Newdelhi, 28 ഏപ്രില് (H.S.)

ന്യൂഡൽഹി: ഇന്ത്യയും ന്യൂസിലാൻഡും തമ്മിലുള്ള സാമ്പത്തിക-വ്യാപാര ബന്ധങ്ങളിൽ പുതിയ ചരിത്രം കുറിച്ചുകൊണ്ട് ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാര കരാർ ഒപ്പിട്ടു. പതിറ്റാണ്ടുകൾ നീണ്ട കാത്തിരിപ്പിനും ചർച്ചകൾക്കും ഒടുവിലാണ് തലമുറയിൽ ഒരിക്കൽ മാത്രം സംഭവിക്കുന്ന സുവർണ്ണാവസരം എന്ന് വിശേഷിപ്പിക്കപ്പെടുന്ന ഈ കരാർ യാഥാർത്ഥ്യമായത്. ഈ വർഷാവസാനത്തോടെ നടപ്പിലാക്കാൻ ലക്ഷ്യമിടുന്ന ഈ കരാറിലൂടെ ഇന്ത്യയിൽ നിന്നുള്ള ഉൽപ്പന്നങ്ങൾക്ക് ന്യൂസിലാൻഡിൽ നൂറ് ശതമാനം തീരുവ രഹിത പ്രവേശനം (Duty-free access) ലഭിക്കും.

കരാറിലെ പ്രധാന നേട്ടങ്ങൾ

പുതിയ കരാർ പ്രകാരം തുണിത്തരങ്ങൾ, തുകൽ ഉൽപ്പന്നങ്ങൾ, പാദരക്ഷകൾ, ആഭരണങ്ങൾ, എഞ്ചിനീയറിംഗ് ഉൽപ്പന്നങ്ങൾ, സംസ്കരിച്ച ഭക്ഷ്യവസ്തുക്കൾ എന്നിവയ്ക്ക് ന്യൂസിലാൻഡിലേക്ക് തീരുവയില്ലാതെ കയറ്റുമതി ചെയ്യാൻ സാധിക്കും. സെറാമിക്സ്, കാർപെറ്റ്, ഓട്ടോമൊബൈൽ ഭാഗങ്ങൾ തുടങ്ങിയ മേഖലകളിൽ നിലവിൽ 10 ശതമാനം വരെ നിലനിൽക്കുന്ന നികുതികൾ ഇതോടെ ഇല്ലാതാകും. അഞ്ച് വർഷത്തിനുള്ളിൽ ഇരുരാജ്യങ്ങളും തമ്മിലുള്ള വ്യാപാരം നിലവിലുള്ളതിന്റെ ഇരട്ടിയാക്കി 500 കോടി ഡോളറിലേക്ക് (5 Billion USD) എത്തിക്കുകയാണ് ലക്ഷ്യം.

വിസ ഇളവുകളും തൊഴിലവസരങ്ങളും

വിദ്യാർത്ഥികൾക്കും നൈപുണ്യമുള്ള പ്രൊഫഷണലുകൾക്കും ന്യൂസിലാൻഡിലേക്കുള്ള വിസ നടപടികൾ ഇനി ലളിതമാകും. ഇതിനുപുറമെ, യോഗാ പ്രൊഫഷണലുകൾ, ആയുഷ് (AYUSH) വിദഗ്ധർ, സംഗീതജ്ഞർ എന്നിവർക്ക് ന്യൂസിലാൻഡിൽ പ്രവർത്തിക്കുന്നതിനും താമസം ഒരുക്കുന്നതിനും കൂടുതൽ സൗകര്യങ്ങൾ കരാർ ഉറപ്പാക്കുന്നു. ഇന്ത്യൻ പ്രൊഫഷണലുകൾക്ക് ന്യൂസിലാൻഡ് വിപണിയിലേക്ക് കൂടുതൽ പ്രവേശനം ലഭിക്കുമെന്നത് തൊഴിൽ മേഖലയ്ക്ക് വലിയ ഉണർവ് നൽകും.

നിക്ഷേപവും സാമ്പത്തിക സഹകരണവും

അടുത്ത 15 വർഷത്തിനുള്ളിൽ ഏകദേശം 2000 കോടി ഡോളറിന്റെ (20 Billion USD) നിക്ഷേപം ഇന്ത്യയിൽ നടത്താൻ ന്യൂസിലാൻഡ് പ്രതിജ്ഞാബദ്ധമാണ്. അടിസ്ഥാന സൗകര്യ വികസനം ഉൾപ്പെടെയുള്ള പ്രധാന മേഖലകളിലാകും ഈ തുക വിനിയോഗിക്കുക. ഇതിന് പുറമെ ബാങ്കിംഗ് മേഖലയിലും സഹകരണം വർദ്ധിപ്പിക്കും. കൂടുതൽ ബ്രാഞ്ചുകൾ ഇന്ത്യയിൽ തുറക്കാൻ ന്യൂസിലാൻഡ് ബാങ്കുകൾക്ക് അനുമതി നൽകുന്നത് ഉൾപ്പെടെയുള്ള ഇളവുകൾ ഇന്ത്യയും വാഗ്ദാനം ചെയ്തിട്ടുണ്ട്.

കാർഷിക മേഖലയിലെ സുരക്ഷ

അതേസമയം, രാജ്യത്തെ കർഷകരുടെ താത്പര്യം സംരക്ഷിക്കുന്നതിനായി പാൽ ഉൽപ്പന്നങ്ങളെയും തന്ത്രപ്രധാനമായ കാർഷിക ഉൽപ്പന്നങ്ങളെയും ഈ കരാറിന്റെ പരിധിയിൽ നിന്ന് ഇന്ത്യ ഒഴിവാക്കിയിട്ടുണ്ട്. രാജ്യത്തെ സൂക്ഷ്മ-ചെറുകിട-ഇടത്തരം സംരംഭങ്ങൾക്കും (MSMEs) വനിതാ സംരംഭകർക്കും ആഗോള വിപണിയിലേക്ക് ചുവടുവെക്കാൻ ഈ കരാർ സഹായിക്കുമെന്ന് പ്രധാനമന്ത്രി നരേന്ദ്ര മോദി പറഞ്ഞു.

കഴിഞ്ഞ കുറച്ചു വർഷങ്ങൾക്കിടെ ഇന്ത്യ ഒപ്പിടുന്ന ഒമ്പതാമത്തെ പ്രധാന വ്യാപാര കരാറാണിത്. ബ്രിട്ടൻ, ഒമാൻ തുടങ്ങിയ രാജ്യങ്ങളുമായുള്ള കരാറുകൾ വരും ആഴ്ചകളിൽ പ്രാബല്യത്തിൽ വരുമെന്ന് കേന്ദ്ര വാണിജ്യ മന്ത്രി പിയൂഷ് ഗോയൽ അറിയിച്ചു. ന്യൂസിലാൻഡിലെ പ്രധാന പ്രതിപക്ഷ പാർട്ടിയായ ലേബർ പാർട്ടി കരാറിനെ പിന്തുണയ്ക്കുന്നതിനാൽ അവിടുത്തെ പാർലമെന്റിലും കരാർ എളുപ്പത്തിൽ പാസാകുമെന്നാണ് പ്രതീക്ഷിക്കുന്നത്.

---------------

Hindusthan Samachar / Roshith K