Newdelhi, 09 മാര്ച്ച് (H.S.)

ന്യൂഡൽഹി/തിരുവനന്തപുരം: നിയമസഭാ തെരഞ്ഞെടുപ്പിന് മുന്നോടിയായി കേരളത്തിൽ സ്ഥാനാർത്ഥി നിർണ്ണയത്തിനുള്ള നിർണ്ണായക നീക്കങ്ങളുമായി ബിജെപി. ഒറ്റയടിക്ക് 50 സീറ്റുകളിലെ സ്ഥാനാർത്ഥികളെ പ്രഖ്യാപിക്കാനാണ് പാർട്ടി തയ്യാറെടുക്കുന്നത്. ഇതുമായി ബന്ധപ്പെട്ട കേന്ദ്ര തെരഞ്ഞെടുപ്പ് സമിതി യോഗം ഇന്ന് വൈകിട്ട് ദില്ലിയിൽ ചേരും. പ്രധാനമന്ത്രി നരേന്ദ്ര മോദി ഉൾപ്പെടെയുള്ള മുതിർന്ന നേതാക്കൾ പങ്കെടുക്കുന്ന പാർലമെന്ററി ബോർഡ് യോഗത്തിന് ശേഷമായിരിക്കും സംസ്ഥാന നേതാക്കളുമായുള്ള ചർച്ചകൾ നടക്കുക.

പട്ടികയിൽ മാറ്റമില്ല; സർപ്രൈസുകളില്ല

സ്ഥാനാർത്ഥി പട്ടികയിൽ വലിയ മാറ്റങ്ങൾക്കോ സർപ്രൈസുകൾക്കോ സാധ്യതയില്ലെന്നാണ് ബിജെപി വൃത്തങ്ങൾ നൽകുന്ന സൂചന. സംസ്ഥാന നേതൃത്വം സമർപ്പിച്ച പട്ടികയ്ക്ക് കേന്ദ്ര നേതൃത്വം വലിയ ഭേദഗതികളില്ലാതെ അംഗീകാരം നൽകാനാണ് സാധ്യത. ഘടകകക്ഷി നേതാക്കളായ തുഷാർ വെള്ളാപ്പള്ളി, സാബു ജേക്കബ് തുടങ്ങിയവരും മത്സരരംഗത്തുണ്ടാകണമെന്ന ആവശ്യം ബിജെപി ഉന്നയിച്ചിട്ടുണ്ട്. തെരഞ്ഞെടുപ്പ് പ്രഖ്യാപനത്തിന് ശേഷമായിരിക്കും സ്ഥാനാർത്ഥികളുടെ ഔദ്യോഗിക പട്ടിക പുറത്തുവിടുക.

പ്രഖ്യാപനത്തിന് മുൻപേ പ്രചാരണവുമായി ശോഭ സുരേന്ദ്രൻ

ഔദ്യോഗിക പ്രഖ്യാപനം വരും മുൻപേ പാലക്കാട് മണ്ഡലത്തിൽ ശോഭ സുരേന്ദ്രൻ പ്രചാരണത്തിന് തുടക്കമിട്ടു. പാലക്കാട്ടെ ബിജെപി ശക്തികേന്ദ്രമായ മൂത്താൻ തറയിലെ കർണ്ണകിയമ്മൻ ക്ഷേത്രത്തിൽ ദർശനം നടത്തിയാണ് അവർ പ്രവർത്തനങ്ങൾ ആരംഭിച്ചത്. ചുവരെഴുത്തുകൾ ഉദ്ഘാടനം ചെയ്തും പ്രാദേശിക നേതാക്കളെ കണ്ടും ശോഭ മണ്ഡലത്തിൽ സജീവമായിട്ടുണ്ട്. പാലക്കാടിന് പുറമെ തിരുവനന്തപുരത്തും ബിജെപി ചുവരെഴുത്തുകൾ ആരംഭിച്ചു കഴിഞ്ഞു.

പാലക്കാട്ട് ഭിന്നതയോ?

ശോഭ സുരേന്ദ്രന്റെ പ്രചാരണ പരിപാടികളിൽ നിന്ന് ബിജെപി പാലക്കാട് ജില്ലാ അധ്യക്ഷൻ പ്രശാന്ത് ശിവൻ തുടക്കത്തിൽ വിട്ടുനിന്നത് പാർട്ടിയിൽ ചർച്ചയായിട്ടുണ്ട്. പിന്നീട് സംസ്ഥാന വൈസ് പ്രസിഡന്റ് സി. കൃഷ്ണകുമാർ ഇടപെട്ടാണ് പ്രശാന്തിനെ സ്ഥലത്തെത്തിച്ചത്. എന്നാൽ പാർട്ടിയിൽ പ്രശ്നങ്ങളില്ലെന്നും തെരഞ്ഞെടുപ്പിനെ ഒറ്റക്കെട്ടായി നേരിടുമെന്നും ശോഭ സുരേന്ദ്രൻ വ്യക്തമാക്കി. പ്രശാന്ത് ശിവൻ തനിക്ക് മകനെപ്പോലെയാണെന്നും സ്ഥാനാർത്ഥി ആരായാലും പൂർണ്ണ പിന്തുണ നൽകുമെന്നും അവർ കൂട്ടിച്ചേർത്തു.

കേന്ദ്ര നേതൃത്വത്തിന്റെ ഇടപെടൽ

കേരളത്തിലെ തെരഞ്ഞെടുപ്പ് ഒരുക്കങ്ങൾ നേരിട്ട് വിലയിരുത്താനാണ് ബിജെപി കേന്ദ്ര നേതൃത്വം ശ്രമിക്കുന്നത്. വരും ദിവസങ്ങളിൽ കൂടുതൽ കേന്ദ്ര നേതാക്കൾ കേരളത്തിലെത്തുമെന്നും വലിയ പ്രചാരണ പരിപാടികൾ സംഘടിപ്പിക്കുമെന്നുമാണ് വിവരം. സംസ്ഥാനത്തെ പ്രധാന നേതാക്കളെല്ലാം നിലവിൽ ചർച്ചകൾക്കായി ദില്ലിയിൽ തുടരുകയാണ്. ബിജെപിയുടെ ശക്തമായ സാന്നിധ്യമുള്ള മണ്ഡലങ്ങളിൽ നേരത്തെ തന്നെ പ്രചാരണം ഊർജ്ജിതമാക്കി വോട്ടർമാരുടെ ശ്രദ്ധ പിടിച്ചുപറ്റാനാണ് പാർട്ടിയുടെ ലക്ഷ്യം.

---------------

Hindusthan Samachar / Roshith K