Kolkota, 11 മെയ് (H.S.)

കൊൽക്കത്ത: പശ്ചിമ ബംഗാളിലെ രാഷ്ട്രീയ ചരിത്രത്തിൽ പുതിയ അധ്യായം കുറിച്ചുകൊണ്ട് മുഖ്യമന്ത്രി സുവേന്ദു അധികാരിയുടെ നേതൃത്വത്തിലുള്ള പുതിയ ബിജെപി സർക്കാർ അധികാരമേറ്റതിന് പിന്നാലെ നിർണ്ണായക തീരുമാനങ്ങൾ പ്രഖ്യാപിച്ചു. സെക്രട്ടേറിയറ്റായ നബാന്നയിൽ തിങ്കളാഴ്ച നടന്ന ആദ്യ മന്ത്രിസഭാ യോഗത്തിന് ശേഷമാണ് സംസ്ഥാനത്ത് കേന്ദ്ര പദ്ധതികൾ പൂർണ്ണമായി നടപ്പിലാക്കുമെന്ന് മുഖ്യമന്ത്രി അറിയിച്ചത്. മുൻ തൃണമൂൽ സർക്കാർ നടപ്പിലാക്കാൻ വിസമ്മതിച്ച ആയുഷ്മാൻ ഭാരത് പദ്ധതി ഉൾപ്പെടെയുള്ള വികസന പദ്ധതികൾ ഉടൻ സംസ്ഥാനത്ത് ലഭ്യമാകും.

ആയുഷ്മാൻ ഭാരത് ഇനി ബംഗാളിലും

സംസ്ഥാനത്തെ ജനങ്ങൾക്ക് മികച്ച ആരോഗ്യ പരിരക്ഷ ഉറപ്പാക്കുന്നതിനായി കേന്ദ്ര സർക്കാരിന്റെ മുൻനിര പദ്ധതിയായ ആയുഷ്മാൻ ഭാരത് (പിഎം ജൻ ആരോഗ്യ യോജന) നടപ്പിലാക്കാൻ മന്ത്രിസഭ ഔദ്യോഗികമായി തീരുമാനിച്ചു. ആരോഗ്യ മന്ത്രാലയവുമായി ഉടൻ കരാറിൽ ഒപ്പിടാൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്. കൂടാതെ പ്രധാനമന്ത്രി കൃഷക് ബീമാ യോജന, വിശ്വകർമ്മ സ്കീം, ബേട്ടി ബച്ചാവോ ബേട്ടി പഠാവോ, ഉജ്ജ്വല യോജന തുടങ്ങിയ പ്രധാന കേന്ദ്ര പദ്ധതികളും സംസ്ഥാനത്ത് ഉടൻ പ്രാബല്യത്തിൽ വരും.

അതിർത്തി സുരക്ഷയ്ക്ക് മുൻഗണന; ബിഎസ്എഫിന് ഭൂമി കൈമാറും

ദേശീയ സുരക്ഷയ്ക്ക് മുൻഗണന നൽകുന്നതിന്റെ ഭാഗമായി ഇന്ത്യ-ബംഗ്ലാദേശ് അതിർത്തിയിൽ വേലി കെട്ടുന്നതിനായി ആവശ്യമായ ഭൂമി അതിർത്തി സുരക്ഷാ സേനയ്ക്ക് (BSF) കൈമാറാൻ മന്ത്രിസഭ അനുമതി നൽകി. 45 ദിവസത്തിനുള്ളിൽ ഭൂമി കൈമാറ്റ നടപടികൾ പൂർത്തിയാക്കാൻ ലാൻഡ് റിഫോംസ് ഡിപ്പാർട്ട്മെന്റിന് നിർദ്ദേശം നൽകി. മുൻ സർക്കാർ നിയമവിരുദ്ധ നുഴഞ്ഞുകയറ്റക്കാരെ സംരക്ഷിക്കുന്നതിനായി ഈ നടപടികൾ വൈകിപ്പിച്ചിരുന്നതായും സുവേന്ദു അധികാരി കുറ്റപ്പെടുത്തി.

ഉദ്യോഗാർത്ഥികൾക്ക് ആശ്വാസം; പ്രായപരിധി കൂട്ടി

ബംഗാളിലെ അഭ്യസ്തവിദ്യരായ യുവാക്കൾക്ക് തൊഴിലവസരങ്ങൾ വർദ്ധിപ്പിക്കുന്നതിനായി സർക്കാർ ജോലികൾക്കുള്ള അപേക്ഷകരുടെ ഉയർന്ന പ്രായപരിധിയിൽ അഞ്ച് വർഷത്തെ ഇളവ് പ്രഖ്യാപിച്ചു. കേന്ദ്ര ആഭ്യന്തര മന്ത്രി അമിത് ഷാ തിരഞ്ഞെടുപ്പ് വേളയിൽ നൽകിയ വാഗ്ദാനമാണ് ഇതിലൂടെ സർക്കാർ നിറവേറ്റിയിരിക്കുന്നത്.

ഭരണപരിഷ്കാരങ്ങളും നിയമമാറ്റങ്ങളും

ഭാരതീയ ന്യായ സംഹിത (BNS) ഉൾപ്പെടെയുള്ള പുതിയ ക്രിമിനൽ നിയമങ്ങൾ ബംഗാളിൽ പൂർണ്ണമായി നടപ്പിലാക്കാനും തീരുമാനമായിട്ടുണ്ട്. കൂടാതെ, സംസ്ഥാനത്തെ ഐഎഎസ് ഉദ്യോഗസ്ഥരെ കേന്ദ്ര സർക്കാരിന്റെ പരിശീലന പരിപാടികളിൽ പങ്കെടുക്കാൻ അനുവദിക്കും. 2025 ജൂണിൽ കേന്ദ്ര ആഭ്യന്തര മന്ത്രാലയം പുറപ്പെടുവിച്ച സെൻസസ് സംബന്ധിച്ച സർക്കുലർ ഉടൻ നടപ്പിലാക്കാനും മന്ത്രിസഭ തീരുമാനിച്ചു.

ഈ സർക്കാർ അഹംഭാവത്തിലല്ല, മറിച്ച് തത്വങ്ങളിലാണ് പ്രവർത്തിക്കുന്നത് എന്ന് സുവേന്ദു അധികാരി വാർത്താസമ്മേളനത്തിൽ വ്യക്തമാക്കി. നിലവിലുള്ള ജനക്ഷേമ പദ്ധതികൾ നിർത്തലാക്കില്ലെന്നും എന്നാൽ അവ സുതാര്യമായി നടപ്പിലാക്കുമെന്നും അദ്ദേഹം ഉറപ്പുനൽകി. മരിച്ചവരുടെ പേരിൽ ആനുകൂല്യം പറ്റുന്നതും അനധികൃത കുടിയേറ്റക്കാർ ആനുകൂല്യങ്ങൾ കൈക്കലാക്കുന്നതും കർശനമായി തടയുമെന്നും അദ്ദേഹം കൂട്ടിച്ചേർത്തു.

---------------

Hindusthan Samachar / Roshith K