Trivandrum, 09 മാര്ച്ച് (H.S.)

തിരുവനന്തപുരം: സാമൂഹിക മാധ്യമങ്ങളിൽ തനിക്കെതിരെ ഉയരുന്ന വ്യക്തിപരമായ ആരോപണങ്ങളിൽ ശക്തമായ മറുപടിയുമായി ഗതാഗത മന്ത്രി കെ.ബി. ഗണേഷ് കുമാർ രംഗത്ത്. തെരഞ്ഞെടുപ്പ് അടുക്കുമ്പോൾ രാഷ്ട്രീയ മുതലെടുപ്പിനായി നടത്തുന്ന നീക്കങ്ങളാണിതെന്നും തന്റെ വ്യക്തിപരമായ കാര്യങ്ങളിൽ ആരും ഇടപെടേണ്ടതില്ലെന്നും മന്ത്രി വ്യക്തമാക്കി. പ്രണയം ഒരു കുറ്റമല്ലെന്നും അത് എല്ലാവർക്കുമുണ്ടെന്നും അദ്ദേഹം മാധ്യമങ്ങളോട് പറഞ്ഞു.

ആരോപണങ്ങൾ രാഷ്ട്രീയ പ്രേരിതം

തനിക്കെതിരെ ഉയരുന്ന ആരോപണങ്ങൾ ശരിയാണെങ്കിലും അല്ലെങ്കിലും അത് തന്റെ സ്വകാര്യ ജീവിതത്തിന്റെ ഭാഗമാണെന്നും കേരളത്തിലെ ജനങ്ങളെ ബാധിക്കുന്ന വിഷയമല്ലെന്നും അദ്ദേഹം പറഞ്ഞു. തെരഞ്ഞെടുപ്പ് കാലത്തെ രാഷ്ട്രീയ മുതലെടുപ്പാണ് ഇപ്പോൾ നടക്കുന്നത്. മുൻപും ഇത്തരത്തിൽ പല ആരോപണങ്ങളും ഉയർന്നിട്ടുണ്ട്. എന്നാൽ പത്തനാപുരത്തെ ജനങ്ങൾക്ക് എന്നെ നന്നായി അറിയാം. എന്റെ 'എക്സറേ' അവർക്ക് കൃത്യമായി അറിയാവുന്നത് കൊണ്ട് ഇത്തരം പ്രചാരണങ്ങൾ അവിടെ വിലപ്പോകില്ല, ഗണേഷ് കുമാർ വ്യക്തമാക്കി.

വീടിനുള്ളിലെ ശത്രുക്കൾ

വീടിനുള്ളിൽ തന്നെ തനിക്ക് ശത്രുക്കളുണ്ടെന്ന് മന്ത്രി വെളിപ്പെടുത്തി. വീട്ടിലെ കാര്യങ്ങൾ പൊതുസമൂഹത്തിൽ പറയേണ്ട എന്ന് കരുതിയതാണ്, പക്ഷേ എനിക്ക് ഒന്നും മറയ്ക്കാനില്ല. ഇന്നേവരെ അഴിമതി നടത്തിയിട്ടില്ലാത്ത, മാന്യമായി പ്രവർത്തിക്കുന്ന ഒരു പൊതുപ്രവർത്തകനാണ് ഞാൻ. ഒരു സ്ത്രീയോടും ഇന്നേവരെ മോശമായി പെരുമാറിയിട്ടില്ല, അദ്ദേഹം പറഞ്ഞു. തന്റെ ഭാഗത്തുനിന്നുള്ള മാന്യത വരും ദിവസങ്ങളിലും തുടരുമെന്നും അദ്ദേഹം കൂട്ടിച്ചേർത്തു.

ശ്രീലേഖയ്ക്കും എൻഎസ്എസിനും മറുപടി

ബിജെപി കൗൺസിലർ ആർ. ശ്രീലേഖയ്ക്കെതിരെയും മന്ത്രി രൂക്ഷമായി പ്രതികരിച്ചു. തന്റെ വ്യക്തിജീവിതത്തിൽ ഇടപെടാൻ ശ്രീലേഖയ്ക്ക് എന്ത് അധികാരമാണുള്ളതെന്ന് അദ്ദേഹം ചോദിച്ചു. മേയർ സ്ഥാനം കിട്ടാത്തതിന്റെ കൊതിക്കെറുവാണ് അവർ തീർക്കുന്നത്. വട്ട് മൂത്താൽ ആരും എന്തും പരാതിപ്പെടും. ഇപ്പോൾ ഉയർന്ന ഈ ആരോപണങ്ങൾ യഥാർത്ഥത്തിൽ എന്റെ തെരഞ്ഞെടുപ്പ് ഭൂരിപക്ഷം കൂട്ടുകയേയുള്ളൂ, അദ്ദേഹം പരിഹസിച്ചു.

എൻഎസ്എസ് ജനറൽ സെക്രട്ടറി ജി. സുകുമാരൻ നായർ തനിക്ക് പിതൃതുല്യനാണെന്ന് ഗണേഷ് കുമാർ പറഞ്ഞു. സുകുമാരൻ നായർക്കൊപ്പം നിഴലായി നിൽക്കണമെന്നാണ് അച്ഛൻ മരിക്കുന്നതിന് മുൻപ് തന്നോട് പറഞ്ഞത്. അദ്ദേഹം ആവശ്യപ്പെട്ടാൽ ആ നിമിഷം മന്ത്രിസ്ഥാനം രാജിവെക്കാൻ തയ്യാറാണെന്നും അദ്ദേഹം വ്യക്തമാക്കി. പത്തനാപുരം താലൂക്ക് യൂണിയനെ നിയന്ത്രിക്കുന്നത് ജനറൽ സെക്രട്ടറി തന്നെയാണെന്നും താൻ കേവലം ഒരു കസേരയിൽ ഇരിക്കുന്നു എന്ന് മാത്രമേയുള്ളൂവെന്നും അദ്ദേഹം പറഞ്ഞു.

തന്റെ രാഷ്ട്രീയ നിലപാടുകളിലും പ്രവർത്തനങ്ങളിലും വിട്ടുവീഴ്ചയില്ലെന്നും വ്യക്തിപരമായ ആക്രമണങ്ങൾ കൊണ്ട് തന്നെ തളർത്താനാവില്ലെന്നും വ്യക്തമാക്കിക്കൊണ്ടാണ് മന്ത്രി തന്റെ പ്രതികരണം അവസാനിപ്പിച്ചത്. വരും ദിവസങ്ങളിൽ ഈ വിവാദം എങ്ങോട്ട് നീങ്ങുമെന്ന് രാഷ്ട്രീയ കേരളം ഉറ്റുനോക്കുകയാണ്.

---------------

Hindusthan Samachar / Roshith K