Thiruvananthapuram, 28 ഏപ്രില് (H.S.)

തിരുവനന്തപുരം: കേരളത്തിൽ കഠിനമായ ഉഷ്ണതരംഗവും ചൂടും തുടരുന്നതിനിടെ ആശ്വാസവാർത്തയുമായി കാലാവസ്ഥാ നിരീക്ഷണ കേന്ദ്രം. സംസ്ഥാനത്ത് ഇന്ന് മുതൽ വെള്ളിയാഴ്ച വരെ വിവിധയിടങ്ങളിൽ ഇടിമിന്നലോടു കൂടിയ വേനൽമഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. കഴിഞ്ഞ ഏതാനും ആഴ്ചകളായി തുടരുന്ന റെക്കോർഡ് താപനിലയ്ക്ക് ഇതോടെ നേരിയ ശമനമുണ്ടാകുമെന്നാണ് പ്രതീക്ഷിക്കുന്നത്.

ചൂട് ക്രമാതീതമായി വർദ്ധിക്കുന്ന സാഹചര്യത്തിൽ ഇടുക്കിയും വയനാടും ഒഴികെയുള്ള 12 ജില്ലകളിൽ നിലവിൽ ഉയർന്ന താപനില മുന്നറിയിപ്പായ യെല്ലോ അലർട്ട് തുടരുകയാണ്.

താപനില 40 ഡിഗ്രി കടന്നേക്കും; ജാഗ്രതാ നിർദ്ദേശം

സംസ്ഥാനത്ത് ഇന്നും ചൂട് കഠിനമായി തുടരുമെന്നാണ് പ്രവചനം. പാലക്കാട് ജില്ലയിൽ താപനില 40 ഡിഗ്രി സെൽഷ്യസ് വരെ ഉയർന്നേക്കാം. കൊല്ലം ജില്ലയിൽ 39 ഡിഗ്രി സെൽഷ്യസും, പത്തനംതിട്ട, കോട്ടയം, തൃശൂർ, കോഴിക്കോട് ജില്ലകളിൽ 38 ഡിഗ്രി സെൽഷ്യസ് വരെയും താപനില ഉയരാൻ സാധ്യതയുണ്ട്.

സാധാരണ ലഭിക്കേണ്ടതിനേക്കാൾ മൂന്ന് മുതൽ നാല് ഡിഗ്രി സെൽഷ്യസ് വരെ അധികം ചൂട് അനുഭവപ്പെടുന്നതിനാൽ ജനങ്ങൾ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിർദ്ദേശിച്ചു. ഉച്ചയ്ക്ക് 11 മണി മുതൽ 3 മണി വരെയുള്ള സമയത്ത് നേരിട്ട് സൂര്യപ്രകാശം ഏൽക്കുന്നത് ഒഴിവാക്കണം. നിർജ്ജലീകരണം തടയാൻ ധാരാളം വെള്ളം കുടിക്കണമെന്നും നിർദ്ദേശമുണ്ട്.

വേനൽമഴയും യെല്ലോ അലർട്ടും

ചൂടിന് ശമനമായി മഴ എത്തുമെങ്കിലും ഇടിമിന്നൽ ജാഗ്രത പാലിക്കണമെന്ന് അധികൃതർ അറിയിച്ചു. മഴയുടെ പശ്ചാത്തലത്തിൽ വരും ദിവസങ്ങളിൽ വിവിധ ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്:

-

ബുധനാഴ്ച: പത്തനംതിട്ട, ഇടുക്കി.

-

വ്യാഴാഴ്ച: കണ്ണൂർ, കാസർഗോഡ്.

ഒറ്റപ്പെട്ടയിടങ്ങളിൽ ശക്തമായ മഴയ്ക്ക് സാധ്യതയുള്ളതിനാലാണ് ഈ ജില്ലകളിൽ ജാഗ്രതാ നിർദ്ദേശം നൽകിയിരിക്കുന്നത്. മലയോര മേഖലകളിൽ ഇടിമിന്നലിന് സാധ്യത കൂടുതലായതിനാൽ പ്രത്യേക ശ്രദ്ധ വേണം.

ഉത്തരേന്ത്യയിലും താപനില ഉയരുന്നു

കേരളത്തിന് പുറമെ ഉത്തരേന്ത്യൻ സംസ്ഥാനങ്ങളിലും ചൂട് കഠിനമായി തുടരുകയാണ്. ഡൽഹിയിൽ ഈ സീസണിലെ ആദ്യത്തെ ശക്തമായ പൊടിക്കാറ്റ് അനുഭവപ്പെട്ടു. ഏകദേശം 45 മിനിറ്റോളം നീണ്ടുനിന്ന പൊടിക്കാറ്റിനെത്തുടർന്ന് വിമാന സർവീസുകളും വൈദ്യുതി വിതരണവും തടസ്സപ്പെട്ടു. ഉത്തരേന്ത്യയിൽ മെയ് ഒന്ന് വരെ കനത്ത ചൂടും പൊടിക്കാറ്റും തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ.

സംസ്ഥാനത്തെ ഉഷ്ണതരംഗ സാഹചര്യം വിലയിരുത്തുന്നതിനായി മുഖ്യമന്ത്രി പിണറായി വിജയൻ ഉന്നതതല യോഗം വിളിച്ചു ചേർത്തിട്ടുണ്ട്. സൂര്യാഘാതം, ശുദ്ധജലക്ഷാമം എന്നിവ നേരിടാൻ തദ്ദേശ സ്വയംഭരണ സ്ഥാപനങ്ങൾക്കും ആരോഗ്യ വകുപ്പിനും കർശന നിർദ്ദേശം നൽകിയിട്ടുണ്ട്.

---------------

Hindusthan Samachar / Roshith K