Dubai , 12 ഏപ്രില് (H.S.)

യുഎഇയില് വീണ്ടും മഴ ശക്തമാവുകയാണ്. അബുദാബിയില് മേഘാവൃതമായ അന്തരീക്ഷമാണ്. ശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്.

ദുബായില് നേരിയ മഴയ്ക്ക് ശേഷം മൂടിക്കെട്ടിയ അന്തരീക്ഷമാണ്. യുഎഇ ദേശീയ കാലാവസ്ഥാ നിരീക്ഷണ കേന്ദ്രംപ്രകാരം, സംവഹന മേഘങ്ങളാല് നേരിയതോ, മിതമായതോ, കനത്തതോ ആയ ഇടവിട്ടുള്ള മഴ പ്രതീക്ഷിക്കുന്നുണ്ട്.ഇതിന് പിന്നാലെ ജാഗ്രതയ്ക്ക് മഞ്ഞ അലർട്ട് പുറപ്പെടുവിച്ചിട്ടുണ്ട്.

തെക്കുപടിഞ്ഞാറൻ യുഎഇയില് നിന്ന് വടക്കുകിഴക്ക് ദിശയിലേക്ക് നീങ്ങുന്ന മഴമേഘങ്ങള് ഉച്ചയോടെ ഗള്ഫ് തീരങ്ങളില് എത്തുമെന്നും, പ്രവചിച്ചതിലും തീവ്രമായേക്കാമെന്നും ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്കി. ഉപരിതല, ഉയർന്ന അന്തരീക്ഷ ന്യൂനമർദ്ദങ്ങളാണ് ഈ അസ്ഥിര കാലാവസ്ഥയുടെ കാരണം. നേരത്തെ പല ദിവസങ്ങളിലും യുഎഇയില് മഴ പെയ്തിരുന്നു, അതിന്റെ തുടർച്ചയാണ് ഇപ്പോഴത്തെ കാലാവസ്ഥ.

കഴിഞ്ഞ മാർച്ചില് യുഎഇയില് അസാധാരണമായ മഴ വെള്ളപ്പൊക്കത്തിനും ദൈനംദിന ജീവിതം തടസപ്പെടുത്തുന്നതിനും കാരണമായിരുന്നു. നിലവില്, രാജ്യത്തുടനീളം ഭാഗികമായ മേഘാവൃതമായ കാലാവസ്ഥ, ഒറ്റപ്പെട്ട മഴ, താപനില കുറയല് എന്നിവ പ്രതീക്ഷിക്കുന്നു. മേഘങ്ങളോടൊപ്പം കാറ്റ് ശക്തമാകുമ്പോള് പൊടിക്കാറ്റിനും കാഴ്ചക്കുറവിനും സാധ്യതയുണ്ട്.

മഴയുള്ള സാഹചര്യങ്ങളില് അനാവശ്യ യാത്രകള് ഒഴിവാക്കാനും സുരക്ഷാ മുൻകരുതലുകള് പാലിക്കാനും ആഭ്യന്തര മന്ത്രാലയം അഭ്യർത്ഥിച്ചു. ഡ്രൈവർമാർ അതീവ ശ്രദ്ധ പുലർത്തുകയും കാഴ്ച കുറയുമ്പോള് ലോ-ബീം ഹെഡ്ലൈറ്റുകള് ഉപയോഗിക്കുകയും വേണം. ഔദ്യോഗിക വിവരങ്ങള് മാത്രം ആശ്രയിച്ച് അധികൃതരുടെ നിർദ്ദേശങ്ങള് പാലിക്കാനും കിംവദന്തികള് പ്രചരിപ്പിക്കുന്നത് ഒഴിവാക്കാനും എൻസിഎം വീണ്ടും ആവശ്യപ്പെട്ടു.

അബുദാബിയിലെ എമർജൻസീസ്, ക്രൈസിസ് ആൻഡ് ഡിസാസ്റ്റർ മാനേജ്മെന്റ് സെന്റർ, മഴക്കാലത്ത് വെള്ളം കെട്ടിക്കിടക്കുന്ന പ്രദേശങ്ങളും വെള്ളപ്പൊക്കമുള്ള സ്ഥലങ്ങളും ഒഴിവാക്കാൻ പൊതുജനങ്ങള്ക്ക് നിർദ്ദേശം നല്കി. സുരക്ഷ ഉറപ്പാക്കുന്നതിൻ്റെ ഭാഗമായാണ് ഈ മുന്നറിയിപ്പ്. മോശം കാലാവസ്ഥയെ തുടർന്ന് വേഗത പരിധിയില് വരുത്തിയ മാറ്റങ്ങള് ഡ്രൈവർമാർ കൃത്യമായി പാലിക്കണമെന്ന് അബുദാബി, ദുബായ് പോലീസ് ആവശ്യപ്പെട്ടു.

കൂടാതെ, മറ്റ് വാഹനങ്ങളില് നിന്ന് സുരക്ഷിതമായ അകലം പാലിക്കാനും, പെട്ടെന്ന് ബ്രേക്ക് ചെയ്യുന്നതിന് പകരം സാവധാനം ബ്രേക്ക് ചെയ്യാനും, നനഞ്ഞ റോഡുകളില് വാഹനം തെന്നിമാറുന്നത് ഒഴിവാക്കാൻ വളവുകളില് വേഗത കുറയ്ക്കാനും ഡ്രൈവർമാരോട് നിർദ്ദേശിച്ചിട്ടുണ്ട്. രാജ്യത്തിന്റെ വിവിധ ഭാഗങ്ങളില് അടുത്തിടെ പെയ്ത മഴ വെള്ളപ്പൊക്കത്തിന് കാരണമായി.

ദുബായ്, ഷാർജ, റാസല്ഖൈമ എന്നിവിടങ്ങളിലെ റോഡുകളില് വെള്ളം കയറിയതായി റിപ്പോർട്ടുകളുണ്ട്. ബാധിത പ്രദേശങ്ങളില് അധികൃതർ വെള്ളം ഒഴുക്കിവിടുന്നതിനുള്ള പ്രവർത്തനങ്ങള് ഊർജ്ജിതമാക്കിയിട്ടുണ്ട്. വെള്ളക്കെട്ട് നിറഞ്ഞ റോഡുകളിലൂടെ ആളുകള് സഞ്ചരിക്കുന്ന ദൃശ്യങ്ങളും പുറത്തുവന്നിരുന്നു.

---------------

Hindusthan Samachar / CHANDHU CHANDRASEKHAR