Chennai, 10 മെയ് (H.S.)

ചെന്നൈ: തമിഴ്നാട് രാഷ്ട്രീയത്തിൽ ആറു പതിറ്റാണ്ടുകാലം നിലനിന്നിരുന്നഡി.എം.കെ - എ.ഐ.എ.ഡി.എം.കെ ദ്വന്ദ്വാധിപത്യത്തിന് വിരാമമിട്ട് തമിഴക വെട്രി കഴകം (ടി.വി.കെ) അധ്യക്ഷൻ വിജയ് ഇന്ന് മുഖ്യമന്ത്രിയായി അധികാരമേൽക്കും. ദ്രാവിഡ രാഷ്ട്രീയത്തിന്റെ ദിശ മാറ്റിക്കുറിച്ച ഈ ചരിത്ര നിമിഷത്തിന് ചെന്നൈയിലെ ജവഹർലാൽ നെഹ്റു ഇൻഡോർ സ്റ്റേഡിയം സാക്ഷ്യം വഹിക്കും. രാവിലെ പത്തു മണിയോടെ നടക്കുന്ന ചടങ്ങിൽ തമിഴ്നാട് ഗവർണർ രാജേന്ദ്ര വിശ്വനാഥ് അർലേക്കർ വിജയ്ലിന് സത്യവാചകം ചൊല്ലിക്കൊടുക്കും.

ദ്രാവിഡ കോട്ടകൾ തകർന്ന വീരഗാഥ

1967 മുതൽ തമിഴ്നാട് രാഷ്ട്രീയം ഡി.എം.കെയുടെയോ എ.ഐ.എ.ഡി.എം.കെയുടെയോ കൈകളിലായിരുന്നു. എന്നാൽ ഈ ആധിപത്യത്തിനാണ് തന്റെ ആദ്യ തിരഞ്ഞെടുപ്പിലൂടെ തന്നെ വിജയ് അന്ത്യം കുറിച്ചത്. ഏറ്റവും പുതിയ വിവരങ്ങൾ പ്രകാരം ടി.വി.കെ 108 സീറ്റുകൾ നേടിയെങ്കിലും കേവല ഭൂരിപക്ഷത്തിന് 10 സീറ്റുകൾ കൂടി ആവശ്യമായിരുന്നു. ഈ സാഹചര്യത്തിലാണ് കോൺഗ്രസ്, വി.സി.കെ, സി.പി.ഐ, സി.പി.എം, ഐ.യു.എം.എൽ തുടങ്ങിയ കക്ഷികൾ ടി.വി.കെ സർക്കാരിന് പിന്തുണ പ്രഖ്യാപിച്ചത്. ഇതോടെ 121 എം.എൽ.എമാരുടെ പിന്തുണയോടെ വിജയ് സഖ്യസർക്കാരിനെ നയിക്കും.

ഭരണത്തിൽ മാറ്റത്തിന്റെ കാറ്റ്

പതിറ്റാണ്ടുകൾക്ക് ശേഷമാണ് തമിഴ്നാട്ടിൽ ഒരു സഖ്യസർക്കാർ അധികാരത്തിൽ വരുന്നത്. മറ്റൊരു പ്രത്യേകത 1967-ന് ശേഷം ആദ്യമായി കോൺഗ്രസ് തമിഴ്നാട് മന്ത്രിസഭയുടെ ഭാഗമാകുന്നു എന്നതാണ്. വിജയ്ലിനൊപ്പം ഒൻപത് മന്ത്രിമാരാണ് ഇന്ന് സത്യപ്രതിജ്ഞ ചെയ്യുന്നത്. ഇതിൽ ടി.വി.കെ നേതാക്കളായ ബുസ്സി ആനന്ദ്, ആദവ് അർജുന, എൻ. ആനന്ദ് എന്നിവർക്ക് പുറമെ സഖ്യകക്ഷികളിൽ നിന്നുള്ള പ്രതിനിധികളും ഉൾപ്പെടും. പുതുമുഖങ്ങൾക്കും യുവാക്കൾക്കും വലിയ മുൻഗണന നൽകുന്ന ഒരു മന്ത്രിസഭയായിരിക്കും ഇതെന്നാണ് സൂചന.

ഇന്നത്തെ ചടങ്ങുകൾ

രാവിലെ 10 മണിക്ക് സത്യപ്രതിജ്ഞാ ചടങ്ങുകൾ പൂർത്തിയാക്കിയ ശേഷം ഉച്ചയ്ക്ക് 3 മണിയോടെ പുതിയ മുഖ്യമന്ത്രിയും മന്ത്രിമാരും സെക്രട്ടേറിയറ്റിൽ എത്തി ഔദ്യോഗികമായി ചുമതലയേൽക്കും. ചെന്നൈ നഗരം ഇപ്പോൾ ആരാധകരാലും ടി.വി.കെ പ്രവർത്തകരാലും നിറഞ്ഞിരിക്കുകയാണ്. സ്റ്റേഡിയത്തിന് പുറത്ത് ആയിരക്കണക്കിന് ആളുകളാണ് തങ്ങളുടെ പ്രിയപ്പെട്ട നേതാവിന്റെ സ്ഥാനാരോഹണം കാണാൻ കാത്തുനിൽക്കുന്നത്.

വരാനിരിക്കുന്ന വെല്ലുവിളികൾ

സത്യപ്രതിജ്ഞയ്ക്ക് ശേഷം മെയ് 13-നകം നിയമസഭയിൽ ഭൂരിപക്ഷം തെളിയിക്കണമെന്ന് ഗവർണർ നിർദ്ദേശിച്ചിട്ടുണ്ട്. സഖ്യകക്ഷികൾ ഉറച്ച പിന്തുണ വാഗ്ദാനം ചെയ്തിട്ടുള്ളതിനാൽ വിശ്വാസവോട്ട് വിജയകരമായി മറികടക്കാൻ സാധിക്കുമെന്നാണ് ടി.വി.കെ ക്യാമ്പ് വിശ്വസിക്കുന്നത്. തമിഴ് ജനതയുടെ ക്ഷേമത്തിനായുള്ള പുതിയൊരു വികസന മാതൃകയായിരിക്കും തന്റെ ഭരണമെന്ന് വിജയ് നേരത്തെ തന്നെ വ്യക്തമാക്കിയിരുന്നു.

സിനിമയിലെ വെള്ളിത്തിരയിൽ നിന്ന് ഭരണസിംഹാസനത്തിലേക്കുള്ള വിജയ്ലിന്റെ ഈ ചുവടുവെപ്പ് തമിഴ് മണ്ണിൽ മാത്രമല്ല, ഇന്ത്യൻ രാഷ്ട്രീയത്തിൽ തന്നെ വലിയ ചർച്ചകൾക്ക് വഴിതുറക്കുകയാണ്. ഡി.എം.കെ പോലുള്ള ശക്തമായ അടിത്തറയുള്ള പാർട്ടികളെ അട്ടിമറിച്ചെത്തുന്ന വിജയ് സർക്കാരിന്റെ ഓരോ നീക്കവും ഇനി രാജ്യം ഉറ്റുനോക്കും.

---------------

Hindusthan Samachar / Roshith K