Kannur, 14 ഏപ്രില് (H.S.)

കണ്ണൂർ: അഞ്ചരക്കണ്ടി ദന്തൽ കോളജിലെ ബി.ഡി.എസ് വിദ്യാർത്ഥി നിതിൻ രാജിന്റെ ആത്മഹത്യയിലേക്ക് നയിച്ചത് കോളജ് അധികൃതരുടെ ക്രൂരമായ 'വിചാരണ'യാണെന്ന നിഗമനത്തിൽ പോലീസ്. ലോൺ ആപ്പ് ഭീഷണിക്ക് പിന്നാലെ പ്രിൻസിപ്പൽ നിതിന്റെ ഫോൺ പിടിച്ചുവെക്കുകയും മാനിസികമായി തളർത്തുന്ന രീതിയിൽ ചോദ്യം ചെയ്യുകയും ചെയ്തതാണ് മരണത്തിന് പ്രധാന കാരണമായതെന്ന് പോലീസ് വ്യക്തമാക്കുന്നു.

മാനസിക പീഡനവും കോളജിന്റെ ഇടപെടലും

ലോൺ ആപ്പുകളിൽ നിന്ന് നിതിൻ പണമെടുത്തിരുന്നതായാണ് സൂചന. പണം തിരിച്ചടയ്ക്കാൻ വൈകിയതോടെ ആപ്പ് ഏജന്റുമാർ നിതിന്റെ കോൺടാക്റ്റ് ലിസ്റ്റിലുള്ള അധ്യാപികയ്ക്കും സഹോദരിക്കും സന്ദേശങ്ങൾ അയച്ചിരുന്നു. ഇതിനെത്തുടർന്ന് പ്രിൻസിപ്പൽ നിതിനെ വിളിപ്പിക്കുകയും ഫോൺ ബലമായി പിടിച്ചുവെക്കുകയും ചെയ്തു. ലോൺ ആപ്പുകാരുടെ സന്ദേശം ലഭിച്ച അധ്യാപിക നിതിനെതിരെ പോലീസിൽ പരാതി നൽകാൻ ഒരുങ്ങിയതും വിദ്യാർത്ഥിയെ കടുത്ത മാനസിക സമ്മർദ്ദത്തിലാക്കി. താൻ കാരണം കുടുംബത്തിനും കോളജിനും അപമാനം ഉണ്ടാകുമോ എന്ന ഭയം നിതിനെ ആത്മഹത്യയിലേക്ക് നയിച്ചതാകാമെന്നാണ് പ്രാഥമിക നിഗമനം.

എന്തെങ്കിലും പിശക് സംഭവിച്ചിട്ടുണ്ടെങ്കിൽ അത് കുടുംബത്തെ അറിയിക്കാമായിരുന്നുവെന്ന് നിതിന്റെ സഹോദരി ഭർത്താവ് അശോകൻ പറഞ്ഞു. അധ്യാപികയുടെ നമ്പർ റഫറൻസ് ആയി നൽകിയതാകാം ഇത്തരം സന്ദേശങ്ങൾ പോകാൻ കാരണമെന്നും അദ്ദേഹം കൂട്ടിച്ചേർത്തു.

അന്വേഷണം അട്ടിമറിക്കാൻ ശ്രമമെന്ന് ആരോപണം

അതേസമയം, നിതിന്റെ മരണത്തിൽ പ്രതികളായ അധ്യാപകരെ സംരക്ഷിക്കാൻ പോലീസ് ശ്രമിക്കുന്നതായി അംബേദ്കറേറ്റ് ഡെമോക്രാറ്റിക് ഫ്രണ്ട് ആരോപിച്ചു. ലോൺ ആപ്പ് വിഷയം മാത്രം ഉയർത്തിക്കാട്ടി കോളജ് അധികൃതരുടെ പീഡനങ്ങളെ മൂടിവെക്കാനാണ് സിറ്റി പോലീസ് കമ്മിഷണറുടെ ശ്രമമെന്ന് സംഘടന നേതാവ് എം. ഗീതാനന്ദൻ കുറ്റപ്പെടുത്തി. നിതിൻ നേരിട്ടിരുന്ന ജാതീയ അധിക്ഷേപങ്ങളെക്കുറിച്ച് കൃത്യമായ അന്വേഷണം വേണമെന്നും അധ്യാപകരെ ഉടൻ അറസ്റ്റ് ചെയ്യണമെന്നും ആവശ്യപ്പെട്ട് സംഘടന കോളജിലേക്ക് പ്രതിഷേധ മാർച്ച് പ്രഖ്യാപിച്ചിട്ടുണ്ട്.

പ്രതികൾ ഒളിവിൽ

കേസിൽ പ്രതിചേർക്കപ്പെട്ട ഡോക്ടർ എം.കെ. റാം, ഡോക്ടർ സംഗീത എന്നിവർ നിലവിൽ ഒളിവിലാണ്. ഇവർ മുൻകൂർ ജാമ്യത്തിനായി ശ്രമിക്കുന്നതായാണ് വിവരം. കുടുംബാംഗങ്ങളുടെ മൊഴി രേഖപ്പെടുത്താൻ തിരുവനന്തപുരത്തേക്ക് പോയ അന്വേഷണ സംഘം ഇന്ന് തിരിച്ചെത്തുന്നതോടെ അറസ്റ്റ് ഉൾപ്പെടെയുള്ള നടപടികളിലേക്ക് പോലീസ് കടക്കും. നിതിന്റെ ഫോൺ ശാസ്ത്രീയ പരിശോധനയ്ക്കായി സൈബർ സെല്ലിന് കൈമാറിയിട്ടുണ്ട്. ലോൺ ആപ്പുകളിൽ നിന്നുള്ള ഭീഷണിയുടെ സ്വഭാവം പരിശോധിച്ച ശേഷം കൂടുതൽ വകുപ്പുകൾ ചേർക്കാനാണ് പോലീസിന്റെ തീരുമാനം.

കോളജിനുള്ളിലെ മാനസിക പീഡനവും സാമ്പത്തിക സമ്മർദ്ദവും ഒത്തുചേർന്നതാണ് ഒരു യുവ വിദ്യാർത്ഥിയുടെ ജീവൻ കവർന്നതെന്നത് വലിയ ചർച്ചകൾക്കാണ് വഴിതുറന്നിരിക്കുന്നത്.

---------------

Hindusthan Samachar / Roshith K