Newdelhi , 28 ഏപ്രില് (H.S.)

ന്യൂഡൽഹി: കോൺഗ്രസ് പാർട്ടി സ്ത്രീവിരുദ്ധമാണെന്ന കാര്യം മുതിർന്ന നേതാവും എംപിയുമായ ശശി തരൂർ ഒരു തരത്തിൽ അംഗീകരിച്ചിരിക്കുകയാണെന്ന് കേന്ദ്ര പാർലമെന്ററി കാര്യ മന്ത്രി കിരൺ റിജിജു. വനിതാ സംവരണ ബില്ലുമായി ബന്ധപ്പെട്ട് പാർലമെന്റിൽ നടന്ന ചർച്ചകൾക്കും ബില്ല് പരാജയപ്പെട്ടതിനും പിന്നാലെയാണ് റിജിജുവിന്റെ ഈ പരാമർശം.

ലോക്സഭ പിരിഞ്ഞതിന് ശേഷം പ്രതിപക്ഷ അംഗങ്ങളോടൊപ്പം നിൽക്കുന്ന ഒരു ചിത്രം ശശി തരൂർ സമൂഹമാധ്യമങ്ങളിൽ പങ്കുവെച്ചിരുന്നു. താനും റിജിജുവും തമ്മിലുള്ള ഒരു സംഭാഷണത്തെക്കുറിച്ചും തരൂർ അതിൽ സൂചിപ്പിച്ചു. പ്രതിപക്ഷത്തെ എന്തുകൊണ്ടാണ് ബിജെപി 'സ്ത്രീവിരുദ്ധർ' എന്ന് വിളിക്കുന്നതെന്ന് റിജിജു വിശദീകരിച്ചപ്പോൾ, തന്നെ ആർക്കും സ്ത്രീവിരുദ്ധൻ എന്ന് വിളിക്കാൻ കഴിയില്ലെന്ന് താൻ മറുപടി നൽകിയതായും റിജിജു അത് സമ്മതിച്ചതായും തരൂർ കുറിച്ചു.

എന്നാൽ ഈ വിഷയത്തിൽ വ്യത്യസ്തമായ വ്യാഖ്യാനവുമായാണ് കിരൺ റിജിജു രംഗത്തെത്തിയത്. തരൂർ തന്നെ നേരിൽ കണ്ട് സംസാരിച്ച കാര്യം ശരിയാണെന്ന് അദ്ദേഹം സ്ഥിരീകരിച്ചു. പാർലമെന്റ് നടപടികൾക്ക് ശേഷം ശശി തരൂർ എന്നോട് പറഞ്ഞു, ആരും തന്നെ സ്ത്രീവിരുദ്ധനായി കാണില്ലെന്ന്. ഞാൻ അത് ശരിവെച്ചു. അദ്ദേഹത്തെ ആരും അങ്ങനെ വിളിക്കില്ല. എന്നാൽ അതിന്റെ അർത്ഥം കോൺഗ്രസ് സ്ത്രീവിരുദ്ധമാണെന്നും എന്നാൽ താൻ വ്യക്തിപരമായി അങ്ങനെയല്ലെന്നുമാണ് അദ്ദേഹം പറയാതെ പറഞ്ഞത്. കോൺഗ്രസിന്റെ നിലപാടുകളിൽ നിന്ന് തന്നെ വേർപെടുത്തി കാണാനാണ് അദ്ദേഹം ശ്രമിച്ചത്, റിജിജു പരിഹസിച്ചു.

വനിതാ സംവരണ ബില്ലിനെ എതിർത്തതിലൂടെ കോൺഗ്രസ് തങ്ങളുടെ യഥാർത്ഥ മുഖം വെളിപ്പെടുത്തിയെന്നും അദ്ദേഹം കൂട്ടിച്ചേർത്തു. വരാനിരിക്കുന്ന തിരഞ്ഞെടുപ്പുകളിൽ ഇന്ത്യൻ വനിതകളുടെ രോഷം കോൺഗ്രസിന് നേരിടേണ്ടി വരുമെന്ന് റിജിജു മുന്നറിയിപ്പ് നൽകി. സംവരണ ബില്ലിനെ മണ്ഡല പുനർനിർണ്ണയവുമായി ബന്ധിപ്പിച്ചതിനെയാണ് തങ്ങൾ എതിർത്തതെന്ന പ്രതിപക്ഷ വാദം ജനങ്ങൾ തള്ളിക്കളയുമെന്നും അദ്ദേഹം പറഞ്ഞു.

അതേസമയം, സ്ത്രീകൾ മനുഷ്യവംശത്തിലെ 'പരിഷ്കരിച്ച പതിപ്പുകൾ' (Humans 2.0) ആണെന്നും അവർക്ക് അർഹമായ പ്രാധാന്യം നൽകണമെന്നുമാണ് തരൂർ തന്റെ പോസ്റ്റിൽ വ്യക്തമാക്കിയത്. എന്നാൽ ബില്ലിന്റെ പരാജയത്തിന് പിന്നാലെ ഭരണ-പ്രതിപക്ഷങ്ങൾ തമ്മിലുള്ള വാക്പോര് മുറുകുകയാണ്. വനിതാ സംവരണത്തിന് തടസ്സം നിൽക്കുന്ന നിലപാടാണ് പ്രതിപക്ഷം സ്വീകരിക്കുന്നതെന്ന ആക്ഷേപം ശക്തമാക്കാനാണ് ബിജെപിയുടെ നീക്കം. ഒരു വശത്ത് താൻ സ്ത്രീപക്ഷവാദി ആണെന്ന് അവകാശപ്പെടുമ്പോഴും സ്വന്തം പാർട്ടി സ്വീകരിച്ച നിലപാടിനെ ന്യായീകരിക്കാൻ തരൂരിന് സാധിക്കുന്നില്ലെന്ന് റിജിജു കുറ്റപ്പെടുത്തി. ഈ രാഷ്ട്രീയ തർക്കം വരും ദിവസങ്ങളിലും സഭയ്ക്ക് പുറത്ത് സജീവമായി തുടരുമെന്നാണ് സൂചന

---------------

Hindusthan Samachar / Roshith K