Enter your Email Address to subscribe to our newsletters
Thrissur, 27 ഏപ്രില് (H.S.)
തൃശൂര്: പൂരാവേശത്തിന് ഇന്ന് കൊടിയിറങ്ങും. തിരുവമ്പാടി, പാറമേക്കാവ് ഭഗവതിമാര് ശ്രീ വടക്കുംനാഥന്റെ മണ്ണില് ഉപചാരം ചൊല്ലി പിരിയുന്നതോടെ ഈ വര്ഷത്തെ തൃശൂര് പൂരത്തിന് ഔദ്യോഗിക സമാപനമാകും. ഇനി അടുത്ത പൂരത്തിനായുള്ള കാത്തിരിപ്പാണ്.കുടമാറ്റത്തിനും വാദ്യമേളങ്ങള്ക്കും ഒടുവിലാണ് ഉപചാരം ചൊല്ലി പിരിയല് ചടങ്ങ് നടക്കുക. പ്രധാന പൂരത്തിന്റെ ക്ഷീണമില്ലാതെയാണ് മേളക്കാര് പകല്പൂരത്തിന് ഇറങ്ങുക. പാറമേക്കാവ്, തിരുവമ്പാടി വിഭാഗങ്ങള് വടക്കുംനാഥ ക്ഷേത്ര മൈതാനത്ത് മുഖാമുഖം നില്ക്കും. ഇരുവിഭാഗത്തിന്റെയും തിടമ്പേറ്റിയ ആനകള് തുമ്പിക്കൈ ഉയര്ത്തി അഭിവാദ്യം ചെയ്യും. പിന്നീട് ഇരുവരും അടുത്ത വര്ഷം കാണാമെന്ന വാഗ്ദാനത്തോടെ ഉപചാരം ചൊല്ലി പിരിയും. ഈ വികാരനിര്ഭരമായ നിമിഷത്തിന് സാക്ഷ്യം വഹിക്കാന് ആയിരക്കണക്കിന് പൂരപ്രേമികളാണ് തൃശൂര് നഗരത്തില് എത്തിച്ചേരുക.
രാവിലെ മുതല് തന്നെ വടക്കുംനാഥ സന്നിധിയിലേക്ക് മേളത്തിന്റെ അകമ്പടിയോടെ ഘടകപൂരങ്ങള് എത്തും. പൂരപ്രേമികളുടെ മനസ്സ് നിറയ്ക്കുന്ന പ്രകടനമാണ് ഓരോ വിഭാഗവും കാഴ്ചവയ്ക്കുക. പതിനഞ്ചാനകളുടെ അകമ്പടിയോടെയാണ് ഇരുവിഭാഗവും പകല്പൂരത്തിന് അണിനിരക്കുക.പാറമേക്കാവിന്റെയും തിരുവമ്പാടിയുടെയും മേളപ്രമാണിമാര് നയിക്കുന്ന പാണ്ടിമേളം ആസ്വാദകര്ക്ക് വലിയ ആവേശമാണ് സമ്മാനിക്കുക. ആവേശവും ആഘോഷവും ഒരുപോലെ നിറയുന്ന നിമിഷങ്ങളാണിത്. കടുത്ത വെയിലിനെ വകവയ്ക്കാതെയാണ് ജനങ്ങള് പകല്പൂരം ആസ്വദിക്കുന്നത്.
പൂരത്തിന്റെ സുഗമമായ നടത്തിപ്പിന് ശക്തമായ സുരക്ഷയാണ് പൊലീസ് ഒരുക്കിയിട്ടുള്ളത്. ആയിരത്തോളം പൊലീസ് ഉദ്യോഗസ്ഥരെയാണ് നഗരത്തിന്റെ വിവിധ ഭാഗങ്ങളില് വിന്യസിച്ചത്. സുരക്ഷാ ക്രമീകരണങ്ങള്ക്ക് ജില്ല കലക്ടര് നേരിട്ടാണ് നേതൃത്വം നല്കുന്നത്. ഗതാഗത നിയന്ത്രണവും കര്ശനമായി നടപ്പിലാക്കി. പൂരപ്രേമികള്ക്ക് യാതൊരു ബുദ്ധിമുട്ടും ഉണ്ടാകാതിരിക്കാന് എല്ലാ മുന്കരുതലുകളും സ്വീകരിച്ചിട്ടുണ്ട്.
ജാതിമത ഭേദമന്യേ എല്ലാവരും ഒത്തുചേരുന്ന സാംസ്കാരിക കൂട്ടായ്മ കൂടിയാണ് തൃശൂര് പൂരം. വാദ്യകലകളുടെ അതിഗംഭീരമായ പ്രകടനം തന്നെയാണ് പൂരത്തിന്റെ ഏറ്റവും വലിയ ആകര്ഷണം. വിവിധ ഭാഗങ്ങളില് നിന്നെത്തുന്ന കലാകാരന്മാര് അവരുടെ കഴിവിന്റെ പരമാവധി ഇവിടെ പുറത്തെടുക്കുന്നു. വിദേശ സഞ്ചാരികള് ഉള്പ്പെടെ നിരവധിയാളുകള് ഈ സാംസ്കാരിക തനിമ നേരിട്ട് കാണാന് എത്താറുണ്ട്. നഗരത്തിലെ വ്യാപാര സ്ഥാപനങ്ങള്ക്കും മറ്റും പൂരം വലിയ സാമ്പത്തിക ഉണര്വാണ് നല്കുന്നത്.
ദിവസങ്ങളോളം നീണ്ടുനില്ക്കുന്ന ആഘോഷങ്ങള് നാടിന്റെ മൊത്തത്തിലുള്ള ഉന്മേഷം വര്ധിപ്പിക്കുന്നു. അടുത്ത വര്ഷത്തെ പൂരത്തിനായി ഇന്നുമുതല് തന്നെ ഒരുക്കങ്ങള് തുടങ്ങുമെന്നാണ് സംഘാടകര് വ്യക്തമാക്കുന്നത്. ആനകളെ അണിനിരത്തുന്നതിലും കുടമാറ്റത്തിലും ഇരുവിഭാഗങ്ങളും തമ്മിലുള്ള നിരന്തരമായ മത്സരം ഓരോ വര്ഷവും പൂരത്തിന്റെ മാറ്റുകൂട്ടുന്നു. കാലങ്ങള്ക്ക് മുമ്പ് മുതല്ക്കേ ഈ സാംസ്കാരിക പൈതൃകം വളരെ സൂക്ഷ്മതയോടെയാണ് കാത്തുസൂക്ഷിക്കുന്നത്.
---------------
Hindusthan Samachar / Sreejith S
