Malappuram, 11 മെയ് (H.S.)

മലപ്പുറം: പാണക്കാട് സയ്യിദ് സാദിഖലി ശിഹാബ് തങ്ങളെ സമൂഹമാധ്യമങ്ങളിലൂടെ അധിക്ഷേപിച്ച സംഭവം കേവലമൊരു രാഷ്ട്രീയ പ്രകോപനമല്ലെന്നും, മറിച്ച് ലക്ഷങ്ങൾ തട്ടിയെടുക്കാൻ ലക്ഷ്യമിട്ടുള്ള ബ്ലാക്ക്മെയിലിംഗ് തന്ത്രമാണെന്നും പോലീസ് സ്ഥിരീകരിച്ചു. പ്രതി മുഹമ്മദ് റോഷൻ പ്രചരിപ്പിച്ചത് സാദിഖലി തങ്ങളുടെ വ്യാജമായി നിർമ്മിച്ച (Morphed) ചിത്രങ്ങളാണെന്ന് ശാസ്ത്രീയ പരിശോധനയിൽ തെളിഞ്ഞു. ഒരു പരാതിക്കാരിയുണ്ടെന്ന പ്രതിയുടെ വാദം പോലീസിനെ തെറ്റിദ്ധരിപ്പിക്കാൻ കെട്ടിയുണ്ടാക്കിയ കഥയാണെന്നും അന്വേഷണത്തിൽ വ്യക്തമായി.

വ്യാജ ചിത്രവും 'പരാതിക്കാരി' എന്ന കഥയും

സാദിഖലി തങ്ങളെ വ്യക്തിഹത്യ ചെയ്യുന്ന തരത്തിലുള്ള പോസ്റ്റുകൾ പ്രത്യക്ഷപ്പെട്ടതോടെ മുസ്ലിം ലീഗ് പ്രവർത്തകർ വലിയ പ്രതിഷേധവുമായി രംഗത്തെത്തിയിരുന്നു. തുടർന്ന് പോലീസ് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. തങ്ങളെ അധിക്ഷേപിച്ചതിന് പിന്നിൽ ഒരു യുവതിയുടെ പരാതിയുണ്ടെന്നും അതിനാലാണ് താൻ പ്രതികരിച്ചതെന്നുമാണ് റോഷൻ ആദ്യം പോലീസിനോട് പറഞ്ഞിരുന്നത്. എന്നാൽ അത്തരമൊരു യുവതി നിലവിലില്ലെന്നും, പോലീസിന്റെയും പ്രവർത്തകരുടെയും ശ്രദ്ധ തിരിക്കാൻ റോഷൻ ഉണ്ടാക്കിയ വ്യാജ കഥാപാത്രമാണ് ഇതെന്നും പോലീസ് കണ്ടെത്തി.

തങ്ങളെ അപകീർത്തിപ്പെടുത്തുന്ന തരത്തിലുള്ള വ്യാജ ചിത്രങ്ങൾ നിർമ്മിച്ചതും റോഷൻ തന്നെയാണെന്ന് തെളിഞ്ഞിട്ടുണ്ട്. രാഷ്ട്രീയ നേതാക്കളെയും പ്രമുഖരെയും ഇത്തരത്തിൽ കുടുക്കി പണം തട്ടുന്ന സംഘത്തിലെ പ്രധാനിയാണ് ഇയാളെന്ന് പോലീസ് സംശയിക്കുന്നു.

ആസൂത്രണത്തിന് പിന്നിൽ വൻ സംഘം

മുഹമ്മദ് റോഷൻ ഒറ്റയ്ക്കല്ല ഈ കുറ്റകൃത്യം ചെയ്തതെന്നാണ് പോലീസിന്റെ നിഗമനം. വ്യാജ പ്രൊഫൈലുകൾ നിർമ്മിക്കാനും പോസ്റ്റുകൾ അതിവേഗം പ്രചരിപ്പിക്കാനും സൈബർ വിദഗ്ധരുടെ സഹായം ഇയാൾക്ക് ലഭിച്ചിട്ടുണ്ട്. ഈ തിരക്കഥയ്ക്ക് പിന്നിൽ കൃത്യമായ ആസൂത്രണമുണ്ട്. കൂടുതൽ പേർ നിരീക്ഷണത്തിലാണ്. വരും ദിവസങ്ങളിൽ കൂടുതൽ അറസ്റ്റുകൾ ഉണ്ടായേക്കാം, എന്ന് അന്വേഷണ ഉദ്യോഗസ്ഥർ വ്യക്തമാക്കി. പ്രതിയുടെ മൊബൈൽ ഫോണും മറ്റ് ഇലക്ട്രോണിക് ഉപകരണങ്ങളും ഡിജിറ്റൽ പരിശോധനയ്ക്കായി അയച്ചിട്ടുണ്ട്.

പ്രതിഷേധവുമായി ലീഗ് അണികൾ

ആത്മീയവും രാഷ്ട്രീയവുമായ നേതൃത്വം നൽകുന്ന പാണക്കാട് തങ്ങൾക്കെതിരെ നടന്ന ഈ സൈബർ ആക്രമണം മുസ്ലിം ലീഗ് പ്രവർത്തകർക്കിടയിൽ വലിയ അമർഷമുണ്ടാക്കി. പാർട്ടിയെയും നേതൃത്വത്തെയും തകർക്കാൻ ബോധപൂർവ്വം ചില കേന്ദ്രങ്ങൾ നടത്തുന്ന ഗൂഢാലോചനയാണിതെന്ന് ലീഗ് നേതാക്കൾ ആരോപിച്ചു. വ്യാജ പ്രചാരകർക്കെതിരെ മാതൃകാപരമായ ശിക്ഷ ഉറപ്പാക്കണമെന്ന് കെ.പി.എ മജീദ് അടക്കമുള്ള നേതാക്കൾ ആവശ്യപ്പെട്ടു.

നിലവിൽ ഐടി ആക്ട് പ്രകാരവും മതസ്പർദ്ധ വളർത്താൻ ശ്രമിച്ചതിനും പ്രതിക്കെതിരെ കേസെടുത്തിട്ടുണ്ട്. ഗൂഢാലോചനയിൽ ഉൾപ്പെട്ട മറ്റുള്ളവരിലേക്ക് അന്വേഷണം വ്യാപിപ്പിക്കാനാണ് പോലീസിന്റെ തീരുമാനം.

---------------

Hindusthan Samachar / Roshith K