Wayanad, 08 മാര്ച്ച് (H.S.)

വയനാട്: മുണ്ടക്കൈ-ചൂരൽമല പുനരധിവാസ ടൗൺഷിപ്പ് സന്ദർശനത്തിനിടെ സിപിഎം വയനാട് ജില്ലാ സെക്രട്ടറി കെ. റഫീഖിനോട് അതൃപ്തി പ്രകടിപ്പിച്ച സംഭവത്തിൽ നടൻ മമ്മൂട്ടിക്കെതിരെ സോഷ്യൽ മീഡിയയിൽ കടുത്ത സൈബർ ആക്രമണം. ശനിയാഴ്ച ഉച്ചയോടെ നടന്ന സംഭവത്തിന്റെ വീഡിയോ ദൃശ്യങ്ങൾ വ്യാപകമായി പ്രചരിച്ചതോടെയാണ് ഇടത് സൈബർ ഹാൻഡിലുകളിൽ നിന്ന് നടനെതിരെ വിമർശനമുയർന്നത്.

സംഭവത്തിന്റെ പശ്ചാത്തലം

വയനാട്ടിലെ ഉരുൾപൊട്ടൽ ബാധിതർക്കായി നിർമ്മിക്കുന്ന ടൗൺഷിപ്പ് സന്ദർശിക്കാനാണ് മമ്മൂട്ടി എത്തിയത്. സന്ദർശനത്തിലുടനീളം തന്നെ അനുഗമിച്ചിരുന്ന സിപിഎം വയനാട് ജില്ലാ സെക്രട്ടറി കെ. റഫീഖിനോട് മമ്മൂട്ടി പ്രകടിപ്പിച്ച പ്രതികരണമാണ് വിവാദങ്ങൾക്ക് വഴിവെച്ചത്. നിങ്ങൾ എന്തിനാണ് എപ്പോഴും എന്റെ കൂടെ നിൽക്കുന്നത്? ഞാൻ നിങ്ങൾക്കുവേണ്ടി വന്നതാണെന്ന് ആളുകൾ തെറ്റിദ്ധരിക്കില്ലേ? മാറി നിന്നാൽ മതി, എന്ന് മമ്മൂട്ടി പറയുന്ന വീഡിയോയാണ് പുറത്തുവന്നത്.

താൻ ഏതെങ്കിലും ഒരു രാഷ്ട്രീയ പാർട്ടിക്ക് വേണ്ടിയല്ല വന്നതെന്ന സന്ദേശം നൽകാനാണ് മമ്മൂട്ടി ഇത്തരത്തിൽ സംസാരിച്ചതെന്നാണ് ഒരു വിഭാഗം വാദിക്കുന്നത്. എന്നാൽ, പാർട്ടി ജില്ലാ സെക്രട്ടറിക്ക് മുകളിലല്ല മഹാനടനെന്നും സിനിമയിൽ മാത്രമാണ് മമ്മൂട്ടി ഹീറോയെന്നും തുടങ്ങുന്ന കമന്റുകളിലൂടെ സൈബർ ഇടങ്ങളിൽ വലിയ പ്രതിഷേധം ആളിപ്പടരുകയാണ്.

മന്ത്രി പി. രാജീവിന്റെ പിന്തുണ

മമ്മൂട്ടിക്കെതിരായ സൈബർ ആക്രമണം നിർഭാഗ്യകരമാണെന്ന് വ്യവസായ മന്ത്രി പി. രാജീവ് പ്രതികരിച്ചു. മമ്മൂട്ടിയെപ്പോലൊരു വലിയ കലാകാരൻ വയനാട്ടിലെ ടൗൺഷിപ്പ് സന്ദർശിച്ചത് പദ്ധതിക്ക് വലിയ പ്രചാരണം നൽകിയിട്ടുണ്ടെന്നും അതിന് കേരളം അദ്ദേഹത്തോട് നന്ദി പറയുകയാണ് വേണ്ടതെന്നും മന്ത്രി പറഞ്ഞു. തിരക്കുകൾക്കിടയിലും വയനാട്ടിലെത്തി ജനങ്ങളോടുള്ള ഐക്യദാർഢ്യം പ്രഖ്യാപിച്ച അദ്ദേഹത്തിന്റെ മനസ്സിനെ അഭിനന്ദിക്കണമെന്നും അദ്ദേഹം കൂട്ടിചേർത്തു.

വിവാദങ്ങൾക്കിടയിലും മമ്മൂട്ടിയുടെ വാക്കുകൾ

ടൗൺഷിപ്പ് പദ്ധതിയെ അഭിനന്ദിച്ച മമ്മൂട്ടി, ഇത് കേരളത്തിന്റെ സാമൂഹ്യമൂലധനമാണെന്ന് വിശേഷിപ്പിച്ചു. ഇത് നമ്മുടെ ജനങ്ങളുടെ മനസ്സാണ് കാണിക്കുന്നത്. കേരളത്തിലെ ജനങ്ങളിൽ നിന്ന് പിരിച്ച പണമാണല്ലോ സർക്കാർ ഇതിനായി ഉപയോഗിക്കുന്നത്. മറ്റുള്ളവരോട് അനുതാപവും സഹതാപവും പ്രകടിപ്പിക്കുന്നതിൽ കേരളം എന്നും മുന്നിലാണെന്ന് ഈ കാഴ്ചകൾ തെളിയിക്കുന്നു, എന്ന് അദ്ദേഹം സന്ദർശന വേളയിൽ പറഞ്ഞു.

വിവാദങ്ങൾ കൊഴുക്കുന്നതിനിടെ, മമ്മൂട്ടി കെ. റഫീഖിനെ ഫോണിൽ വിളിച്ച് സംസാരിച്ചതായും വിവരമുണ്ട്. ടൗൺഷിപ്പ് സന്ദർശനം കഴിഞ്ഞ് കാറിൽ കയറിയ ഉടനെയാണ് അദ്ദേഹം ജില്ലാ സെക്രട്ടറിയെ വിളിച്ചത്. സന്ദർശനം വലിയ ചർച്ചയാവുകയും അനുകൂലിച്ചും പ്രതികൂലിച്ചും നിരവധിപ്പേർ രംഗത്തെത്തുകയും ചെയ്തതോടെ സോഷ്യൽ മീഡിയ ഈ വിഷയത്തിൽ ഇപ്പോഴും രണ്ട് തട്ടിലാണ്.

Hindusthan Samachar / Roshith K