Kerala, 03 ഏപ്രില് (H.S.)

തിരുവനന്തപുരം: നിയമസഭാ തിരഞ്ഞെടുപ്പ് പ്രചാരണം ചൂടുപിടിക്കുന്നതിനിടെ യുഡിഎഫിന്റെ മുൻകാല ഭരണത്തിലെ വൈദ്യുതി പ്രതിസന്ധികളെ പരിഹസിച്ച് സ്പീക്കർ എ.എൻ ഷംസീർ. യുഡിഎഫ് ഭരണകാലത്തുണ്ടായിരുന്ന ലോഡ്ഷെഡിംഗും പവർകട്ടും ഓർമ്മിപ്പിച്ചുകൊണ്ടായിരുന്നു ഷംസീറിന്റെ പരിഹാസം. തിരുവനന്തപുരത്ത് നടന്ന എൽഡിഎഫ് തിരഞ്ഞെടുപ്പ് പ്രചാരണ യോഗത്തിൽ സംസാരിക്കുകയായിരുന്നു അദ്ദേഹം.

സഞ്ജുവിന്റെ സിക്സറുകളും യുഡിഎഫ് ഭരണവും:

ക്രിക്കറ്റ് താരം സഞ്ജു സാംസണിന്റെ പ്രകടനത്തെ മുൻനിർത്തിയായിരുന്നു ഷംസീറിന്റെ പ്രധാന പരാമർശം. യുഡിഎഫ് ആണ് ഇപ്പോൾ ഭരിക്കുന്നതെങ്കിൽ ലോകകപ്പിൽ സഞ്ജു സാംസൺ സിക്സറുകൾ അടിക്കുന്നത് നമുക്ക് കാണാൻ സാധിക്കുമായിരുന്നോ? എന്ന് അദ്ദേഹം ചോദിച്ചു. സഞ്ജു സിക്സർ അടിക്കാൻ തുടങ്ങുമ്പോൾ കറന്റ് പോകും, കറന്റ് വരുമ്പോഴേക്കും കളി കഴിഞ്ഞിട്ടുണ്ടാകും എന്നതായിരുന്നു യുഡിഎഫ് കാലത്തെ അവസ്ഥയെന്ന് അദ്ദേഹം പരിഹസിച്ചു. സഞ്ജുവിന്റെ ലോകകപ്പിലെ മികച്ച പ്രകടനവും ഇന്ത്യ കിരീടം ചൂടുന്നതും തടസ്സമില്ലാതെ കാണാൻ സാധിച്ചത് എൽഡിഎഫ് സർക്കാർ ഭരിക്കുന്നത് കൊണ്ടാണെന്നും അദ്ദേഹം അവകാശപ്പെട്ടു.

സീരിയൽ പ്രേമികളെയും കയ്യിലെടുത്തു:

ക്രിക്കറ്റ് ആരാധകർക്ക് പുറമെ വീട്ടമ്മമാരെയും ലക്ഷ്യം വെച്ചായിരുന്നു ഷംസീറിന്റെ അടുത്ത പരാമർശം. ഇപ്പോൾ ലോഡ്ഷെഡിംഗോ പവർകട്ടോ ഉണ്ടോ? എല്ലാവർക്കും 'കുടുംബശ്രീ ശാരദ'യും 'കുടുംബവിളക്കും' ഒക്കെ കാണാൻ പറ്റുന്നില്ലേ? യുഡിഎഫ് ആണ് ഭരിക്കുന്നതെങ്കിൽ ഈ സീരിയലുകൾ കാണാൻ പറ്റുമോ? എന്ന് അദ്ദേഹം സദസ്സിനോട് ചോദിച്ചു. ഇടതുപക്ഷം ഭരിക്കുന്നത് കൊണ്ട് മാത്രമാണ് രാത്രികാലങ്ങളിൽ തടസ്സമില്ലാതെ വൈദ്യുതി ലഭിക്കുന്നതെന്നും അദ്ദേഹം കൂട്ടിച്ചേർത്തു. ഐപിഎൽ മത്സരങ്ങൾ തത്സമയം ആസ്വദിക്കാൻ കഴിയുന്നതും ഈ ഭരണമികവ് കൊണ്ടാണെന്ന് അദ്ദേഹം പറഞ്ഞു.

പിഎം ശ്രീ പദ്ധതിയും കോൺഗ്രസിന്റെ ഇരട്ടത്താപ്പും:

കേന്ദ്ര സർക്കാരിന്റെ പിഎം ശ്രീ (PM SHRI) പദ്ധതിയുമായി ബന്ധപ്പെട്ട് കോൺഗ്രസ് സ്വീകരിക്കുന്ന നിലപാടുകളെയും ഷംസീർ രൂക്ഷമായി വിമർശിച്ചു. കേരളത്തിൽ ഈ പദ്ധതിയെ എതിർക്കുന്ന കോൺഗ്രസ്, അവർ ഭരിക്കുന്ന കർണാടകയിലും തെലങ്കാനയിലും പദ്ധതി നടപ്പിലാക്കാൻ ഒപ്പിട്ടിട്ടുണ്ടെന്ന് അദ്ദേഹം ചൂണ്ടിക്കാട്ടി. നിങ്ങൾ ഒപ്പിട്ടാൽ ഹലാലും നമ്മൾ ചെയ്താൽ ഹറാമും എന്ന നിലപാടാണ് കോൺഗ്രസിന്റേത്, എന്ന് അദ്ദേഹം പരിഹസിച്ചു. നടപ്പിലാക്കാൻ കഴിയാത്ത വാഗ്ദാനങ്ങൾ നൽകി ജനങ്ങളെ പറ്റിക്കാനാണ് യുഡിഎഫ് ശ്രമിക്കുന്നതെന്നും അദ്ദേഹം ആരോപിച്ചു.

തിരഞ്ഞെടുപ്പ് അടുത്തതോടെ വികസനവും ഭരണ നേട്ടങ്ങളും ചർച്ചയാക്കുന്നതിനൊപ്പം ഇത്തരത്തിലുള്ള ട്രോളുകളും പരിഹാസങ്ങളും രാഷ്ട്രീയ വേദികളിൽ സജീവമാവുകയാണ്. ഷംസീറിന്റെ ഈ പരാമർശങ്ങൾ സോഷ്യൽ മീഡിയയിലും വലിയ ചർച്ചകൾക്ക് തുടക്കമിട്ടിട്ടുണ്ട്.

---------------

Hindusthan Samachar / Roshith K