Thiruvananthapuram , 06 ഏപ്രില് (H.S.)

സംസ്ഥാനത്ത് തുടർച്ചയായ വിലക്കയറ്റത്തിന് പിന്നാലെ സ്വർണവിലയിൽ ഇടിവ്. 22 കാരറ്റ് സ്വർണത്തിന് പവന് 1320 രൂപയും ഗ്രാമിന് 165 രൂപയുമാണ് ഇന്ന് കുറഞ്ഞത്. രാജ്യാന്തര വിപണിയിലെ മാറ്റങ്ങളാണ് ആഭ്യന്തര വിപണിയിലും വില കുറയാൻ കാരണമായത്.

ഇന്നത്തെ വിപണിവില

22 കാരറ്റ് സ്വർണം പവന് 1,09,360 രൂപയാണ് ഇന്നത്തെ വിപണിവില. കഴിഞ്ഞ ദിവസം ഇത് 1,10,680 രൂപയായിരുന്നു. ഒരു ഗ്രാം സ്വർണത്തിന് 165 രൂപ കുറഞ്ഞ് 13,670 രൂപയായി. 18 കാരറ്റ് സ്വർണം പവന് 680 രൂപ കുറഞ്ഞ് 89,880 രൂപയിലെത്തി. 90,560 രൂപയായിരുന്നു പഴയ വില. 18 കാരറ്റ് സ്വർണം ഗ്രാമിന് 135 രൂപ കുറഞ്ഞ് 11,235 രൂപയായി.

14 കാരറ്റ് സ്വർണം പവന് ഇന്നത്തെ വിപണിവില 70,000 രൂപയാണ്. ഇതിന് ഗ്രാമിന് 105 രൂപ കുറഞ്ഞ് 8750 രൂപയായി. ഒൻപത് കാരറ്റ് സ്വർണം പവന് 45,120 രൂപയാണ് ഇന്നത്തെ വില. ഗ്രാമിന് 70 രൂപ കുറഞ്ഞ് 5640 രൂപയായി. അതേസമയം വെള്ളി വിലയിൽ മാറ്റമില്ല. 10 ഗ്രാം വെള്ളിക്ക് 2500 രൂപയും ഒരു ഗ്രാമിന് 250 രൂപയുമാണ് ഇന്നത്തെ നിരക്ക്.

ആഗോള ഘടകങ്ങളുടെ സ്വാധീനം

പശ്ചിമേഷ്യൻ സംഘർഷങ്ങൾ കാരണം രാജ്യാന്തര വിപണിയിൽ സ്വർണവിലയിൽ തുടർച്ചയായ ചാഞ്ചാട്ടമാണ് അനുഭവപ്പെടുന്നത്. കഴിഞ്ഞ കുറച്ചു ദിവസങ്ങളായി സ്വർണവില പവന് ഒരു ലക്ഷത്തിന് മുകളിലാണ് തുടരുന്നത്. വില ഇനിയും ഉയരുമോ എന്ന ആശങ്കയിലാണ് ഉപഭോക്താക്കൾ. ആഗോള സാമ്പത്തിക അനിശ്ചിതത്വങ്ങൾ, പണപ്പെരുപ്പം, വിവിധ രാജ്യങ്ങളിലെ കേന്ദ്ര ബാങ്കുകളുടെ പലിശ നിരക്കുകളിലെ വ്യത്യാസങ്ങൾ എന്നിവ സ്വർണവിലയെ ഏറെ സ്വാധീനിക്കുന്നുണ്ട്.

രാജ്യാന്തര വിപണിയിൽ ഡോളറിൻ്റെ മൂല്യത്തിലുണ്ടാകുന്ന ഇടിവ് സ്വർണവില കുതിച്ചുയരാൻ കാരണമാകുന്നുണ്ട്. ഇതിനുപുറമെ രൂപയുടെ മൂല്യം ഇടിയുന്നത് ആഭ്യന്തര വിപണിയിലും സമാനമായ പ്രതിസന്ധി സൃഷ്ടിക്കുന്നുണ്ട്. സ്വർണവിലയിൽ നേരിയ കുറവുവന്നാലും ഈ ആശ്വാസം അധികകാലം നീണ്ടുനിൽക്കാറില്ല. ഡോളർ വിനിമയ നിരക്കിലെ വ്യതിയാനങ്ങൾക്കൊപ്പം രാജ്യാന്തര തലത്തിൽ സ്വർണത്തിന് ആവശ്യക്കാർ ഏറുന്നതും വിവിധ രാജ്യങ്ങളുടെ കേന്ദ്ര ബാങ്കുകൾ വൻതോതിൽ സ്വർണം വാങ്ങിക്കൂട്ടുന്നതും വിലക്കയറ്റത്തിന് ആക്കം കൂട്ടുന്നുണ്ട്.

വില വീണ്ടും ഉയരാൻ സാധ്യത

വരും ദിവസങ്ങളിൽ വിപണിയിൽ സ്വർണവില ഉയരാൻ സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തൽ. പശ്ചിമേഷ്യയിലെ സംഘർഷങ്ങൾ അവസാനിച്ചാൽ ക്രൂഡ് ഓയിൽ വിലയിൽ ഇടിവുണ്ടാകുമെങ്കിലും സുരക്ഷിത നിക്ഷേപമെന്ന നിലയിൽ സ്വർണവില വീണ്ടും വർധിച്ചേക്കാം. നിലവിൽ വലിയൊരു ഇടിവ് വിപണിയിൽ പെട്ടെന്ന് സംഭവിക്കില്ലെന്നും വിദഗ്ധർ ചൂണ്ടിക്കാട്ടുന്നു.

സംസ്ഥാനത്ത് വിവാഹ സീസൺ ആരംഭിക്കാനിരിക്കെ സ്വർണവിലയിലുണ്ടാകുന്ന ചാഞ്ചാട്ടം സാധാരണക്കാരെയും നിക്ഷേപകരെയും ഒരുപോലെ ബാധിക്കുന്നുണ്ട്. വില കുറഞ്ഞ ദിവസങ്ങളിൽ അഡ്വാൻസ് ബുക്കിങ് പോലുള്ള സൗകര്യങ്ങൾ പരമാവധി പ്രയോജനപ്പെടുത്താൻ ഉപഭോക്താക്കൾ ശ്രമിക്കുന്നുണ്ട്. ഉയർന്ന വിലയാണെങ്കിലും സ്വർണത്തിലുള്ള നിക്ഷേപം സാമ്പത്തിക സുരക്ഷിതത്വം നൽകുമെന്ന വിശ്വാസം ഉപഭോക്താക്കൾക്കിടയിൽ ശക്തമാണ്. സമ്പദ്വ്യവസ്ഥ സ്ഥിരത കൈവരിച്ചാൽ മാത്രമേ സ്വർണവിലയിൽ ശാശ്വതമായ മാറ്റങ്ങൾ ഉണ്ടാകുകയുള്ളൂ.

---------------

Hindusthan Samachar / CHANDHU CHANDRASEKHAR