Kannur, 17 ഏപ്രില് (H.S.)

കണ്ണൂർ: അഞ്ചരക്കണ്ടി ദന്തൽ കോളേജിലെ ബി.ഡി.എസ് വിദ്യാർത്ഥി നിതിൻ രാജ് ജീവനൊടുക്കിയ സംഭവത്തിൽ പ്രതികളായ അധ്യാപകരുടെ മുൻകൂർ ജാമ്യഹർജി പരിഗണിക്കുന്നത് കോടതി മാറ്റി. കേസിലെ മുഖ്യപ്രതികളായ ഡോ. എം.കെ. റാം, ഡോ. സംഗീത നമ്പ്യാർ എന്നിവർ നൽകിയ ഹർജിയാണ് തലശ്ശേരി ജില്ലാ സെഷൻസ് കോടതി ഈ മാസം 22-ലേക്ക് മാറ്റിയത്. അതുവരെ പ്രതികൾക്ക് അറസ്റ്റിൽ നിന്ന് ഇടക്കാല സംരക്ഷണം നൽകാൻ കോടതി വിസമ്മതിച്ചു.

ജാതി അധിക്ഷേപവും മാനസിക പീഡനവും

തിരുവനന്തപുരം ഉഴമലയ്ക്കൽ സ്വദേശിയായ നിതിൻ രാജിനെ (21) കഴിഞ്ഞ ഏപ്രിൽ 10-നാണ് കോളേജ് ഹോസ്റ്റൽ കെട്ടിടത്തിൽ നിന്നും വീണ് മരിച്ച നിലയിൽ കണ്ടെത്തിയത്. നിതിന്റെ മരണത്തിന് പിന്നിൽ അധ്യാപകരുടെ നിരന്തരമായ ജാതി അധിക്ഷേപവും മാനസിക പീഡനവുമാണെന്ന് കുടുംബം ആരോപിച്ചിരുന്നു. ജാതിപ്പേര് വിളിച്ചും നിറത്തിന്റെ പേരിൽ പരിഹസിച്ചും ഡോ. റാം തനിയെ ക്രൂരമായി അപമാനിച്ചിരുന്നതായി നിതിൻ അയച്ച ശബ്ദസന്ദേശങ്ങൾ പുറത്തുവന്നിരുന്നു.

ഇതേത്തുടർന്ന് ആത്മഹത്യാ പ്രേരണാക്കുറ്റത്തിന് പുറമെ പട്ടികജാതി-പട്ടികവർഗ വിരുദ്ധ പീഡന നിരോധന നിയമപ്രകാരവും (SC/ST Act) പോലീസ് ഇവർക്കെതിരെ കേസെടുത്തിട്ടുണ്ട്.

പ്രതികളുടെ വാദം

ഒളിവിൽ കഴിയുന്ന അധ്യാപകർ തങ്ങൾക്ക് മരണത്തിൽ പങ്കില്ലെന്നാണ് ജാമ്യാപേക്ഷയിൽ വാദിക്കുന്നത്. നിതിൻ രാജ് ലോൺ ആപ്പുകളുടെ ഭീഷണി നേരിട്ടിരുന്നതായും അത് മൂലമുള്ള മാനസിക സമ്മർദ്ദമാണ് ആത്മഹത്യയിലേക്ക് നയിച്ചതെന്നും ഹർജിയിൽ പറയുന്നു. എന്നാൽ, അധ്യാപകരുടെ പീഡനം കാരണമാണ് നിതിൻ മരിച്ചതെന്ന ഉറച്ച നിലപാടിലാണ് വിദ്യാർത്ഥി സംഘടനകളും കുടുംബവും.

നടപടി ശക്തമാക്കി അധികൃതർ

വിദ്യാർത്ഥി പ്രതിഷേധം ശക്തമായതിനെത്തുടർന്ന് ഡോ. എം.കെ. റാമിനെ കഴിഞ്ഞ ദിവസം കോളേജ് മാനേജ്മെന്റ് പുറത്താക്കിയിരുന്നു. നേരത്തെ ഇരുവരെയും സസ്പെൻഡ് ചെയ്തിരുന്നുവെങ്കിലും വിദ്യാർത്ഥികൾ സമരം തുടർന്നതോടെയാണ് കടുത്ത നടപടിയിലേക്ക് നീങ്ങിയത്. നിലവിൽ ഏഴംഗ പ്രത്യേക സംഘമാണ് കേസ് അന്വേഷിക്കുന്നത്.

ദേശീയ ദന്തൽ കമ്മീഷനും ദേശീയ പട്ടികജാതി കമ്മീഷനും വിഷയത്തിൽ ഇടപെട്ടിട്ടുണ്ട്. കോളേജ് പ്രിൻസിപ്പാളിനോട് സംഭവത്തെക്കുറിച്ച് വിശദമായ റിപ്പോർട്ട് കമ്മീഷൻ ആവശ്യപ്പെട്ടു. കേരളത്തിലെ കലാലയങ്ങളിൽ നിലനിൽക്കുന്ന ജാതി വിവേചനത്തിനെതിരെ വലിയ രീതിയിലുള്ള രാഷ്ട്രീയ ചർച്ചകൾക്കും ഈ സംഭവം വഴിതുറന്നിട്ടുണ്ട്.

കേസിൽ കൃത്യമായ തെളിവുകൾ ശേഖരിക്കാൻ നിതിന്റെ ഫോണിലെ ശബ്ദരേഖകളും മറ്റ് ഡിജിറ്റൽ തെളിവുകളും പോലീസ് സൈബർ വിഭാഗത്തിന്റെ സഹായത്തോടെ പരിശോധിച്ച് വരികയാണ്. 22-ന് ജാമ്യഹർജി വീണ്ടും പരിഗണിക്കുമ്പോൾ പോലീസിന്റെ റിപ്പോർട്ട് നിർണ്ണായകമാകും.

---------------

Hindusthan Samachar / Roshith K