Enter your Email Address to subscribe to our newsletters
Thiruvanathapuram, 27 ഏപ്രില് (H.S.)
സംസ്ഥാനത്ത് ഇന്ന് മുതല് വേനല് മഴയ്ക്ക് സാധ്യത. തൃശൂര്, പാലക്കാട്, കൊല്ലം തുടങ്ങിയ ജില്ലകളില് വരും ദിവസങ്ങളില് മഴ ലഭിക്കുമെന്ന് കാലാവസ്ഥ വകുപ്പിന്റെ മുന്നറിയിപ്പുണ്ട്. തെക്കന് കേരളത്തിലും മധ്യ കേരളത്തിലും ഇടവിട്ടുള്ള ദിവസങ്ങളില് ലഭിക്കുന്ന വേനല് മഴ താപനില ഗണ്യമായി കുറയ്ക്കാന് സഹായിക്കുമെന്നാണ് കരുതുന്നത്.
ചിലയിടങ്ങളില് ശക്തമായ ഇടിമിന്നലോടും കാറ്റോടും കൂടിയ മഴയ്ക്കാണ് സാധ്യത. അതിനാല് ജനങ്ങള് അതീവ ജാഗ്രത പാലിക്കാന് നിര്ദേശമുണ്ട്. പകല് സമയത്ത് ശക്തമായ ചൂട് തുടരുമ്പോഴും വൈകുന്നേരങ്ങളില് ലഭിക്കുന്ന മഴ അന്തരീക്ഷ താപനില കുറയ്ക്കാന് കാരണമാകും. എന്നാല് മഴയ്ക്ക് മുമ്പുള്ള സമയങ്ങളില് അന്തരീക്ഷ ഈര്പ്പം വര്ധിക്കുന്നത് പുഴുക്കവും ചൂടും കൂടാന് ഇടയാക്കും. ഇടിമിന്നല് ജീവന് ഭീഷണിയായതിനാല് മഴ തുടങ്ങുന്ന സമയത്ത് തന്നെ ജനങ്ങള് സുരക്ഷിതമായ കെട്ടിടങ്ങളിലേക്ക് മാറണം.
ഉച്ചയ്ക്ക് ശേഷം തുറസ്സായ സ്ഥലങ്ങളില് നില്ക്കുന്നത് പൂര്ണമായും ഒഴിവാക്കണമെന്നും സംസ്ഥാന ദുരന്ത നിവാരണ അതോറിറ്റി നിര്ദേശിച്ചു. സംസ്ഥാനത്ത് മുന് മാസങ്ങളില് കാര്യമായ മഴ ലഭിക്കാത്തത് കാര്ഷിക മേഖലയെയും കുടിവെള്ള വിതരണത്തെയും വലിയ പ്രതിസന്ധിയിലാക്കിയിരുന്നു. ഡാമുകളില് അടക്കം ജലനിരപ്പ് താഴുന്ന സാഹചര്യത്തില് വേനല് മഴ ലഭിക്കുന്നത് നാടിനാകെ വലിയ ആശ്വാസമാണ്.
കഴിഞ്ഞ കുറെ ആഴ്ചകളായി സംസ്ഥാനത്ത് കടുത്ത വേനലാണ് അനുഭവപ്പെടുന്നത്. ഉയര്ന്ന താപനില 40 ഡിഗ്രി സെല്ഷ്യസിന് മുകളില് എത്തിയതോടെ നിരവധി ജില്ലകളില് കാലാവസ്ഥ വകുപ്പ് ഉയര്ന്ന താപനില മുന്നറിയിപ്പ് പുറപ്പെടുവിച്ചിരുന്നു. സൂര്യാതപം, സൂര്യാഘാതം എന്നിവയ്ക്ക് സാധ്യതയുള്ളതിനാല് പകല് 11 മുതല് വൈകീട്ട് മൂന്ന് വരെ നേരിട്ട് വെയില് ഏല്ക്കുന്നത് ഒഴിവാക്കണമെന്ന് ആരോഗ്യ വകുപ്പും നിര്ദേശിച്ചു.
ചൂട് കനക്കുന്ന പശ്ചാത്തലത്തില് ജനങ്ങള് നിര്ജലീകരണം ഒഴിവാക്കാന് ധാരാളം വെള്ളം കുടിക്കണം. ദാഹം ഇല്ലെങ്കിലും വെള്ളം കുടിക്കാന് ശ്രദ്ധിക്കണം. പ്രായമായവര്, ഗര്ഭിണികള്, ചെറിയ കുട്ടികള്, മറ്റ് അസുഖങ്ങള് ഉള്ളവര് എന്നിവര് പ്രത്യേകം ശ്രദ്ധിക്കണം. ഇളം നിറത്തിലുള്ള അയഞ്ഞ കോട്ടണ് വസ്ത്രങ്ങള് ധരിക്കുന്നത് ചൂടിന്റെ കാഠിന്യം കുറയ്ക്കാന് സഹായിക്കും.
അതേസമയം വേനല് മഴയ്ക്കൊപ്പം ശക്തമായ കാറ്റ് വീശാന് സാധ്യതയുള്ളതിനാല് തീരദേശ വാസികളും മത്സ്യത്തൊഴിലാളികളും ജാഗ്രത പാലിക്കണം. കടലില് പോകുന്നവര് ഔദ്യോഗിക മുന്നറിയിപ്പുകള് കര്ശനമായി പിന്തുടരണം.
സംസ്ഥാന ദുരന്ത നിവാരണ അതോറിറ്റിയും കാലാവസ്ഥ വകുപ്പും നല്കുന്ന ജാഗ്രത നിര്ദേശങ്ങള് പാലിക്കാന് എല്ലാവരും ശ്രദ്ധിക്കണം. വരും ദിവസങ്ങളില് കൂടുതല് പ്രദേശങ്ങളിലേക്ക് വേനല് മഴ എത്തുമെന്നാണ് അധികൃതരുടെ കണക്കുകൂട്ടല്. ശക്തമായ വേനലില് വലയുന്ന ജനതയ്ക്ക് ഇന്നത്തെ മഴ വലിയ ആശ്വാസമാകുമെന്നാണ് പ്രതീക്ഷ. വരും മണിക്കൂറുകളില് ഏതെല്ലാം ഭാഗങ്ങളില് ഇടിയോട് കൂടിയ മഴ ലഭിക്കുമെന്ന് കാലാവസ്ഥ വകുപ്പ് വ്യക്തമാക്കും. പകല് സമയങ്ങളില് വീടിന് പുറത്ത് ജോലി ചെയ്യുന്ന തൊഴിലാളികളുടെ സമയത്തില് ലേബര് വകുപ്പ് ഏര്പ്പെടുത്തിയ ക്രമീകരണം കര്ശനമായി നടപ്പാക്കുന്നുണ്ടെന്ന് ഉറപ്പാക്കാന് ഉദ്യോഗസ്ഥരോട് നിര്ദേശിച്ചിട്ടുണ്ട്. വളര്ത്തുമൃഗങ്ങളെയും നേരിട്ട് വെയിലടിക്കുന്ന സ്ഥലങ്ങളില് കെട്ടിയിടുന്നത് ഒഴിവാക്കാന് മൃഗസംരക്ഷണ വകുപ്പ് അറിയിച്ചു.
---------------
Hindusthan Samachar / Sreejith S
