Thrikkakkara, 15 ഏപ്രില് (H.S.)

തൃക്കാക്കര ഉപതിരഞ്ഞെടുപ്പുമായി ബന്ധപ്പെട്ട് നിർണ്ണായക രാഷ്ട്രീയ നിരീക്ഷണങ്ങളുമായി സംവിധായകനും ബിഗ് ബോസ് വിജയിയുമായ അഖിൽ മാരാർ. മണ്ഡലത്തിൽ എൻഡിഎ സ്ഥാനാർത്ഥിയായി മത്സരിക്കുന്ന അഖിൽ മാരാർ, തിരഞ്ഞെടുപ്പ് ഫലത്തെക്കുറിച്ചുള്ള തന്റെ ആത്മവിശ്വാസവും രാഷ്ട്രീയ കണക്കുകളും പങ്കുവെച്ചു. തൃക്കാക്കരയിൽ എൻഡിഎയ്ക്ക് 10 മുതൽ 13 ശതമാനം വരെ വോട്ട് ലഭിക്കുമെന്നാണ് അഖിൽ മാരാർ അവകാശപ്പെടുന്നത്.

കണക്കുകൾ ഇങ്ങനെ:

മണ്ഡലത്തിൽ ആകെ പോൾ ചെയ്തത് 1.40 ലക്ഷം വോട്ടുകളാണെന്ന് അഖിൽ മാരാർ ചൂണ്ടിക്കാട്ടി. ഇതിൽ എൻഡിഎയ്ക്ക് ഏകദേശം 20,000 വോട്ടുകൾ ലഭിക്കാനാണ് സാധ്യതയെന്ന് അദ്ദേഹം വിലയിരുത്തുന്നു. ബാക്കിയുള്ള 1.20 ലക്ഷം വോട്ടുകൾ എൽഡിഎഫും യുഡിഎഫും എങ്ങനെ പങ്കിടുമെന്നതിലാണ് മണ്ഡലത്തിന്റെ വിധി നിശ്ചയിക്കപ്പെടുക.

എൽഡിഎഫിനെതിരെയുള്ള വിമർശനം:

ഇടതുപക്ഷ സ്ഥാനാർത്ഥി പുഷ്പ ദാസിനെതിരെ കടുത്ത വിമർശനമാണ് അഖിൽ മാരാർ ഉയർത്തുന്നത്. മണ്ഡലത്തിന് പുറത്തുള്ള വ്യക്തിയാണ് സ്ഥാനാർത്ഥിയെന്നും, കമ്മ്യൂണിസ്റ്റ് പാർട്ടി പ്രവർത്തകർക്ക് പോലും പരിചിതമല്ലാത്ത ഒരാളെയാണ് ഇത്തവണ ചിഹ്നത്തിൽ മത്സരിപ്പിക്കുന്നതെന്നും അദ്ദേഹം പറഞ്ഞു. സോഷ്യൽ മീഡിയ പ്രചരണത്തിലോ ഗ്രൗണ്ട് വർക്കിലോ ഇടതുപക്ഷം സജീവമല്ലെന്നും, ലോക്സഭ തിരഞ്ഞെടുപ്പിൽ ലഭിച്ച 27,000 വോട്ടുകളേക്കാൾ വലിയ വർദ്ധനവ് അവർക്ക് ഇത്തവണ ഉണ്ടാകില്ലെന്നും മാരാർ കൂട്ടിച്ചേർത്തു.

യുഡിഎഫ് വോട്ടുകളിൽ വിള്ളലുണ്ടാകുമോ?

നിലവിലെ എംഎൽഎ ഉമ തോമസിനെതിരെയും അഖിൽ മാരാർ വിമർശനം ഉന്നയിച്ചു. കഴിഞ്ഞ തവണത്തെ സഹതാപ തരംഗമോ ട്വന്റി-20 സ്ഥാനാർത്ഥിയെ നിർത്താതിരുന്ന സാഹചര്യമോ ഇത്തവണ യുഡിഎഫിന് അനുകൂലമല്ല. കൂടാതെ, കോൺഗ്രസിനുള്ളിലെ ഗ്രൂപ്പ് പോരുകളും ഉമ തോമസിനോടുള്ള വോട്ടർമാരുടെ അതൃപ്തിയും തനിക്ക് ഗുണമാകുമെന്ന് അദ്ദേഹം കരുതുന്നു.

കഴിഞ്ഞ തവണ ഉമ തോമസിന് ലഭിച്ച വോട്ടുകളിൽ ഒരു വലിയ വിഭാഗം ഇത്തവണ എന്നിലേക്ക് വരും. കോൺഗ്രസിന്റെ ഉറച്ച വോട്ടുകളിൽ വിള്ളലുണ്ടാകുന്നത് എനിക്ക് അനുകൂലമാകും, അഖിൽ മാരാർ പറഞ്ഞു.

പ്രകൃതി എനിക്കായി ഒരുക്കിയത്

തൃക്കാക്കര മാറാൻ തീരുമാനിച്ചിട്ടുണ്ടെങ്കിൽ അത് സംഭവിച്ചിരിക്കുമെന്ന ആത്മവിശ്വാസത്തിലാണ് അഖിൽ മാരാർ. മെയ് 4-ന് പുറത്തുവരുന്ന തിരഞ്ഞെടുപ്പ് ഫലം കേരളത്തെ അത്ഭുതപ്പെടുത്തുമെന്നും അദ്ദേഹം അവകാശപ്പെട്ടു.

ചക്ക വീണ് മുയൽ ചാവുന്ന സർവ്വേ ഫലങ്ങളല്ല ഞാൻ പറയുന്നത്. ജനങ്ങൾക്കിടയിൽ പ്രവർത്തിച്ചും അവരുടെ മനസ്സിലെ ചിന്തകൾ നേരിട്ട് അറിഞ്ഞും ലഭിച്ച ആത്മവിശ്വാസമാണിത്. രാഷ്ട്രീയമല്ല, മതങ്ങളാണ് വിജയിക്കുന്നതെങ്കിൽ മാത്രമേ ഫലം മറിച്ചാവുകയുള്ളൂ, അദ്ദേഹം വ്യക്തമാക്കി.

സാമൂഹിക മാധ്യമങ്ങളിലൂടെയും നേരിട്ടുള്ള പ്രചാരണത്തിലൂടെയും തൃക്കാക്കരയിലെ ജനങ്ങളോട് സംസാരിച്ച തനിക്ക് അനുകൂലമായ വിധി ഉണ്ടാകുമെന്നാണ് അഖിൽ മാരാരുടെ ഉറച്ച വിശ്വാസം. തിരഞ്ഞെടുപ്പ് ചൂടിലുള്ള തൃക്കാക്കരയിൽ അഖിൽ മാരാരുടെ ഈ രാഷ്ട്രീയ കണക്കുകൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്.

---------------

Hindusthan Samachar / Roshith K