Thiruvanathapuram, 04 മാര്‍ച്ച് (H.S.)

പട്ടികവര്‍ഗ്ഗ വികസന വകുപ്പ് മന്ത്രിയുടെ ദുരിതാശ്വാസ നിധിയുടെ വിതരണ നടപടികള്‍ക്ക് ഓണ്‍ലൈന്‍ പോര്‍ട്ടല്‍ സജ്ജമായി. ഇതോടെഅടിയന്തര ചികിത്സാ സഹായവും ആശ്വാസധനവും ഇനി വിരല്‍ത്തുമ്പില്‍ ലഭ്യമാകും. പോര്‍ട്ടലിന്റെ ഉദ്ഘാടനം 5 ന് പകല്‍ 2 ന് മന്ത്രി ഒ ആര്‍ കേളു നിര്‍വഹിക്കും. സെക്രട്ടറിയറ്റ് ഡര്‍ബാര്‍ ഹാളിലാണ് പരിപാടി.

ഓഫീസുകള്‍ കയറിയിറങ്ങാതെയും ഇടനിലക്കാരില്ലാതെയും വേഗത്തില്‍ സഹായം എത്തിക്കുക എന്നതാണ് പോര്‍ട്ടലിലൂടെ സര്‍ക്കാരിന്റെ ലക്ഷ്യമിടുന്നതെന്ന് മന്ത്രി ഒ ആര്‍ കേളു പറഞ്ഞു. അക്ഷയ കേന്ദ്രങ്ങളിലൂടെയും പ്രമോട്ടര്‍മാര്‍ വഴിയും അപേക്ഷകള്‍ സമര്‍പ്പിക്കാന്‍ കഴിയും.

മെഡിക്കല്‍ സര്‍ട്ടിഫിക്കറ്റിനൊപ്പം ജാതി, വരുമാന സര്‍ട്ടിഫിക്കറ്റുകളും ബാങ്ക് അക്കൗണ്ട് വിവരങ്ങളും ഓണ്‍ലൈനായി സമര്‍പ്പിക്കണം.

അപേക്ഷയുടെ നിലവിലെ സ്ഥിതി ഗുണഭോക്താവിന് നേരിട്ട് മനസ്സിലാക്കാനും പോര്‍ട്ടലില്‍ സൗകര്യമുണ്ട്.

5,000/- വരെ പ്രൊജക്റ്റ് ഓഫീസര്‍മാര്‍ക്കും 25,000/- വരെ ഡയറക്ടര്‍ക്കും അതിനു മുകളില്‍ വകുപ്പ് മന്ത്രിക്കും സഹായം അനുവദിക്കാം.

അനുവദിക്കുന്ന തുക ഗുണഭോക്താവിന്റെ ബാങ്ക് അക്കൗണ്ടിലേക്ക് നേരിട്ട് എത്തും.

കുടുംബത്തിന്റെ താങ്ങായിരുന്ന വ്യക്തി മരണപ്പെട്ടാല്‍ ആ കുടുംബത്തിന് 2,00,000/- രൂപ വരെ നല്‍കുന്ന പദ്ധതിയും ഈ ഓണ്‍ലൈന്‍ പ്ലാറ്റ്ഫോമിലുണ്ട്. തഹസില്‍ദാരുടെ സാക്ഷ്യപത്രവും മറ്റ് രേഖകളും അപ്ലോഡ് ചെയ്യുന്നതോടെ സഹായം ഉറപ്പാക്കും.

കുടുംബ വാര്‍ഷിക വരുമാനം 1,00,000/- രൂപയില്‍ താഴെയുള്ളവര്‍ക്കാണ് ആനുകൂല്യം. ആധാര്‍ കാര്‍ഡ്, റേഷന്‍ കാര്‍ഡ്, മെഡിക്കല്‍ ബില്ലുകള്‍ എന്നിവ അപേക്ഷയോടൊപ്പം സമര്‍പ്പിക്കണം.

---------------

Hindusthan Samachar / Sreejith S