനെ ബാധിക്കുമെന്ന വിലയിരുത്തലിലാണ് ഈ തീരുമാനം. കന്നഡയിലും ഇംഗ്ലീഷിലുമായി ഒരേസമയം ചിത്രീകരിച്ചിരിക്കുന്ന 'ടോക്സിക്', എല്ലാ പ്രേക്ഷകരിലേക്കും ഒരുപോലെ എത്തിക്കുക എന്നതാണ് തങ്ങളുടെ ലക്ഷ്യമെന്നും അണിയറപ്രവർത്തകർ പ്രസ്താവനയില് പറഞ്ഞു. അതിനാല് 2026 ജൂണ് 4-ലേക്ക് ചിത്രത്തിന്റെ റിലീസ് മാറ്റിയതായി നിർമ്മാതാക്കളായ കെവിഎൻ പ്രൊഡക്ഷൻസ് ഔദ്യോഗികമായി അറിയിച്ചു.

വൻ താരനിരയും പ്രതീക്ഷകളും

ഏകദേശം 600 കോടി രൂപ ബജറ്റില് ഒരുങ്ങുന്ന ഈ ചിത്രം പ്രീ-റിലീസ് ബിസിനസ്സിലൂടെ തന്നെ വൻ തുക സമാഹരിച്ചതായാണ് റിപ്പോർട്ടുകള്. നയൻതാര, കിയാര അദ്വാനി, ഹുമ ഖുറേഷി, താര സുതാരിയ, രുക്മിണി വസന്ത് തുടങ്ങിയ വൻ താരനിരയാണ് ചിത്രത്തില് അണിനിരക്കുന്നത്. മലയാള താരം ടൊവിനോ തോമസും ചിത്രത്തില് ഒരു പ്രധാന വേഷത്തില് എത്തുന്നുണ്ട്. 1940-കള് മുതല് 1970-കള് വരെയുള്ള കാലഘട്ടത്തിലെ ഗോവയിലെ അധോലോകത്തിന്റെ കഥയാണ് ചിത്രം പറയുന്നത്.

ബോക്സ് ഓഫീസ് ക്ലാഷ് ഒഴിവാകും

മാർച്ച് 19-ന് റിലീസ് നിശ്ചയിച്ചിരുന്നതിനാല് രണ്വീർ സിംഗ് ചിത്രം 'ധുരന്ദർ 2'-വുമായി ടോക്സിക് ഏറ്റുമുട്ടുമെന്ന് കരുതിയിരുന്നു. എന്നാല് പുതിയ മാറ്റത്തോടെ ഈ വലിയ ബോക്സ് ഓഫീസ് ക്ലാഷ് ഒഴിവാകുകയും രണ്ട് ചിത്രങ്ങള്ക്കും കൂടുതല് സ്ക്രീനുകള് ലഭിക്കാനുള്ള സാഹചര്യം ഒരുങ്ങുകയും ചെയ്തു. യഷിന്റെ കരിയറിലെ 19-ാമത്തെ ചിത്രമായ ടോക്സിക്കിനായി നാല് വർഷമായി ആരാധകർ കാത്തിരിക്കുകയാണ്. കന്നഡ, ഹിന്ദി, തെലുങ്ക്, തമിഴ്, മലയാളം, ഇംഗ്ലീഷ് ഭാഷകളില് ചിത്രം തിയേറ്ററുകളിലെത്തും. ഐമാക്സ് (IMAX), 4DX ഫോർമാറ്റുകളിലും ചിത്രം ആസ്വദിക്കാൻ സാധിക്കും.

---------------

Hindusthan Samachar / CHANDHU CHANDRASEKHAR