Kannur, 18 ഏപ്രില് (H.S.)

കണ്ണൂർ: സുഹൃത്തിനെ തലയ്ക്കടിച്ച് വീഴ്ത്തിയ ശേഷം സംഭവസ്ഥലത്തുനിന്ന് രക്ഷപ്പെടാൻ ശ്രമിച്ച യുവാവ് ട്രെയിൻ തട്ടി മരിച്ചു. കണ്ണൂർ പാപ്പിനിശ്ശേരി സ്വദേശിയായ ഷെഫീഖ് ആണ് മരിച്ചത്. ഷെഫീഖിന്റെ ആക്രമണത്തിൽ തലയ്ക്ക് ഗുരുതരമായി പരിക്കേറ്റ സുഹൃത്ത് പ്രശാന്തൻ തീവ്രപരിചരണ വിഭാഗത്തിൽ ചികിത്സയിലാണ്.

ദീർഘകാലമായി അടുത്ത സുഹൃത്തുക്കളായിരുന്നു ഷെഫീഖും പ്രശാന്തനും. വർഷങ്ങളോളം വിദേശത്ത് ജോലി ചെയ്തിരുന്ന ഷെഫീഖ് അടുത്ത കാലത്താണ് നാട്ടിലെത്തിയത്. നാട്ടിൽ ഒരു പുതിയ വ്യാപാര സ്ഥാപനം തുടങ്ങാനുള്ള തയ്യാറെടുപ്പിലായിരുന്നു അദ്ദേഹം. ഈ കടയുടെ ഇലക്ട്രിക്കൽ ജോലികൾ ചെയ്തിരുന്നത് സുഹൃത്തായ പ്രശാന്തനായിരുന്നു.

ശനിയാഴ്ച രാവിലെ പ്രശാന്തന്റെ വീട്ടിലെത്തിയ ഷെഫീഖ് പെട്ടെന്നുണ്ടായ പ്രകോപനത്തെ തുടർന്ന് കയ്യിലുണ്ടായിരുന്ന മാരകായുധം കൊണ്ട് സുഹൃത്തിനെ തലയ്ക്കടിക്കുകയായിരുന്നു. ആക്രമണത്തിന് ശേഷം പരിഭ്രാന്തനായി റെയിൽവേ ട്രാക്ക് വഴി ഓടി രക്ഷപ്പെടാൻ ശ്രമിക്കുന്നതിനിടെയാണ് ഷെഫീഖ് ട്രെയിൻ തട്ടി മരിച്ചത്.

സംഭവത്തിൽ വളപട്ടണം പോലീസ് കേസെടുത്ത് അന്വേഷണം ആരംഭിച്ചു. ഏറെ കാലത്തെ സൗഹൃദമുണ്ടായിരുന്ന ഇവർക്കിടയിൽ പെട്ടെന്നുണ്ടായ തർക്കത്തിന്റെയും ആക്രമണത്തിന്റെയും കാരണം വ്യക്തമായിട്ടില്ല. പ്രശാന്തന്റെ ആരോഗ്യനില തൃപ്തികരമല്ലെന്നാണ് ആശുപത്രി വൃത്തങ്ങൾ നൽകുന്ന വിവരം. മൃതദേഹം പോസ്റ്റ്മോർട്ടം നടപടികൾക്കായി ജില്ലാ ആശുപത്രിയിലേക്ക് മാറ്റി.

---------------

Hindusthan Samachar / Roshith K