Perambra, 03 ഏപ്രില് (H.S.)

പേരാമ്പ്ര: നിയമസഭാ തിരഞ്ഞെടുപ്പ് പ്രചാരണം അവസാന ഘട്ടത്തിലേക്ക് കടക്കവെ പേരാമ്പ്ര മണ്ഡലത്തിൽ രാഷ്ട്രീയ വിവാദം പുകയുന്നു. മതം പറഞ്ഞ് വോട്ട് ചോദിച്ചുവെന്ന പരാതിയിൽ യുഡിഎഫ് സ്ഥാനാർത്ഥി ഫാത്തിമ തഹ്ലിയക്ക് തെരഞ്ഞെടുപ്പ് കമ്മീഷൻ നോട്ടീസ് അയച്ചു. സമാനമായ രീതിയിൽ എൽഡിഎഫ് സ്ഥാനാർത്ഥി ടി.പി. രാമകൃഷ്ണനെതിരെയും പരാതികൾ ഉയർന്നതോടെ മണ്ഡലത്തിൽ ആരോപണ പ്രത്യാരോപണങ്ങൾ മുറുകുകയാണ്.

ആരോപണങ്ങൾ ഇങ്ങനെ:

ഫാത്തിമ തഹ്ലിയ സമുദായത്തിന്റെ പേര് പറഞ്ഞ് വോട്ട് തേടുന്നുവെന്ന് കാട്ടി മൂന്ന് പരാതികളാണ് തെരഞ്ഞെടുപ്പ് കമ്മീഷന് ലഭിച്ചത്. മാതൃകാ പെരുമാറ്റച്ചട്ടത്തിന്റെ ലംഘനം നടന്നോ എന്നതിൽ രണ്ട് ദിവസത്തിനകം വിശദീകരണം നൽകാനാണ് ഡെപ്യൂട്ടി കളക്ടർ നോട്ടീസിൽ ആവശ്യപ്പെട്ടിരിക്കുന്നത്. എന്നാൽ, തങ്ങൾക്കെതിരെയുള്ള പരാതിക്ക് മറുപടിയായി എൽഡിഎഫ് ബോധപൂർവ്വം ചമച്ച ആരോപണമാണിതെന്ന് യുഡിഎഫ് കേന്ദ്രങ്ങൾ പ്രതികരിക്കുന്നു.

നേരത്തെ, എൽഡിഎഫ് സ്ഥാനാർത്ഥി ടി.പി. രാമകൃഷ്ണന്റെ പ്രചാരണ വാഹനത്തിൽ നിന്ന് വർഗീയ ചുവയുള്ള അനൗൺസ്മെന്റ് നടന്നുവെന്ന് ആരോപിച്ച് യുഡിഎഫ് പരാതി നൽകിയിരുന്നു. ഇതിന്റെ അടിസ്ഥാനത്തിൽ ടി.പി. രാമകൃഷ്ണനും നോട്ടീസ് ലഭിച്ചിട്ടുണ്ട്. വടകര മോഡലിൽ പേരാമ്പ്രയിലും വർഗീയ ധ്രുവീകരണം ഉണ്ടാക്കി വോട്ട് നേടാനാണ് ഇരു മുന്നണികളും ശ്രമിക്കുന്നതെന്നാണ് ഉയരുന്ന പ്രധാന വിമർശനം.

തെളിവുകളുടെ അഭാവം:

ടി.പി. രാമകൃഷ്ണനെതിരെയുള്ള പരാതിക്കൊപ്പം അനൗൺസ്മെന്റിന്റെ ദൃശ്യങ്ങളും ശബ്ദരേഖയും യുഡിഎഫ് ഹാജരാക്കിയിരുന്നു. എന്നാൽ ഫാത്തിമ തഹ്ലിയക്കെതിരെയുള്ള പരാതിയിൽ അത്തരത്തിലുള്ള ഡിജിറ്റൽ തെളിവുകളൊന്നും ഇതുവരെ പുറത്തുവിട്ടിട്ടില്ലെന്ന് റിപ്പോർട്ടുകൾ സൂചിപ്പിക്കുന്നു. വടകരയിലെ 'കാഫിർ' സ്ക്രീൻഷോട്ട് വിവാദത്തിന് സമാനമായ സാഹചര്യമാണ് പേരാമ്പ്രയിലും ഉടലെടുത്തിരിക്കുന്നത്.

സാമുദായിക വോട്ടുകൾ നിർണ്ണായകം:

പേരാമ്പ്രയിലെ മുസ്ലിം ന്യൂനപക്ഷ വോട്ടുകൾക്കൊപ്പം നായർ, ഈഴവ വോട്ട് ബാങ്കുകളും തിരഞ്ഞെടുപ്പ് ഫലത്തെ സ്വാധീനിക്കുന്ന ഘടകങ്ങളാണ്. ജമാഅത്തെ ഇസ്ലാമി ഉൾപ്പെടെയുള്ള സംഘടനകളുടെ സ്വാധീനത്തെക്കുറിച്ചും മണ്ഡലത്തിൽ ചർച്ചകൾ സജീവമാണ്. ഏതെങ്കിലും തരത്തിലുള്ള സാമുദായിക ഏകീകരണം നടന്നാൽ അത് ആർക്ക് ഗുണകരമാകുമെന്ന കണക്കുകൂട്ടലിലാണ് രാഷ്ട്രീയ പാർട്ടികൾ.

സ്ഥാനാർത്ഥികൾ നൽകുന്ന വിശദീകരണത്തിന് ശേഷം തെരഞ്ഞെടുപ്പ് ഓഫീസർ കൂടുതൽ നടപടികളിലേക്ക് കടക്കും. പ്രചാരണം കൊഴുക്കുന്നതിനിടെ ഇത്തരം വിവാദങ്ങൾ ഉയർന്നത് വോട്ടർമാരെ എത്തരത്തിൽ സ്വാധീനിക്കുമെന്ന് കണ്ടറിയേണ്ടതുണ്ട്.

---------------

Hindusthan Samachar / Roshith K