Kasargod, 15 മെയ് (H.S.)

കാസർഗോഡ്: കേരള നിയമസഭാ തെരഞ്ഞെടുപ്പ് വേളയിൽ യുഡിഎഫ് മുന്നോട്ട് വെച്ച പ്രധാന വാഗ്ദാനങ്ങളിലൊന്നായ കെഎസ്ആർടിസിയിലെ സൗജന്യ സ്ത്രീ യാത്രാ പദ്ധതി നടപ്പിലാക്കാത്തതിൽ പ്രതിഷേധിച്ച് ബിജെപി സമരരംഗത്തേക്ക്. ബിജെപി കാസർഗോഡ് ജില്ലാ കമ്മിറ്റിയുടെ നേതൃത്വത്തിൽ കെഎസ്ആർടിസി സ്റ്റാൻഡിൽ പ്രതിഷേധ പ്രകടനവും 'ടിക്കറ്റില്ലാ യാത്ര'യും സംഘടിപ്പിച്ചു. പരിപാടി ജില്ലാ പ്രസിഡന്റ് അശ്വിനി എം.എൽ ഉദ്ഘാടനം ചെയ്തു.

വാഗ്ദാന ലംഘനമെന്ന് ബിജെപി

ഭരണത്തിലേറി ദിവസങ്ങൾ പിന്നിട്ടിട്ടും ജനപ്രിയ വാഗ്ദാനങ്ങൾ നടപ്പിലാക്കാൻ സർക്കാർ മടിക്കുകയാണെന്ന് അശ്വിനി എം.എൽ ആരോപിച്ചു. സ്ത്രീ വോട്ടർമാരെ സ്വാധീനിക്കാൻ വേണ്ടി മാത്രം നൽകിയ വ്യാജ വാഗ്ദാനമായിരുന്നു ഇത്. അധികാരത്തിൽ വന്നാൽ ഉടൻ നടപ്പാക്കുമെന്ന് പറഞ്ഞവർ ഇപ്പോൾ സാങ്കേതിക കാരണങ്ങൾ പറഞ്ഞ് ഒളിച്ചോടുകയാണ്. ജനങ്ങളെ കബളിപ്പിക്കുന്ന ഈ നയം ബിജെപി അനുവദിക്കില്ല, അവർ വ്യക്തമാക്കി.

നവ്യ ഹരിദാസിന്റെ ഫെയ്സ്ബുക്ക് പോസ്റ്റ് ചർച്ചയാകുന്നു

സമരത്തിന് ആവേശം പകർന്ന് ബിജെപി നേതാവ് നവ്യ ഹരിദാസ് പങ്കുവെച്ച ഫെയ്സ്ബുക്ക് പോസ്റ്റ് ഇതിനോടകം സോഷ്യൽ മീഡിയയിൽ വൈറലായിട്ടുണ്ട്. മെയ് 15 മുതൽ സൗജന്യ യാത്ര ഉറപ്പാക്കുമെന്ന് യുഡിഎഫ് നേതാക്കൾ നേരത്തെ പ്രഖ്യാപിച്ചിരുന്നു എന്ന് അവർ ചൂണ്ടിക്കാട്ടി.

നാളെയാണ് മെയ് 15. എംപി കെ.സി വേണുഗോപാലും നിയുക്ത എംഎൽഎ രമേശ് പിഷാരടിയും കേരളത്തിലെ എല്ലാ സ്ത്രീകൾക്കും ഉറപ്പ് നൽകിയ കെഎസ്ആർടിസിയിൽ സൗജന്യ യാത്ര എന്ന വാഗ്ദാനം നടപ്പിലാക്കുന്ന ദിനം. അവരായി പ്രഖ്യാപിച്ച തീയതി. അപ്പോ എങ്ങനെയാ … യാത്ര തുടങ്ങുകയല്ലേ ഗേൾസ്..??

— നവ്യ ഹരിദാസ് (ഫെയ്സ്ബുക്ക് പോസ്റ്റ്)

നിയുക്ത എംഎൽഎ രമേശ് പിഷാരടിയെയും കെ.സി വേണുഗോപാലിനെയും നേരിട്ട് ലക്ഷ്യം വെച്ചുകൊണ്ടുള്ള നവ്യയുടെ പരിഹാസം രാഷ്ട്രീയ കേന്ദ്രങ്ങളിൽ വലിയ ചർച്ചയായിട്ടുണ്ട്. തെരഞ്ഞെടുപ്പ് പ്രചാരണ വേളയിൽ ഈ വാഗ്ദാനം വലിയ തോതിൽ വോട്ടർമാരെ സ്വാധീനിച്ചിരുന്നു.

പ്രതിഷേധം ശക്തമാക്കാൻ ബിജെപി

കാസർഗോഡ് കെഎസ്ആർടിസി സ്റ്റാൻഡിൽ നടന്ന പ്രതിഷേധത്തിൽ നിരവധി പ്രവർത്തകർ പങ്കെടുത്തു. ടിക്കറ്റെടുക്കാതെ ബസിൽ കയറി പ്രതിഷേധിക്കാനുള്ള നീക്കം പോലീസും കെഎസ്ആർടിസി അധികൃതരും ചേർന്ന് തടയാൻ ശ്രമിച്ചത് നേരിയ സംഘർഷത്തിന് കാരണമായി. പദ്ധതി നടപ്പിലാക്കുന്നത് വരെ സംസ്ഥാനവ്യാപകമായി പ്രതിഷേധം സംഘടിപ്പിക്കാനാണ് ബിജെപിയുടെ തീരുമാനം.

അതേസമയം, സൗജന്യ യാത്ര നടപ്പാക്കുന്നതിന് മുന്നോടിയായി കെഎസ്ആർടിസിയിൽ 'ജെൻഡർ ടിക്കറ്റിംഗ്' (Gender Ticketing) സംവിധാനം ഏർപ്പെടുത്തുന്നതിനുള്ള നടപടികൾ ആരംഭിച്ചതായി സർക്കാർ വൃത്തങ്ങൾ സൂചിപ്പിക്കുന്നുണ്ടെങ്കിലും എന്ന് മുതൽ യാത്ര സൗജന്യമാകും എന്ന കാര്യത്തിൽ ഔദ്യോഗിക വ്യക്തത വന്നിട്ടില്ല. സ്വകാര്യ ബസ് ഉടമകളുടെ ഭാഗത്ത് നിന്നുള്ള ശക്തമായ എതിർപ്പും സർക്കാരിന് മുന്നിലുള്ള വെല്ലുവിളിയാണ്.

---------------

Hindusthan Samachar / Roshith K