Thiruvananthapuram, 21 ഏപ്രില് (H.S.)

തിരുവനന്തപുരം/തൃശൂർ: തൃശൂർ മുണ്ടത്തിക്കോടുള്ള വെടിക്കെട്ട് പുരയിലുണ്ടായ അതിശക്തമായ സ്ഫോടനത്തിൽ പരിക്കേറ്റവർക്ക് ഏറ്റവും മികച്ച ചികിത്സ ഉറപ്പാക്കാൻ സർക്കാർ സംവിധാനങ്ങളെയാകെ സജ്ജമാക്കാൻ മുഖ്യമന്ത്രി പിണറായി വിജയൻ നിർദ്ദേശം നൽകി. സ്ഫോടനത്തിൽ പരിക്കേറ്റ് തൃശൂർ മെഡിക്കൽ കോളേജിലും മറ്റ് ആശുപത്രികളിലും പ്രവേശിപ്പിക്കപ്പെട്ടവർക്ക് വിദഗ്ധ ചികിത്സ ലഭ്യമാക്കാൻ എല്ലാ നടപടികളും സ്വീകരിക്കാൻ അദ്ദേഹം ചീഫ് സെക്രട്ടറിക്ക് നിർദ്ദേശം നൽകി.

വിദഗ്ധ ചികിത്സയും ഏകോപനവും

പൊള്ളലേറ്റവർക്ക് വിദഗ്ധ ചികിത്സ ലഭ്യമാക്കാൻ ആവശ്യമെങ്കിൽ സംസ്ഥാനത്തിന് പുറത്തുള്ള പ്രശസ്ത ആശുപത്രികളിലെ വിദഗ്ധ ഡോക്ടർമാരുടെ സേവനം തേടാനും മുഖ്യമന്ത്രി നിർദ്ദേശിച്ചിട്ടുണ്ട്. പോലീസ്, ഫയർ ആൻഡ് റെസ്ക്യൂ, ആരോഗ്യവകുപ്പ്, റവന്യൂ, ദുരന്തനിവാരണ വിഭാഗം എന്നിവയെ ഏകോപിപ്പിച്ചു കൊണ്ടുള്ള ഊർജ്ജിതമായ രക്ഷാപ്രവർത്തനമാണ് നടക്കുന്നത്. പ്രവർത്തനങ്ങൾ നിരീക്ഷിക്കാൻ പ്രത്യേക സംവിധാനവും ഒരുക്കിയിട്ടുണ്ട്. ദൗർഭാഗ്യകരമായ സ്ഫോടനത്തിൽ ജീവൻ നഷ്ടപ്പെട്ടവരുടെ കുടുംബങ്ങളെ മുഖ്യമന്ത്രി അനുശോചനം അറിയിച്ചു.

ദുരന്തത്തിന്റെ വ്യാപ്തി

തൃശൂർ പൂരത്തിനുള്ള തിരുവമ്പാടി വിഭാഗത്തിന്റെ വെടിക്കെട്ട് സാമഗ്രികൾ സൂക്ഷിച്ചിരുന്ന സാമ്പിൾ പുരയിലാണ് ചൊവ്വാഴ്ച വൈകിട്ട് മൂന്നരയോടെ സ്ഫോടനം നടന്നത്. ഏറ്റവും ഒടുവിൽ ലഭിക്കുന്ന വിവരങ്ങൾ പ്രകാരം സ്ഫോടനത്തിൽ മരിച്ചവരുടെ എണ്ണം 13 ആയി ഉയർന്നു. പരിക്കേറ്റ പലരുടെയും നില അതീവ ഗുരുതരമായി തുടരുകയാണ്. അഞ്ച് താത്ക്കാലിക പുരകളിലായിട്ടാണ് പടക്ക നിർമ്മാണം നടന്നിരുന്നത്. സ്ഫോടനത്തിന്റെ ആഘാതത്തിൽ മൃതദേഹങ്ങൾ പലതും തിരിച്ചറിയാൻ കഴിയാത്ത വിധം ചിതറിത്തെറിച്ച നിലയിലാണ് കണ്ടെത്തിയത്.

രക്ഷാപ്രവർത്തനം ദുഷ്കരം

സ്ഫോടനം നടന്ന സ്ഥലത്ത് ഇപ്പോഴും പുകയും അവശിഷ്ടങ്ങളും നിറഞ്ഞതിനാൽ രക്ഷാപ്രവർത്തനത്തിന് വലിയ തടസ്സങ്ങൾ നേരിടുന്നുണ്ട്. സ്ഫോടന വസ്തുക്കൾ പൂർണ്ണമായും നിർവീര്യമാക്കാത്തതിനാൽ ഫയർ ഫോഴ്സിനും നാട്ടുകാർക്കും പ്രദേശത്തേക്ക് എത്തുന്നതിന് പരിമിതികളുണ്ട്. തൃശൂർ മെഡിക്കൽ കോളേജിന് പുറമെ ജില്ലയിലെ പ്രമുഖ സ്വകാര്യ ആശുപത്രികളോടും അടിയന്തര സാഹചര്യം നേരിടാൻ തയ്യാറായിരിക്കാൻ ജില്ലാ കളക്ടർ നിർദ്ദേശം നൽകിയിട്ടുണ്ട്. സംഭവത്തിൽ മജിസ്റ്റീരിയൽ തല അന്വേഷണത്തിനും കളക്ടർ ഉത്തരവിട്ടു.

പ്രധാനമന്ത്രി നരേന്ദ്ര മോദി അപകടത്തിൽ തീവ്ര ദുഃഖം രേഖപ്പെടുത്തുകയും മരിച്ചവരുടെ കുടുംബങ്ങൾക്ക് സഹായം പ്രഖ്യാപിക്കുകയും ചെയ്തിട്ടുണ്ട്. കേന്ദ്രമന്ത്രി സുരേഷ് ഗോപി തന്റെ ലഡാക്ക് യാത്ര റദ്ദാക്കി രാത്രി തന്നെ തൃശൂരിലേക്ക് തിരിക്കുമെന്ന് അറിയിച്ചിട്ടുണ്ട്. മന്ത്രിമാരായ കെ. രാജനും വി.എൻ. വാസവനും സംഭവസ്ഥലത്തെത്തി രക്ഷാപ്രവർത്തനങ്ങൾ വിലയിരുത്തി വരികയാണ്. കേരളം സമീപകാലത്ത് കണ്ട ഏറ്റവും വലിയ വെടിക്കെട്ട് അപകടങ്ങളിൽ ഒന്നായി ഇത് മാറിയിരിക്കുകയാണ്.

---------------

Hindusthan Samachar / Roshith K