Kodungalloor, 06 ഏപ്രില് (H.S.)

കൊടുങ്ങല്ലൂർ: മുൻ മുഖ്യമന്ത്രി ഉമ്മൻ ചാണ്ടിയുടെ മരണശേഷവും അദ്ദേഹത്തിന്റെ കുടുംബാംഗങ്ങൾ തമ്മിലുള്ള രാഷ്ട്രീയ പോര് കൊടുങ്ങല്ലൂർ നിയമസഭാ മണ്ഡലത്തിൽ പുതിയ തലത്തിലേക്ക്. ഉമ്മൻ ചാണ്ടിയുടെ മകൻ ചാണ്ടി ഉമ്മൻ എംഎൽഎ ഉന്നയിച്ച 'മുതലക്കണ്ണീർ' പരാമർശത്തിന് മറുപടിയുമായി ഉമ്മൻ ചാണ്ടിയുടെ മകളുടെ ഭർത്താവും കൊടുങ്ങല്ലൂരിലെ എൻഡിഎ സ്ഥാനാർത്ഥിയുമായ ഡോ. വർഗീസ് ജോർജ് രംഗത്തെത്തി. ഉമ്മൻ ചാണ്ടിയെ രാഷ്ട്രീയമായി പിന്നിൽ നിന്ന് കുത്തിയവർക്കൊപ്പമാണ് ഇന്ന് കോൺഗ്രസ് നിൽക്കുന്നതെന്ന് അദ്ദേഹം ആരോപിച്ചു.

വിവാദത്തിന്റെ പശ്ചാത്തലം

കൊടുങ്ങല്ലൂരിലെ യുഡിഎഫ് സ്ഥാനാർത്ഥി ഒ.ജെ. ജനീഷിന്റെ പ്രചാരണ പരിപാടിക്കിടെയായിരുന്നു ചാണ്ടി ഉമ്മന്റെ വിവാദ പരാമർശം. അടിയുറച്ച കോൺഗ്രസുകാരനായിരുന്ന ഉമ്മൻ ചാണ്ടിയുടെ പേരിൽ ആരും ഇവിടെ മുതലക്കണ്ണീർ ഒഴുക്കേണ്ടെന്നും, അദ്ദേഹത്തിന്റെ അനുഗ്രഹം യുഡിഎഫ് സ്ഥാനാർത്ഥിക്കൊപ്പമാണെന്നും ചാണ്ടി ഉമ്മൻ പറഞ്ഞിരുന്നു. വർഗീസ് ജോർജ് ഉമ്മൻ ചാണ്ടിയുടെ പേര് പ്രചാരണത്തിന് ഉപയോഗിക്കുന്നതിലെ അതൃപ്തിയാണ് ചാണ്ടി ഉമ്മൻ പ്രകടിപ്പിച്ചത്.

വർഗീസ് ജോർജിന്റെ കടന്നാക്രമണം

ചാണ്ടി ഉമ്മന്റെ വെല്ലുവിളി ഏറ്റെടുത്ത വർഗീസ് ജോർജ് മറുപടിയിൽ ആഞ്ഞടിച്ചു. ഉമ്മൻ ചാണ്ടിയെ ജീവിച്ചിരുന്നപ്പോൾ വേട്ടയാടിയവർക്കും അദ്ദേഹത്തെ രാഷ്ട്രീയമായി തകർക്കാൻ ശ്രമിച്ചവർക്കും ഒപ്പമിരുന്നാണ് ചാണ്ടി ഉമ്മൻ ഇപ്പോൾ പ്രസംഗിക്കുന്നത്. ഉമ്മൻ ചാണ്ടിയെ പിന്നിൽ നിന്ന് കുത്തിയവരാണ് ഇന്നത്തെ കോൺഗ്രസ് നേതൃത്വത്തിലുള്ളത്. അത് തുറന്നു പറയാൻ ചാണ്ടി ഉമ്മന് ധൈര്യമുണ്ടോ? എന്ന് അദ്ദേഹം ചോദിച്ചു.

തെരഞ്ഞെടുപ്പ് കാലത്ത് മാധ്യമങ്ങളെയും കൂട്ടി താൻ ഉമ്മൻ ചാണ്ടിയുടെ കല്ലറയിൽ പോയിട്ടില്ലെന്നും, സ്ഥാനാർത്ഥി പ്രഖ്യാപനത്തിന് മുൻപ് ആരും അറിയാതെ പോയി പ്രാർത്ഥിക്കുകയാണ് ചെയ്തതെന്നും അദ്ദേഹം വ്യക്തമാക്കി. ഉമ്മൻ ചാണ്ടിയുടെ രാഷ്ട്രീയമല്ല, മറിച്ച് അദ്ദേഹമെന്ന വ്യക്തിയോടുള്ള ബഹുമാനമാണ് താൻ ഉയർത്തിപ്പിടിക്കുന്നത്. ബിജെപി വികസന രാഷ്ട്രീയമാണ് സംസാരിക്കുന്നതെന്നും അതിൽ ഉമ്മൻ ചാണ്ടിയെ വ്യക്തിപരമായി സ്നേഹിക്കുന്നവർക്കും സ്ഥാനമുണ്ടെന്നും അദ്ദേഹം കൂട്ടിച്ചേർത്തു.

കുടുംബത്തിലെ ഭിന്നത രാഷ്ട്രീയത്തിലേക്ക്

ഉമ്മൻ ചാണ്ടിയുടെ മകൾ മറിയ ഉമ്മന്റെ ഭർത്താവാണ് ഡോ. വർഗീസ് ജോർജ്. അദ്ദേഹം ട്വന്റി-20 പിന്തുണയോടെ എൻഡിഎ സ്ഥാനാർത്ഥിയായി മത്സരിക്കുന്നത് കോൺഗ്രസിനുള്ളിൽ വലിയ ചർച്ചയായിരുന്നു. മറിയ ഉമ്മനും ഭർത്താവിന്റെ പ്രചാരണ രംഗത്ത് സജീവമാണ്. എന്നാൽ പുതുപ്പള്ളി എംഎൽഎയായ ചാണ്ടി ഉമ്മൻ പൂർണ്ണമായും കോൺഗ്രസ് സ്ഥാനാർത്ഥിക്കൊപ്പമാണ് നിലയുറപ്പിച്ചിരിക്കുന്നത്.

കൊടുങ്ങല്ലൂരിൽ ട്വന്റി-20 സഖ്യം എൻഡിഎയ്ക്ക് നൽകുന്ന പിന്തുണയും, ഉമ്മൻ ചാണ്ടി എന്ന വികാരം വോട്ടായി മാറുമോ എന്ന ആശങ്കയും യുഡിഎഫ് ക്യാമ്പിലുണ്ട്. ഇതിനെ പ്രതിരോധിക്കാനാണ് ചാണ്ടി ഉമ്മൻ നേരിട്ട് രംഗത്തിറങ്ങിയത്. എന്നാൽ വർഗീസ് ജോർജിന്റെ മറുപടിയോടെ വിഷയം കുടുംബത്തിനപ്പുറം രാഷ്ട്രീയമായ വലിയൊരു ചർച്ചയായി മാറിയിരിക്കുകയാണ്. കോൺഗ്രസ് ഉമ്മൻ ചാണ്ടിയോട് കാട്ടിയ നീതികേടുകൾ വോട്ടർമാരോട് പറയുമെന്നാണ് എൻഡിഎയുടെ നിലപാട്.

---------------

Hindusthan Samachar / Roshith K