Thiruvananthapuram , 11 ഏപ്രില് (H.S.)

ഇന്ത്യയുടെ ജനാധിപത്യ ഉത്സവം ഉറ്റുനോക്കി ലോകരാജ്യങ്ങൾ

2026-ലെ കേരള നിയമസഭാ തിരഞ്ഞെടുപ്പിലെ ആസൂത്രണം, പങ്കാളിത്തം, സജ്ജീകരണങ്ങൾ എന്നിവയെ പ്രശംസിച്ച് 9 രാജ്യങ്ങളിൽ നിന്നുള്ള അന്താരാഷ്ട്ര പ്രതിനിധികൾ.

തിരുവനന്തപുരം/കൊച്ചി: കേരള നിയമസഭാ തിരഞ്ഞെടുപ്പ് ആഗോള ശ്രദ്ധയാകർഷിക്കുന്നു. ഭാരത തിരഞ്ഞെടുപ്പ് കമ്മീഷന്റെ അന്താരാഷ്ട്ര തിരഞ്ഞെടുപ്പ് സന്ദർശക പരിപാടിയുടെ (IEVP 2026) ഭാഗമായി 9 രാജ്യങ്ങളിൽ നിന്നുള്ള (അൽബേനിയ, എസ്തോണിയ, ഫിജി, ജോർജിയ, കെനിയ, നമീബിയ, സമോവ, സെയ്ഷെൽസ്, സീറ ലിയോൺ) 17 അന്താരാഷ്ട്ര പ്രതിനിധികൾ കേരളത്തിലെ തിരഞ്ഞെടുപ്പ് പ്രക്രിയ നേരിട്ട് വിലയിരുത്തി.

ഇന്ത്യയുടെ തിരഞ്ഞെടുപ്പ് പ്രക്രിയയുടെ വ്യാപ്തിയും കൃത്യതയും ഊർജ്ജസ്വലതയും അവർ നേരിട്ട് അനുഭവിച്ചറിഞ്ഞു.

5 രാജ്യങ്ങളിൽ നിന്നുള്ള (എസ്തോണിയ, ഫിജി, ജോർജിയ, നമീബിയ, കെനിയ) 10 പ്രതിനിധികൾ കൊച്ചി ജില്ലയും, 4 രാജ്യങ്ങളിൽ നിന്നുള്ള (അൽബേനിയ, സമോവ, സെയ്ഷെൽസ്, സീറ ലിയോൺ) 7 പ്രതിനിധികൾ തിരുവനന്തപുരം ജില്ലയും സന്ദർശിച്ചു.

തിരഞ്ഞെടുപ്പിനെ യഥാർത്ഥ ജനാധിപത്യ ഉത്സവം എന്ന് വിശേഷിപ്പിച്ച പ്രതിനിധികൾ, വോട്ടർമാരുടെ റെക്കോർഡ് പങ്കാളിത്തത്തിലും തിരഞ്ഞെടുപ്പ് കമ്മീഷന്റെ സൂക്ഷ്മമായ ആസൂത്രണത്തിലും തടസ്സമില്ലാത്ത നടത്തിപ്പിലും ആശ്ചര്യം പ്രകടിപ്പിച്ചു.

സന്ദർശനത്തിന്റെ പ്രധാന ഘട്ടങ്ങൾ:

വിതരണ കേന്ദ്രങ്ങൾ (ഏപ്രിൽ 8-9): അന്താരാഷ്ട്ര പ്രതിനിധികൾ തങ്ങളുടെ സന്ദർശനം ആരംഭിച്ചത് വിതരണ കേന്ദ്രങ്ങൾ സന്ദർശിച്ചുകൊണ്ടാണ്. പോളിംഗ് സാമഗ്രികളുടെ വിതരണവും ഉദ്യോഗസ്ഥരുടെ വിന്യാസവും എത്രത്തോളം ചിട്ടയായാണ് നടപ്പിലാക്കുന്നതെന്ന് അവർ നിരീക്ഷിച്ചു.

സമോവയിൽ നിന്നുള്ള രീതികളിൽ നിന്നും തികച്ചും വ്യത്യസ്തമാണ് ഇവിടുത്തെ വിതരണ പ്രക്രിയ. ഇത്രയധികം വിഭാഗങ്ങളായി തിരിച്ച് ഓരോരുത്തർക്കും കൃത്യമായി സാമഗ്രികൾ നൽകുന്ന രീതി അത്ഭുതകരമാണ്. - മിസ്. ഷാലോൺ സോഫിയ ടൈം (സമോവ), തിരുവനന്തപുരം.

സുരക്ഷയും സുതാര്യതയും: മുഖ്യ തിരഞ്ഞെടുപ്പ് ഓഫീസറുമായും (CEO) സ്റ്റേറ്റ് പോലീസ് നോഡൽ ഓഫീസറുമായും പ്രതിനിധികൾ ആശയവിനിമയം നടത്തി. പോളിംഗ് സ്റ്റേഷനുകളിലെ 100% വെബ്കാസ്റ്റിംഗ് നിരീക്ഷിക്കുന്നതിനായി സി.ഇ.ഒ ഓഫീസുകളിൽ സജ്ജീകരിച്ചിട്ടുള്ള സി.സി.ടി.വി കൺട്രോൾ റൂമുകൾ സന്ദർശിച്ച അവർ, ഇത് സുതാര്യതയുടെ കരുത്തുറ്റ തൂണാണെന്ന് വിശേഷിപ്പിച്ചു.

പോളിംഗ് ദിനം: പോളിംഗ് ദിനത്തിൽ രാവിലെ മോക്ക് പോളുകൾ നിരീക്ഷിച്ച സംഘം, തുടർന്ന് കൊച്ചിയിലെയും തിരുവനന്തപുരത്തെയും വിവിധ പോളിംഗ് സ്റ്റേഷനുകൾ സന്ദർശിച്ചു. റാംപുകൾ, വീൽചെയറുകൾ, വോളന്റിയർമാർ, ക്രഷ് (Creche) സൗകര്യങ്ങൾ എന്നിവ ഉൾപ്പെടെയുള്ള ഭിന്നശേഷി സൗഹൃദ സജ്ജീകരണങ്ങളെ അവർ പ്രശംസിച്ചു. വനിതകളും ഭിന്നശേഷിക്കാരും നിയന്ത്രിക്കുന്ന പ്രത്യേക പോളിംഗ് സ്റ്റേഷനുകൾ ശ്രദ്ധയാകർഷിച്ചു.

---------------

Hindusthan Samachar / CHANDHU CHANDRASEKHAR