Tehran, 20 ഏപ്രില് (H.S.)

വാഷിംഗ്ടൺ/ടെഹ്റാൻ: രാജ്യാന്തര സമുദ്രമേഖലയിൽ ഇറാൻ്റെ ചരക്കുകപ്പൽ അമേരിക്കൻ നാവികസേന പിടിച്ചെടുത്തതോടെ പശ്ചിമേഷ്യയിൽ വീണ്ടും യുദ്ധഭീതി പടരുന്നു. അമേരിക്കൻ ഉപരോധം ലംഘിച്ച് സഞ്ചരിച്ചുവെന്ന് ആരോപിച്ചാണ് 'തൗസ്ക' (Tauska) എന്ന ഇറാനിയൻ കപ്പൽ യുഎസ് നേവി കസ്റ്റഡിയിലെടുത്തത്. നടപടി 'കടൽക്കൊള്ള'യാണെന്ന് വിശേഷിപ്പിച്ച ഇറാൻ സൈന്യം, അമേരിക്കയ്ക്ക് ഉടനടി ശക്തമായ തിരിച്ചടി നൽകുമെന്ന് മുന്നറിയിപ്പ് നൽകി.

പിടിച്ചെടുക്കലും ട്രംപിൻ്റെ പ്രതികരണവും:

യുഎസ് നാവികസേനയുടെ മുന്നറിയിപ്പുകൾ അവഗണിച്ചതിനാലാണ് കപ്പൽ പിടിച്ചെടുത്തതെന്ന് പ്രസിഡൻ്റ് ഡൊണാൾഡ് ട്രംപ് വ്യക്തമാക്കി. ചൈനയിൽ നിന്ന് ഇറാനിലേക്ക് വരികയായിരുന്നു കപ്പലിന് നേരെയാണ് യുഎസ് ആക്രമണം നടത്തിയത്. കപ്പൽ ഇപ്പോൾ പൂർണ്ണമായും യുഎസ് നാവികസേനയുടെ നിയന്ത്രണത്തിലാണെന്നും ട്രംപ് കൂട്ടിച്ചേർത്തു. അന്താരാഷ്ട്ര നിയമങ്ങളെ കാറ്റിൽ പറത്തിയാണ് അമേരിക്കൻ നീക്കമെന്ന് ഇറാൻ സൈനിക വക്താവ് പ്രതികരിച്ചു.

തിരിച്ചടിക്കുമെന്ന് ഇറാൻ:

തങ്ങളുടെ ദേശീയ സുരക്ഷയെയും താൽപ്പര്യങ്ങളെയും സംരക്ഷിക്കാൻ ഏത് പരിധിവരെയും പോകുമെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. ഇറാൻ്റെ പരമാധികാരത്തിന് മേലുള്ള കടന്നുകയറ്റമാണിതെന്നും ഇതിന് തക്കതായ മറുപടി നൽകുമെന്നുമാണ് ഇറാൻ്റെ പക്ഷം. ഹോർമുസ് കടലിടുക്ക് ഉൾപ്പെടെയുള്ള തന്ത്രപ്രധാന മേഖലകളിൽ ഇറാൻ നിരീക്ഷണം ശക്തമാക്കിയിട്ടുണ്ട്. യുഎസ് നീക്കത്തിന് പിന്നാലെ പശ്ചിമേഷ്യയിലെ എണ്ണ വിതരണ ശൃംഖലയെ ബാധിക്കുമോ എന്ന ആശങ്കയും ശക്തമാണ്.

ചർച്ചകളിൽ അനിശ്ചിതത്വം:

അമേരിക്കയും ഇറാനും തമ്മിലുള്ള രണ്ടാം ഘട്ട ചർച്ചകൾ നടക്കാനിരിക്കെയാണ് ഈ നാടകീയ സംഭവങ്ങൾ. ചൊവ്വാഴ്ച ഇസ്ലാമാബാദിൽ വെച്ച് ചർച്ചകൾ നടക്കുമെന്ന് റിപ്പോർട്ടുകൾ ഉണ്ടായിരുന്നെങ്കിലും നിലവിലെ സാഹചര്യത്തിൽ ഇതിൽ അനിശ്ചിതത്വം തുടരുകയാണ്. ഇറാൻ സംഘത്തെ പാർലമെൻ്റ് സ്പീക്കർ മുഹമ്മദ് ബഗേർ ഗാലിബഫും അമേരിക്കൻ സംഘത്തെ വൈസ് പ്രസിഡൻ്റ് ജെ.ഡി. വാൻസും നയിക്കുമെന്നായിരുന്നു നേരത്തെയുള്ള വിവരം. എന്നാൽ കപ്പൽ പിടിച്ചെടുത്ത നടപടി ചർച്ചകളുടെ സാധ്യതകളെ പ്രതികൂലമായി ബാധിച്ചേക്കാം.

ഈ വിഷയത്തിൽ ഐക്യരാഷ്ട്രസഭ ഉൾപ്പെടെയുള്ള അന്താരാഷ്ട്ര വേദികളിൽ പ്രതിഷേധം അറിയിക്കാനാണ് ഇറാൻ്റെ നീക്കം. അതേസമയം, മേഖലയിലെ തങ്ങളുടെ സഖ്യകക്ഷികളുടെ സുരക്ഷ ഉറപ്പാക്കാൻ ഏതറ്റം വരെയും പോകുമെന്ന കർശന നിലപാടിലാണ് അമേരിക്ക. സംഘർഷം ലഘൂകരിക്കാൻ വിവിധ രാജ്യങ്ങൾ നയതന്ത്ര ഇടപെടലുകൾ നടത്തുന്നുണ്ടെങ്കിലും സാഹചര്യം അതീവ ഗുരുതരമായി തുടരുകയാണ്._

---------------

Hindusthan Samachar / Roshith K