Ernakulam, 01 മെയ് (H.S.)

അങ്കമാലിയിൽ ആന ഇടഞ്ഞ് ഒരാൾക്ക് ദാരുണാന്ത്യം. ലോറി ഡ്രൈവർ കൊല്ലം സ്വദേശി വിഷ്ണുവാണ് മരിച്ചത്. ക്ഷേത്രക്കുളത്തിൽ കുളിപ്പിക്കുന്നതിനിടെയാണ് നാടിനെ നടുക്കിയ സംഭവം.

അങ്കമാലി കിടങ്ങൂർ മഹാവിഷ്ണു ക്ഷേത്രത്തിലാണ് അപകടം ഉണ്ടായത്. കൊല്ലത്തുനിന്നും എത്തിച്ച അരുണിമ പാർഥസാരഥി എന്ന ആനയാണ് അക്രമം കാട്ടിയത്. യാത്രാമധ്യേ ക്ഷേത്ര കുളത്തിൽ ആനയെ കുളിപ്പിക്കാനിറങ്ങിയതെന്നാണ് പ്രാഥമിക വിവരം. രാവിലെ 9.30ന് കുളത്തിൽ ഇറക്കിയപ്പോഴാണ് അപ്രതീക്ഷിതമായി പ്രകോപിതനായത്.

വിരണ്ടോടിയ ആനയെ തളയ്ക്കാൻ വിഷ്ണു പരമാവധി ശ്രമിച്ചു. എന്നാൽ സാധിച്ചില്ല. ഇതിനിടെ വിഷ്ണുവിനെ ആന തുമ്പിക്കൈകൊണ്ട് അടിച്ചുവീഴ്ത്തി. തുടർന്ന് നിലത്തുവീണ ഇയാളെ ക്രൂരമായി ചവിട്ടുകയായിരുന്നു. സംഭവസ്ഥലത്തുവച്ചുതന്നെ വിഷ്ണു മരിച്ചു. ഏറെക്കാലമായി ഇതേ ആനയ്ക്കൊപ്പം ജോലി ചെയ്യുന്നയാളാണ് മരിച്ച വിഷ്ണു. ഇവരുടെ ദീർഘകാലത്തെ പരിചയം പോലും അപകടം ഒഴിവാക്കാൻ സഹായിച്ചില്ല.

ആക്രമണത്തിൽ മറ്റൊരു പാപ്പാനും ഗുരുതരമായി പരിക്കേറ്റിട്ടുണ്ട്. ആന വിരണ്ടതുകണ്ട് ഭയന്നോടിയ നാട്ടുകാരിൽ ഒരാൾക്കും പരിക്കേറ്റു. ജീവൻ രക്ഷിക്കാൻ ഓടുന്നതിനിടയിൽ വീണുപോയ ഒരു പ്രദേശവാസിയുടെ കാലിനാണ് പരിക്കേറ്റത്. ഇയാളെ ഉടൻ എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. ഇയാളുടെ ആരോഗ്യനില നിലവിൽ തൃപ്തികരമാണ്. നാട്ടുകാർ പെട്ടെന്ന് ഒഴിഞ്ഞുമാറിയതിനാൽ വളരെ വലിയൊരു ദുരന്തം ഒഴിവായി. എന്നാൽ വലിയ നാശനഷ്ടങ്ങളും പ്രദേശത്ത് റിപ്പോർട്ട് ചെയ്തു.

ക്ഷേത്രത്തിൽ എത്തിയവരുടേത് ഉൾപ്പെടെ നിരവധി വാഹനങ്ങൾ ആനയുടെ ആക്രമണത്തിൽ തകർന്നു. വിഷ്ണുവിൻ്റെ മൃതദേഹത്തിന് സമീപം ആന ദീർഘനേരം നിലയുറപ്പിച്ചത് വലിയ പ്രതിസന്ധിയുണ്ടാക്കി. ഏറെ നേരം നീണ്ട ആശയക്കുഴപ്പങ്ങൾക്കും ശ്രമങ്ങൾക്കും ഒടുവിലാണ് മൃതദേഹം മാറ്റാൻ കഴിഞ്ഞത്. ഇൻക്വസ്റ്റ് നടപടികൾക്ക് ശേഷം സർക്കാർ ആശുപത്രിയിലേക്ക് മാറ്റിയ മൃതദേഹം പോസ്റ്റ്മോർട്ടത്തിന് ശേഷം ബന്ധുക്കൾക്ക് കൈമാറും.

രക്ഷയായത് ദ്രുതകർമസേനആന ഇടഞ്ഞ വിവരമറിഞ്ഞ് പൊലീസും വനംവകുപ്പും ഉടൻ സ്ഥലത്തെത്തി.ഈ ആനയ്ക്ക് മദപ്പാടിൻ്റെ ലക്ഷണങ്ങൾ ഉണ്ടായിരുന്നില്ലെന്ന് വനംവകുപ്പ് ഉദ്യോഗസ്ഥർ വ്യക്തമാക്കി. അതിനാൽ പെട്ടെന്നുള്ള പ്രകോപനത്തിന് കാരണം ഇപ്പോഴും വ്യക്തമല്ല. വിഷ്ണുവിൻ്റെ അസ്വാഭാവിക മരണത്തിൽ പൊലീസ് പ്രാഥമിക കേസെടുത്ത് അന്വേഷണം തുടങ്ങി. ആനയ്ക്ക് മതിയായ വിശ്രമവും വെള്ളവും ലഭിച്ചിരുന്നോ എന്ന് പ്രത്യേകം പരിശോധിക്കും.

നിയന്ത്രണങ്ങൾ കർശനമാക്കുംസംസ്ഥാനത്ത് വീണ്ടും ഉത്സവ സീസൺ തുടങ്ങുകയാണ്. ജനവാസ മേഖലകളിൽ നാട്ടാനകൾ ഇടയുന്നതും പാപ്പാന്മാർ കൊല്ലപ്പെടുന്നതും വലിയ തോതിൽ വർധിക്കുന്നുണ്ട്. വേനൽച്ചൂട് കടുക്കുന്നതാണ് ഇതിന് പ്രധാന കാരണം. ഇതിനുപുറമെ മണിക്കൂറുകളോളം മതിയായ വിശ്രമമില്ലാതെ വെയിലത്ത് നിർത്തുകയും ചെയ്യുന്നു. തുടർച്ചയായ യാത്രയും ശബ്ദകോലാഹലങ്ങളും ആനകളിൽ കടുത്ത മാനസിക സമ്മർദം ഉണ്ടാക്കുന്നുണ്ട്. വനംവകുപ്പിലെ മൃഗഡോക്ടർമാരാണ് ഇക്കാര്യം വ്യക്തമാക്കിയത്. ഈ സാഹചര്യത്തിൽ ആനകളെ എഴുന്നള്ളിക്കുന്നതിൽ കർശന നിയമങ്ങൾ പാലിക്കണമെന്ന് ജില്ല കലക്ടർ നിർദേശിച്ചു.

സർക്കാരും കോടതിയും പുറപ്പെടുവിച്ച സുരക്ഷാ മാനദണ്ഡങ്ങൾ ലംഘിക്കുന്നവർക്കെതിരെ വിട്ടുവീഴ്ചയില്ലാത്ത നടപടിയുണ്ടാകും. ജനവാസ മേഖലകളിൽ ആനകളെ കൊണ്ടുവരുമ്പോൾ ഉയർന്ന ജാഗ്രത പാലിക്കണം. ഉത്സവ സീസണുകൾ കണക്കിലെടുത്ത് ക്ഷേത്രങ്ങളിലും മറ്റും പ്രത്യേക സുരക്ഷ ഒരുക്കാൻ പൊലീസിനോട് കലക്ടർ നിർദേശിച്ചു. ഇന്ന് ഇടഞ്ഞ ആനയുടെ പെരുമാറ്റ രീതികൾ വരുംദിവസങ്ങളിലും നിരീക്ഷിക്കും. ഇതിനായി വനംവകുപ്പ് ഉദ്യോഗസ്ഥരെ ഉൾപ്പെടുത്തി പ്രത്യേക സമിതിയെ നിയോഗിച്ചു. അപകടങ്ങൾ ഒഴിവാക്കാൻ നിർദേശങ്ങൾ കർശനമായി പാലിക്കാൻ എല്ലാവർക്കും ബാധ്യതയുണ്ടെന്നും ഭരണകൂടം ആവർത്തിച്ചു വ്യക്തമാക്കി.

---------------

Hindusthan Samachar / CHANDHU CHANDRASEKHAR