Valpara , 17 ഏപ്രില് (H.S.)

വാൽപ്പാറ: വിനോദസഞ്ചാരത്തിന് എത്തിയ മലയാളി സംഘം സഞ്ചരിച്ച ടൂറിസ്റ്റ് വാൻ കൊക്കയിലേക്ക് മറിഞ്ഞ് പത്ത് മരണം. മലപ്പുറം പാങ്ങിലെ പാറമ്മൽ എൽപി സ്കൂളിലെ അധ്യാപകരും ജീവനക്കാരും അവരുടെ കുടുംബാംഗങ്ങളുമാണ് അപകടത്തിൽപ്പെട്ടത്. പൊള്ളാച്ചി-വാൽപ്പാറ പാതയിലെ 13-ാം ഹെയർപിൻ വളവിൽ നിയന്ത്രണം വിട്ട വാഹനം സംരക്ഷണ ഭിത്തി തകർത്ത് 600 അടിയോളം താഴ്ചയിലുള്ള ഒൻപതാം വളവിലേക്ക് പതിക്കുകയായിരുന്നു.

14-ാം വളവിലെത്തിയപ്പോൾ വലിയൊരു ശബ്ദം കേട്ടു

അപകടത്തിന് ദൃക്സാക്ഷിയായ ഹാരിസ് എന്ന യുവാവ് ഭീതിയോടെയാണ് ആ നിമിഷങ്ങൾ പങ്കുവെച്ചത്. അപകടത്തിൽപ്പെട്ട വാഹനത്തിന് തൊട്ടുപിന്നാലെ കാറിൽ വരികയായിരുന്നു ഇവർ.

16-ാം വളവിൽ വെച്ച് ഫോട്ടോ എടുക്കുന്ന സമയത്ത് ഈ ട്രാവലറിലുള്ളവർ അവിടെ ഉണ്ടായിരുന്നു. അവിടെ നിന്ന് അവർ മുന്നോട്ട് പോയി. ഞങ്ങൾ 14-ാം വളവിൽ എത്തിയപ്പോഴാണ് ഭയാനകമായ ഒരു ശബ്ദം കേൾക്കുന്നത്. ഓടിച്ചെന്ന് നോക്കിയപ്പോൾ 13-ാം വളവിലെ സംരക്ഷണ ഭിത്തി തകർത്ത് വാഹനം താഴേക്ക് പതിച്ചിരുന്നു. വാഹനം താഴെ ഒൻപതാം വളവിൽ പൂർണ്ണമായും തകർന്ന് കിടക്കുകയായിരുന്നു. - ഹാരിസ് പറഞ്ഞു.

അപകടത്തിന്റെ വ്യാപ്തി

-

മരണസംഖ്യ: അപകടസ്ഥലത്ത് വെച്ച് തന്നെ എട്ടുപേർ മരിച്ചു. ആശുപത്രിയിൽ വെച്ച് ഒരു കുട്ടിയടക്കം രണ്ടുപേർ കൂടി മരണത്തിന് കീഴടങ്ങിയതോടെ ആകെ മരണം പത്തായി.

-

മരിച്ചവർ: മരിച്ചവരിൽ ഭൂരിഭാഗവും സ്ത്രീകളാണ്. അജിത, റംല, സുഹ്റ, ആശ, മജീദ്, സജിത, ഷക്കീല, റുക്കിയ, ഹിഷാം തുടങ്ങിയവരെയാണ് തിരിച്ചറിഞ്ഞത്.

-

പരിക്കേറ്റവർ: ഗുരുതരമായി പരിക്കേറ്റ നാല് പേരെ കോയമ്പത്തൂർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

രക്ഷാപ്രവർത്തനം

അപകടം നടന്ന ഉടനെ തന്നെ പിന്നാലെ വന്ന മറ്റ് വിനോദസഞ്ചാരികളും നാട്ടുകാരും രക്ഷാപ്രവർത്തനത്തിന് ഇറങ്ങി. വനം വകുപ്പിന്റെയും പൊലീസിന്റെയും ഫയർഫോഴ്സിന്റെയും നേതൃത്വത്തിൽ മണിക്കൂറുകൾ നീണ്ട പരിശ്രമത്തിനൊടുവിലാണ് കുത്തനെയുള്ള കൊക്കയിൽ നിന്നും മൃതദേഹങ്ങളും പരിക്കേറ്റവരെയും പുറത്തെടുത്തത്.

വാൽപ്പാറയിലെ കാഴ്ച്ചകൾ കണ്ട് മടങ്ങുന്നതിനിടെയാണ് നാടിനെ നടുക്കിയ ഈ ദുരന്തം സംഭവിച്ചത്. സംഭവത്തിൽ മുഖ്യമന്ത്രി അനുശോചനം രേഖപ്പെടുത്തുകയും പരിക്കേറ്റവർക്ക് ആവശ്യമായ ചികിത്സ ഉറപ്പാക്കാൻ നിർദ്ദേശിക്കുകയും ചെയ്തിട്ടുണ്ട്.

---------------

Hindusthan Samachar / Roshith K